Khua bruă kƀĭn ala Trần Thanh Mẫn brei thâo, anei jing gưl tal êlâo bruă kƀĭn ala mkŏ mjing klei trông čhai. Ñu lač bruă ksiêm dlăng mâo leh Khua gĭt gai   Hồ Chí Minh kiă kriê hlue ngă mơ̆ng hlăk thŭn 1946. Khua gĭt gai Hồ Chí Minh ăt ksiêm dlăng hlăm dŭm alŭ wăl yuôm bhăn kơ klei duh mkra, ala ƀuôn, giăm hŏng mnuih ƀuôn sang, jĕ hŏng mnuih ƀuôn sang, čiăng thâo săng kơ mnuih ƀuôn sang. Khua bruă kƀĭn ala dŭm gưl ăt mđing ngă nanao bruă ksiêm dlăng kñăm rŭ mdơ̆ng, lehanăn mđĭ kyar lăn čar. Bi klei ksiêm dlăng ară anei, jing čiăng lŏ čuăl mkă mđĭ kyar lăn čar hlăm ênuk gưl mrâo, ênuk gưl kpưn đĭ mơ̆ng djuê ana.

Wưng leh êgao, bruă kƀĭn ala gưl 15 mđing leh êdi kơ bruă ksiêm dlăng, mâo lu bruă ksiêm mâo ngă hŏng klei kjăp, lehanăn mâo klei hâo mdah klă mngač hŏng phung bi ala bruă kƀĭn ala, hŏng phung ƀuôn sang. Mơ̆ng anăn, bruă mkŏ mjing, bi leh klei bhiăn kơ bruă ksiêm dlăng mâo bruă ngă leh hŏng klei klă mngač, pral plah wah dŭm anôk bruă hlăm bruă kƀĭn ala, hlăm knŭk kna lehanăn knơ̆ng bruă Mặt trận čar kwar, sang phat kđi yang ƀuôn, anôk bruă ksiêm dlăng yang ƀuôn, anôk bruă mkă tĭng knŭk kna, anôk bruă kăp ksiêm, dŭm anôk bruă klei mrâo ti gưl dlông lehanăn alŭ wăl.

Tui si khua bruă kƀĭn ala, bruă êmuh jing leh hdră ksiêm dlăng tŭ dưn mơ̆ng anôk bruă kƀĭn ala. Ti anôk bi kƀĭn bruă kƀĭn ala ngă nanao bruă êmuh lehanăn wĭt lač klei êmuh. Êpul gơ̆ng bruă djuê ana, dŭm anôk bruă hlăm bruă kƀĭn ala mâo nanao dŭm gưl hlak mblang kơ dŭm klei phung bi ala kơ mnuih ƀuôn sang, lehanăn mnuih ƀuôn sang mđing êmuh.

Wưng leh êgao, bruă kƀĭn ala mđrăm mbĭt nanao hŏng knŭk kna. Ti gŭ klei kiă kriê mơ̆ng Đảng, hŏng dŭm hdră êlan djŏ klă, tă êlan jăk kơ klei mđĭ kyar bruă duh mkra ala ƀuôn, răng mgang kjăp klei êđăp ênang yang ƀuôn, bruă răng mgang ala čar, lehanăn klei êđăp ênang ƀuôn sang. Mơ̆ng anăn,Knŭk kna bi êdah klei bhiăn, hdră mtrŭn čiăng kơ dhar bruă gĭt gai bruă kƀĭn ala, bruă kƀĭn ala bi mklă dŭm bruă djŏ tuôm hŏng klei bhiăn, mkŏ mjing hdră bhiăn, hdră mtrŭn kơ dŭm bruă yuôm bhăn kơ lăn čar.

Khua bruă kƀĭn ala brei thâo, ti anôk bi kƀĭn giăm anei, bruă kƀĭn ala gưl 15 mtrŭn leh dŭm klei bhiăn, hdră mtrŭn hŏng dŭm klei mlih mrâo  hlăm klei bhiăn mtrŭn dŭm mta hră mơar tui si klei bhiăn, hlăm anăn mbha gưl kơ klei dưi prŏng kơ knŭk kna lehanăn bruă sang čư̆ êa alŭ wăl alŭ wăl tui si klei kiă kriê mơ̆ng khua gĭt gai Đảng Tô Lâm hŏng hdră êlan alŭ wăl bi mklă, alŭ wăl mă bruă, alŭ wăl mâo klei đua klam.

