Djă pioh klei awa Hồ mtă, đảng viên K’Boer, Khua bruă đảng nah gŭ alŭ B’Dơr, să Lộc An, kdriêk Bảo Lâm, čar Lâm Đồng, dưi bi lar leh bruă klam nao êlâo, bi hmô, jhŏng mĭn, jhŏng ngă, jhŏng đua klam, đru mđĭ kyar ƀuôn sang leh anăn jing anôk mngač, alŭ ƀuôn sang bi hmô ti čar Lâm Đồng.

Mŭt Đảng mơ̆ng hlăk 26 thŭn, ngă khua bruă Đảng ƀuôn mơ̆ng hlăk 30 thŭn lehanăn mơ̆ng anăn truh kơ ară anei, K’Boer khua bruă Đảng ƀuôn B’Dơr, să Lộc An, kdriêk Bảo Lâm (Lâm Đồng) ăt jĕ giăm hŏng mnuih ƀuôn sang. Ñu mbĭt hŏng phung dĭng kna hlăm êpul bruă Đảng ƀuôn sang jih ai tiê bi mlih hdră duh ƀơ̆ng mnơ̆ng pla mjing mnơ̆ng rông bi djŏ hŏng klei čiăng mđĭ kyar klei hdĭ mda ala ƀuôn.

Tui si K’Đèo, sa čô mnuih mâo khưm hlăm ƀuôn B’Dơr, truh kơ ară anei klei hdĭp dhar kreh mnuih ƀuôn sang hlăm ƀuôn mâo leh klei đĭ kyar jăk. Jih jang klei bhiăn ƀuôn, klei bhiăn mkŏ mjing klei hdĭp mrâo, alŭ wăl anôk hdĭp mda bi hmô, mâo leh mnuih ƀuôn sang sa ai tui hlue. K’Đèo lač mâo klei bi mlih anei hlăm ƀuôn sang kyua mâo ai tiê đru ba mơ̆ng K’Boer - khua bruă Đảng ƀuôn:

           “Ƀuh klei mngač mơ̆ng klei đĭ kyar ƀuôn sang hơ̆k mơak snăk. Kyua mâo klei mđing uêñ mơ̆ng gưl să, boh nik khua bruă Đảng K’Boer, phung mda asei msĕ snăn mâo leh ai tiê jăk msĕ djiuê anăn... Hmei tŭ ư êdi”.

Hŏng phung đảng viên hlăm êpul bruă Đản ƀuôn, K’Boer jing khua bruă Đảng hur har êdi hlăm bruă knuă, lehanăn mâo nanao klei mĭn mrâo jăk snăk. Ka Thủy, sa čô đảng viên hlăm êpul bruă Đảng brei thâo K’Boer kreh lŏ jak iêo phung knuă druh hlăm ƀuôn, phung khua mduôn, mnuih mâo kơhưm hlăm ƀuôn čiăng bi trông kơ hdră êlan, kñăm mâo hdră êlan jăk hĭn, mă bruă ba wĭt klei tŭ dưn jăk klă. Msĕ si, bi yăl dliê kơ bruă mtrŭt mjhar mnuih ƀuôn sang myơr lăn ala, đru mguôp hrue ai, prăk kăk hrăm mbĭt hŏng knŭk kna mkra bi leh truh êbeh 20km êlan hlăm ƀuôn, lehanăn êbeh 15 km êlan hlăm lŏ hma:

 “Khua bruă Đảng K’Boer jing sa čô đảng viên ba akŏ nanao, ñu yơh jing mnuih ktrâo atăt mnuih ƀuôn sang lŏ hâo hưn mtô mblang, mđĭ ai mnuih ƀuôn sang thâo săng. Mâo nanao klei đru mguôp yuôm bhăn mkŏ mjing ba bruă Đảng đĭ kyar”.

