Čar Lâm Đồng leh bi mŭt mbĭt mâo 5 să knông lăn mâo Quảng Trực, Tuy Đức, Thuận Hạnh, Thuận An leh anăn Dak Wil, bi knông hŏng Campuchia. 3 bĭt sang hră Knŭk kna rông ba dưi rŭ mdơ̆ng ti dŭm să Dak Wil, Thuận Hạnh leh anăn Tuy Đức mâo ênoh duh bi liê hlăm brô 675 êklai prăk. Hnơ̆ng rŭ mdơ̆ng bruă mkŏ mkra gưl 3, hŏng dŭm sang lu tal mơ̆ng 1 truh kơ 3 tal. Mmông rŭ mdơ̆ng mơ̆ng mlan 3/2026 - 8/2027. Leh bi leh, dŭm sang hră srăng drông hlăm brô 4.150 čô hđeh sang hră mơ̆ng gưl 1 truh kơ gưl 2 jing anak čô mnuih djuê ƀiă nao hriăm.

Ti să Dak Wil, Hồ Văn Mười, khua Bruă sang čư̆ êa čar Lâm Đồng mñă kơ phung duh bi liê, phung ngă bruă rơ̆ng djŏ hŏng hdră kčah, dŭm knơ̆ng, dhar bruă dăp phung nai, mbĭt anăn alŭ wăl čih hră anăn phung hđeh sang hră. Hồ Văn Mười, mñă ktang.

“Mñă kơ phung duh bi liê, phung ngă bruă srăng bi mguôp kjăp, čih mkra hdră, si srăng ngă čiăng rơ̆ng djŏ hdră kčah leh anăn hnơ̆ng jăk bruă mkŏ mkra jing mrô 1. Bi hŏng knơ̆ng bruă sang hră mơar, srăng tĭng mkă kluôm rơ̆ng mâo djăp phung nai mtô, dŭm mta kdrăp mnơ̆ng yua leh anăn hriăm dưi mâo djăp, amâodah hriăm mjuăt asei mlei. drei srăng ngă anei jing anôk bruă sang hră djăp ênoh čuăn.”

Dak Wil dưi bi mŭt mbĭt mơ̆ng să Ea Pô leh anăn Dak Wil (ti kriêk Cư̆ Jŭt, čar Dak Nông hđăp). Bruă Đảng, Knŭk kna uêñ mĭn duh bi liê bruă sang hră mơar srăng đru mđĭ klei thâo mnuih ƀuôn sang, đru mđĭ kyar bruă duh mkra ala ƀuôn. Boh nik hŏng phung hđeh sang hră, sang hră Knŭk kna rông ba mlir gưl hriăm jing klei hmăng hmưi, anôk digơ̆ dưi hdĭp, hriăm leh anăn đĭ kyar kluôm dhuôm. Adei Nguyễn Trần Gia Linh, hriăm adŭ 5, jing sa hlăm 10 čô hđeh sang hră dleh dlan hriăm thâo mơ̆ng să Dak Wil, dưi mâo mă klei đru hriăm hră ƀri wưng mphŭn pŏk hdră rŭ mdơ̆ng sang hră Knŭk kna rông ba mlir gưl hriăm ti să Dak Wil, čar Lâm Đồng, bi êdah:

“Hruê anei kâo ktưn hưn leh anăn hơ̆k mơak kyua mâo hnư mnơ̆ng leh anăn klei đru hriăm hră. Thŭn êdei mŭt adŭ 6, kâo srăng dưi hriăm ti sang hră siam, mâo djăp mta. Sang hră mâo anôk huă ƀơ̆ng, mdei, hriăm hră, klă sĭt jing wăl anôk jăk êdi hŏng hmei. Kâo ƀuăn srăng gĭr hriăm, mjuăt pô bi jăk čiăng êdei dih jing sa čô nai, amâo mâo bi ênguôt amĭ ama, phung awa khua gĭt gai Đảng, Knŭk kna uêñ mĭn leh kơ hmei”.

