Dŭm thŭn êgao, Đảng leh anăn knŭk kna mđĭ hĭn leh klei gĭt gai, ktrâo lač, mđĭ klei thâo săng, bruă klam mơ̆ng gưl bruă Đảng nah gŭ, êpul bruă Đảng kơ bruă djuê ana, boh nik jing ti krĭng mnuih djuê ƀiă leh anăn Čư̆ čhiăng hlăm wưng mrâo. Yap truh kơ ară anei, mâo 118 hdră êlan dôk dưn yua, hluê ngă ti krĭng mnuih djuê ƀiă leh anăn Čư̆ čhiăng, hlăm anăn mâo 54 hdră êlan klă anăp kơ mnuih ƀuôn sang jing mnuih djuê ƀiă, krĭng mnuih djuê ƀiă leh anăn čư̆ čhiăng, 64 hdră êlan mbĭt kơ mnuih ƀuôn sang jing mnuih djuê ƀiă. Lu hdră êlan msĕ si hdră 135, hdră ala čar kñăm kơ bruă mđĭ kyar bruă duh mkra ala ƀuôn krĭng mnuih ƀuôn sang mnuih djuê ƀiă leh anăn Čư̆ čhiăng, bi hrŏ ƀun hŏng klei kjăp, mkŏ mkra krĭng ƀuôn sang mrâo, ăt msĕ hŏng dŭm hdră kñăm kơ bruă mdrao mgŭn, dhar kreh, hdră đru kơ sang dôk, lăn dôk, lăn mă bruă, êa jua, brei čan prăk mnga hdjul, mtô mjuăt bruă mă, mgaih msir bruă mă… đru brei masin mă bruă, hbâo pruê, ana mjeh, mnơ̆ng rông, jao lăn, jao dliê, mtrŭt mđĭ bruă lŏ hma, dliê kmrơ̆ng dưi uêñ mĭn hluê ngă. Kyuanăn, bruă duh mkra ala ƀuôn krĭng mnuih ƀuôn sang mnuih djuê ƀiă leh anăn Čư̆ čhiăng mâo lu klei mlih jăk. Khua kiă kriê Dhar bruă djuê ana Hầu A Lềnh brei thâo: Bruă čung ba mnuih ƀuôn sang leh anăn hdră êlan djuê ana amâo djŏ mnơ̆ng bi hmô ôh, ƀiădah jing hdră mnêč ala čar, klei hdĭp mnuih ƀuôn sang, jing klei mnuih ƀuôn sang dôk uêñ mĭn, kyuanăn bruă klam mơ̆ng drei êjai ngă djăp mta bruă jing ngă kyua mnuih ƀuôn sang, anei jing bruă drei srăng ngă. Mbĭt anăn jing bruă klam tui duah bruă mă kơ diñu, tui duah klei găl brei kơ diñu mđĭ kyar čiăng hluê ngă tŭ dưn dŭm hdră êlan, bruă djuê ana hlăm wưng kơ anăp.

Truh kơ ară anei, kluôm ala mâo 225 anôk bruă gưl kdriêk hlăm 58 čar, ƀuôn prŏng gưl dlông mâo leh Khua knŭk kna tŭ yap bi leh bruă klam mkŏ mkra krĭng ƀuôn sang mrâo, mâo giăm 40% ênoh dŭm anôk bruă gưl kdriêk hlăm kluôm ala. Krĭng mnuih ƀuôn sang mnuih djuê ƀiă leh anăn Čư̆ čhiăng mâo leh 1.052 să, (mâo 22,3%) dưi tŭ yap jing krĭng ƀuôn sang mrâo, hlăm anăn mâo 106 să mơ̆ng să dleh dlan dưi kpưn đĭ jing să Krĭng ƀuôn sang mrâo, mâo 27 kdriêk krĭng mnuih ƀuôn sang mnuih djuê ƀiă leh anăn Čư̆ čhiăng (mâo 6%) mâo ênŭm hnơ̆ng čoh čuăn krĭng ƀuôn sang mrâo. Grăp thŭn, hnơ̆ng gŏ sang ƀun ƀin krĭng mnuih djuê ƀiă leh anăn Čư̆ čhiăng hrŏ mơ̆ng 2-3%, dŭm să, alŭ, ƀuôn dleh dlan hrŏ mơ̆ng 3-4%, dŭm kdriêk hrŏ mơ̆ng 4-5%, mâo anôk hrŏ truh kơ 5%. Hnơ̆ng gŏ sang ƀun ƀin, giăm ƀun ƀin kluôm krĭng hrŏ 1,25, mâo leh 22 kdriêk, 125 să, giăm 1.300 alŭ wăl dưi tlaih mơ̆ng klei knap mñai.