       Ƀuôn B’Dơr mâo êbeh 98% jing mnuih djuê ana K’Ho. Elâo dih êngao kơ bruă lŏ hma, dôk buh pla tui si klei bhiăn hđăp, snăn klei hdĭp dôk lĕ hlăm klei dleh dlan knap mñai. Ară anei hŏưng klei mĭn mrâo, mnuih ƀuôn sang mâo leh klei bi mlih, duh mkra pla mjing čăt đĭ, hŏng mjeh čê, kphê, leh anăn thâo pla pluă kphê boh ƀơr, boh durian... Mơ̆ng anăn mâo ba wĭt đĭ hĭn leh hlăm sa ênhă lăn pla mjing kah knar truh êbeh 150 êklăk prăk/ha/thŭn, hnơ̆ng ênoh gŏ êsei ƀun mơ̆ng 30% ară anei knŏng adôk kgŭ 2%.

          Tui si Trịnh Thị Vân, K’iăng khua bruă Đảng să Lộc An, K’Boer jing khua bruă Đảng thâo ba anăp hlăm klei tui hriăm lehanăn hlue ngă knhuah mngač Hồ Chí Minh, mâo nanao hlăm klei bi hmô kơ klei thâo bi mguôp, ba akŏ hlăm klei bi leh jih jang bruă jao.

           “K’Boer jing leh khua hlăm êpul bruă Đảng, jing pô kiă kriê bruă Đảng ƀuôn B’Dơr, jing sa cô mnuih hur har êdi, jhŏng mĭn, jhŏng ngă, jhŏng blŭ lehanăn jhŏng đua klam bruă knuă. Hŏng ai tiê bi êdah jing pô kiă kriê, đru mnuih ƀuôn sang hlăm ƀuôn hlue gưt jăk hdră êlan mơ̆ng Đảng knŭk kna, lehanăn dŭm mta mtrŭn mơ̆ng alŭ wăl. Hdĭp jăk đăo djŏ”.

          Ƀuôn B’Dơr ară anei mâo giăm 500 hộ, êbeh 2.000 čô mnuih. Mnuih ƀuôn sang hlăm ƀuôn hlue ngă jăk jih jang hdră êlan mơ̆ng Đảng, knŭk kna, jhŏng mđĭ kyar bruă duh mkra mrâo, hrăm mbĭt bi mkŏ mkra ƀuôn sang mrâo. Thŭn 2021, ƀuôn B’Dơr mâo tŭ yap jing alŭ wăl mnuih ƀuôn sang dôk ba anăp ti să Lộc An lehanăn jing ƀuôn ba anăp hŏng lu klei bi hmô jăk, bruă ngă tŭ jing mơ̆ng êpul lehanăn mdê bi mnuih.

 K’Boer, khua bruă Đảng ƀuôn B’Dơr brei thâo, hŏng bruă klam kơ pô, ñu srăng lŏ dơ̆ng bi ktưn lu hĭn, mjuăt bi hriăm hĭn, pioh duh myơr hĭn, đru mđĭ kyar ƀuôn sang pô.

          “Hmei mđing hĭn êdi kơ bruă duh mkra, si srăng ngă čiăng ngă bi hrŏ hnơ̆ng ênoh gŏ êsei ƀun, mđĭ hĭn gŏ êsei mdrŏng. Klei anăn hmei bi mkŏ mjing dŭm hdră êlan kjăp hĭn, bi djŏ hŏng boh sĭt klei čiăng mđĭ kyar hlăm alŭ wăl”.

          Hŏng klei gĭr hlăm bruă mkŏ mjing bruă kđĭ čar nah gŭ, đru mguôp jih ai tiê kơ klei mđĭ kyar hlăm yang ƀuôn, K’Boer tuôm mâo leh lu thŭn tŭ mă klei pah mni   mơ̆ng anôk bruă kiă kriê lăn dap kngư kơ boh tŭ dưn hlăm bruă mkŏ mjing Đảng. K’Boer lŏ mâo klei khua knơ̆ng bruă sang čư̆ êa čar Lâm Đồng mđup brei klei pah mni kyua mâo bruă tŭ dưn hlăm klei hriăm lehanăn hlue ngă knhuah mngač Hồ Chí Minh wưng thŭn 2016 - 2022./.