Ti să Ea Êbŭng, čar Dak Lak ngă hdră mphŭn rŭ mdơ̆ng sang hră Knŭk kna rông ba mlir gưl hriăm gưl 1 leh anăn gưl 2. Hdră mâo ênoh duh bi liê hlăm brô 250 êklai prăk mơ̆ng ngăn prăk gưl dlông leh anăn alŭ wăl, rŭ mdơ̆ng ti ênhă êbeh 6ha ti alŭ 1. Êjai bi leh, sang hră anei jing anôk hriăm, hdĭp kơ êbeh 1.300 čô hđeh sang hră jing anak čô mnuih djuê ƀiă ti alŭ wăl knông lăn. Phạm Thủy Tiên Khua Êpul gơ̆ng bruă ƀuôn sang să Ea Êbŭng brei thâo, să dưi mkŏ mjing hŏng klei bi mŭt mơ̆ng Ea Êbŭng leh anăn Ya Tờ Mốt, alŭ wăl prŏng, mnuih ƀuôn sang ƀiă, klei êrô êbat nao sang hră mơ̆ng phung hđeh sang hră, boh nik jing yan hjan adôk mâo lu klei dleh dlan. Bruă duh bi liê kơ sang hră Knŭk kna rông ba mlir gưl hriăm dưi hmăng hmưi mkŏ mjing klei bi mlih hlăm bruă mđĭ hnơ̆ng jăk bruă sang hră mơar krĭng knông lăn.

“Hdră êlan mơ̆ng Đảng leh anăn Knŭk kna duh bi liê kơ êa Êbŭng sang hră anei mnuih ƀuôn sang hơ̆k mơak êdi. Dưi mâo sang hră tal êlâo phung anak čô dưi hriăm leh anăn klei êrô êbat kriê dlăng diñu dưi jăk hĭn. Hmei đăo knang phung anak čô krĭng knông lăn anei hlăm wưng kơ anăp dưi kriê dlăng, mtô mjuăt čiăng mđing truh kơ êdei anăp krĭng knông lăn mơ̆ng lăn čar srăng hơĭt kjăp hĭn.”

Quảng Ngãi jing sa hlăm 17 alŭ wăl knông lăn hlăm kluôm ala hrăm mbĭt ngă hdră mphŭn rŭ mdơ̆ng sang hră. 5 bĭt sang hră Knŭk kna rông ba mlir gưl hriăm gưl 1 leh anăn gưl 2 dưi mphŭn rŭ mdơ̆ng aguah anei ti dŭm să Bờ Y, Ia Tơi, Ia Đal, Đăk Long leh anăn Đăk Plô, tỉnh Quảng Ngãi, ênoh duh bi liê êbeh 1.116 êklai prăk. Grăp sang hră dưi rŭ mdơ̆ng ti ênhă hlăm brô 5ha, hŏng hnơ̆ng mơ̆ng 700 - 1600 čô hđeh sang hră, găp guôp hŏng boh sĭt grăp alŭ wăl. Dŭm hdră dưi ngă hŏng klei bi hmô sang hră Knŭk kna rông ba mlir gưl hriăm gưl 1 leh anăn gưl 2, nao mbĭt hŏng lŏ wĭt mkŏ dăp dŭm sang hră, bi hrŏ dŭm anôk hriăm điêt, mkŏ mjing dŭm sang hră bi kƀĭn. Aduôn Y Ngọc, k’iăng khua Bruă sang čư̆ êa čar Quảng Ngãi brei thâo, bruă rŭ mdơ̆ng dŭm sang hră anei srăng đru mđĭ hnơ̆ng jăk bruă sang hră mơar ti krĭng knông lăn.

“Leh rŭ mdơ̆ng leh anăn ngă bruă, sang hră Knŭk kna rông ba mlir gưl hriăm gưl 1 leh anăn gưl 2 să Bờ Y leh anăn dŭm să bi rŭ mdơ̆ng hruê anei srăng jing sa hlăm dŭm anôk mtô mjuăt bi hmô, anôk rông ba klei hmăng hmưi hriăm leh anăn duh myơr mơ̆ng phung mda asei krĭng knông lăn, đru mtô mjuăt ai dưi kơ klei đĭ kyar alŭ wăl leh anăn čar pô”.