Sa hlăm dŭm alŭ wăl mâo klei mlih ktang jing čar Sóc Trăng. Hluê si Phan Thanh Nhã, ti să Vĩnh Tân (wăl krah Vĩnh Châu), dŭm hdră êlan djuê ana msĕ si Hdră mặt trận čar kwar kơ bruă bi hrŏ ƀun, kơ bruă mkŏ mkra krĭng ƀuôn sang mrâo dưi bi mlih klei jing krĭng ƀuôn sang ti nei. Bruă sang čư êa dŭm gưl mâo nanao klei hur har pŏk phai lu klei bi hmô jăk, mâo boh tŭ dưn kñăm mđĭ klei thâo mkra mjiing, mnia mblei kơ dŭm gŏ sang ƀun ƀin, gŏ sang mnuih djuê ƀiă. Phan Thanh Nhã brei thâo: Dŭm anôk bruă mkŏ mkra krĭng ƀuôn sang, pui kmlă, êlan klông, sang hră mơar, sang mdrao mgŭn, dŭm bruă mkŏ mkra yang ƀuôn mâo nanao klei uêñ mĭn duh bi liê hlăm krĭng mnuih ƀuôn sang jing mnuih djuê ƀiă. Mnuih djuê ƀiă dưi mâo dŭm klei găl mđĭ kyar klei hdĭp mda gŏ sang, mơ̆ng anăn hnơ̆ng gŏ sang ƀun ƀin grăp thŭn ti alŭ wăl să mâo klei hrŏ nanao, hnư hrui wĭt kah knar grăp cô mâo klei đĭ sơăi.

Bruă mđĭ kyar klei mtô mjuăt bi hriăm, mđĭ hnơ̆ng tŭ jăk mnuih mă bruă jing mnuih djuê biă ăt mâo Đảng leh anăn knŭk kna uêñ mĭn. Ară anei, kluôm ala mâo 316 sang hră gưl 3 knŭk kna rông ba hđeh sang hră jing mnuih djuê ƀiă ti 49 čar, ƀuôn prŏng hŏng êbeh 109.000 čô hđeh sang hră, hdră mtô mjuăt bi hriăm, mtô bruă mă kơ mnuih djuê ƀiă dưl hluê ngă jăk. Wưng thŭn 2016 – 2020, mâo êbeh 800 êbâo čô mnuih ƀuôn sang jing mnuih djuê ƀiă dưi hriăm bruă, hlăm anăn mâo hlăm brô 412 êbâo čô mnuih mă bruă krĭng ƀuôn sang jing mnuih djuê ƀiă dưi mtô mjuăt bruă mă tĭ gŭ 3 mlan. Đào Trọng Độ, Khua kiă kriê anôk bruă mtô mjêñ jêñ, Anôk bruă mtô bruă mă (Phŭn bruă mnuih mă bruă kahan êka êkeh leh anăn yang ƀuôn) brei thâo, hŏng dŭm boh tŭ dưn dưi mâo, mta kñăm truh ti thŭn 2025, kluôm ala mâo 50% ênoh mnuih mă bruă jing mnuih djuê ƀiă dưi mtô mjuăt bruă mă:Hlăm mta 3, êlan 62 klei bhiăn mtô mjuăt bi hriăm mâo mta phung mniê mnuih djuê ƀiă leh anăn mnuih mă bruă krĭng ƀuôn sang êjai nao hlăm klei hriăm ti gŭ 3 mlan dưi mâo klei đru hluê si hdră bhiăn mơ̆ng Khua knŭk kna. Bi kơ klei mtô mjuăt gưl krah, gưl krah dưh ăt mâo dŭm mta tal êlâo hĭn kơ mnuih ƀuôn sang jing mnuih djuê ƀiă.

Mbĭt hŏng dŭm klei mlih mrâo, klei mlih jăk hlăm klei mđĭ kyar bruă duh mkra ala ƀuôn krĭng mnuih djuê ƀiă leh anăn krĭng čư̆ čhiăng, klei hdĭp mnuih ƀuôn sang dưi ƀuh klă bi mlih mrâo. Dŭm hdră dhar kreh dưi mđĭ kyar, kdrăp yua, mnơ̆ng kriê pioh krĭng mnuih djuê ƀiă dưi pah mni. Dŭm mta bruă mjĕ êrô dưi mkŏ mjing hnơ̆ng ala čar, hluh krĭng, đru kriê pioh leh anăn bi lar dŭm klei yuôm bhăn dhar kreh dŭm djuê ana. Sa hlăm dŭm klei anăn jing klei blŭ, boh hră mơ̆ng mnuih djuê ƀiă.