Si srăng ngă bruă knuă mơ̆ng bruă sang čư̆ êa dua gưl rơ̆ng mâo ngă djŏ hŏng klei čiăng hlăm wưng tinăp, čiăng kơ jih jang bruă ksiêm dlăng bruă kƀĭn ala, dhar bruă gĭt gai bruă kƀĭn ala nao djŏ hlăm bruă ksiêm dlăng klei bhiăn, hdră mtrŭn, hră mtrŭn. Sitôhmô 1 thŭn mâo dua klei ksiêm dlăng mơ̆ng bruă kƀĭn ala, 2 klei ksiêm dlăng mơ̆ng dhar bruă gĭt gai bruă kƀĭn ala. Anăp anei, drei knŏng srăng mkŏ mjing mă sa klei ksiêm dlăng mơ̆ng bruă kƀĭn ala, ƀiădah dhar bruă gĭt gai bruă kƀĭn ala bi ksiêm dlăng lu blư̆, nanao wăt hlăm klei ksiêm hŏng klei kdjăt čiăng pral thâo ƀuh ya mta klei adôk ka djŏ, pral hmao ruh mgaih jih klei dleh dlan.

Khua bruă kƀĭn ala brei thâo, dhar bruă gĭt gai bruă kƀĭn ala srăng lŏ dơ̆ng mă klei blŭ mơ̆ng phung bi ala bruă kƀĭn ala, Êpul gơ̆ng bruă ƀuôn sang mdah hŏng bruă kƀĭn ala ksiêm, bi mklă ti anôk bi kƀĭn tal 10, bruă kƀĭn ala gưl 15 čiăng kơ dŭm hdră mtrŭn rơ̆ng mâo ksiêm dlăng kjăp hlăm klei mă bruă.

 Khua bruă kƀĭn ala Trần Thanh Mẫn mñă, bi kjăp ai tiê klei mĭn hlăm klei blŭ hrăm pŏk klei bi kƀĭn tal 8, bruă kƀĭn ala gưl 15, Khua gĭt gai Đảng Tô Lâm bi êdah klă: Bi pral klei ksiêm duah bi mklă hdră êlan kơ klei ksiêm dlăng prŏng hĭn mơ̆ng bruă kƀĭn ala čiăng bi djŏ hŏng bruă knuă dôk ngă đăm lĕ mñă wĭt nao, mđĭ mđăl dŭm bruă knuă mơ̆ng knŭk kna mă mkăn amâo mâo ngă luič liê ngăn prăk knŭk kna hơăi muang mang. Lŏ dơ̆ng mđĭ hĭn hnơ̆ng kjăp hlăm bruă êmuh, bruă hlak mblang, bruă ksiêm hră mơar mơ̆ng hdră bhiăn, mđing ktuê ksiêm, dlăng wĭt, mtrŭt mjhar klei hlue ngă dŭm klei akâo leh klei ksiêm dlăng. Khua bruă kƀĭn ala Trần Thanh Mẫn đăo knang lač:

Klei bi trông mâo leh lu klei blŭ yuôm bhăn, jih ai tiê, mâo klei uêñ klam mơ̆ng phung bi ala bruă kƀĭn ala, phung truăn kơ bruă, phung kreh knhâo, phung ksiêm duah, mâo đru mguôp leh jăk kơ bruă bi leh jih jang klei bhiăn djŏ tuôm mơ̆ng bruă ksiêm dlăng hŏng wưng mrâo mrang mơ̆ng lăn čar, đru mđĭ kyar bruă duh mkra ala ƀuôn, rơ̆ng kjăp klei êđăp ênang lăn čar, mkŏ mjing jih jang bruă kđi car doh mngač, kjăp ktang, bi kdơ̆ng hŏng klei ƀơ̆ng ngăn, klei bi liê hơăi mung mang, klei amâo mâo jăk./.