Dŭm hruê knhal jih thŭn, mnuih ƀuôn sang alŭ Chiềng leh anăn Đừng Nhạp, să knông lăn Ia Lôp, kdriêk Ea Sŭp, čar Dak Lak mâo klei hơ̆k mơak êdi kyua sĭt truh kơ 6 mmông mmăt, ti ktuê êlan dơ̆ng mâo lĭng kahan knông lăn dưm brei ăng pul mtrang mngač hlăm kluôm alŭ, ƀuôn. Lang Văn Tuyển, Khua alŭ Chiềng brei thâo, klei ngač mơ̆ng ăng pul pui dưi suôt leh klei mmăt, mnuih mă bruă wĭt kơ sang thâo ƀuh klă êlan sang pô. Hrô kơnăn, mâo pui mngač hlăm êlan, mnuih ƀuôn sang kbiă hiu hlăm mlam mmăt, mâo klei blŭ tlao, bi mbŏ klei khăp alŭ ƀuôn, klei êrô êbat ăt êđăp ênang hĭn:

            “Mâo klei mngač hlăm dŭm bĭt êlan dơ̆ng dưi bi hrŏ klei bi drăm êdeh êdâo, êlan dơ̆ng anei mkra mơ̆ng sui leh, kyuanăn êlan ăt jhat leh mơh, ară anei mâo pui mtrang mngač msĕ sơnei mâo klei jăk găl êdi. Tal 2 jing dưi rơ̆ng klei êđăp ênang. Bruă anei mâo boh tŭ dưn prŏng kơ mnuih ƀuôn sang leh anăn mnuih ƀuôn sang hmăng hmưi êdi.”

Thiếu tá Vũ Văn Dương, pô ngă bruă kđi čar, k’iăng khua kiă kriê kđông kahan knông lăn Ea Hleo brei thâo, hdră “Kuič mngač krĭng knông lăn” ti alŭ Chiềng leh anăn alŭ Đừng Nhạp jing hdră mkŏ mkra tal 4 mơ̆ng kdông kahan knông lăn Ea H’Leo mkŏ mjing ti alŭ wăl să Ia Lôp. Grăp anôk dưm pui gơ̆ng hŏng msei leh anăn dŭm boh ăng pul 200W, êran hŏng pil yang hruê, dưi mka mjing mâo mmông čŏng pŏk mngač. Ară anei anôk bruă dôk iêo mthưr dŭm knơ̆ng bruă, phung mâo ai tiê kmah bi mkrum mguôp mkŏ mjing thiăm dŭm hdră kuič mngač krĭng knông lăn, đru mđĭ kyar bruă duh mkra ala ƀuôn, rơ̆ng klei êđăp ênang hlăm alŭ wăl.

“Hlăm wưng kơ anăp, anôk bruă lŏ hluê ngă klei gĭt gai mơ̆ng bruă Đảng, knơ̆ng gĭt gai lĭng kahan knông lăn čar ăt srăng bi mguôp hŏng dŭm phŭn, dhar bruă, alŭ wăl iêo mthưr dŭm êpul êya, phung đru mguôp čiăng mâo lu hĭn dŭm hdră kuič mngač krĭng knông lăn. Kyuadah êlan klông ti alŭ wăl ƀrư̆ hruê ƀrư̆ jhat, čiăng rơ̆ng klei êđăp ênang, hmei srăng bi mguôp mkŏ mjing hdră kuič mngač krĭng knông lăn.”

Mbĭt hŏng lĭng kahan knông lăn čar Dak lak hlăm bruă mkŏ mjing hdră kuič mngač krĭng knông lăn, hlăm wưng êgao, ăt mâo lu êpul êya, grăp čô leh anăn dŭm êpul bruă. Amai Bùi Thị Nữ pô bi ala êpul hgŭm bruă NDG, mơ̆ng ƀuôn prŏng Hồ Chí Minh hriê ti să Ia Lôp brei thâo, ƀuh klei suăi êmăn mơ̆ng mnuih ƀuôn sang leh anăn phung knuă druh, lĭng kahan, êpul dôk ngă bruă iêo mkrum čiăng đru kơ dŭm hdră yuôm bhăn.

“Kâo ƀuh lĭng kahan răng mgang knông lăn jăk êdi leh anăn diñu hrăm mbĭt nanao hŏng mnuih ƀuôn sang. Mnuih ƀuôn sang krĭng knông lăn jing dleh dlan êdi, digơ̆ hdĭp ti krĭng dleh dlan amâo mâo myun msĕ hŏng pô ti ƀuôn prŏng ôh, kyuanăn hmei ruah krĭng knông lăn čiăng đru sa kdrêč kơ mnuih ƀuôn sang. Leh anăn êpul hmei bi mguôp hŏng Lĭng kahan knông lăn kyua diñu mâo klei hur har. Êngao kơ hdră kuič mngač krĭng knông lăn, srăng lŏ mâo lu hdră mkăn, êpul hmei ăt srăng dăp mmông čiăng nao ksiêm dlăng”.

Leh 3 thŭn hluê ngă hdră “kuič mngač krĭng knông lăn” truh kơ anei, Lĭng kahan răng mgang knông lăn čar Dak Lak dưi mkŏ mjing leh 10 hdră dưm ăng pul pui kơ dŭm alŭ, ƀuôn ti 4 să knông lăn mơ̆ng 2 kdriêk Ea Sŭp leh anăn Ƀuôn Đon, hŏng ênoh dŭm êtuh êklăk prăk. Đại tá Đỗ Quang Thấm, k’iăng khua bruă kđi čar Lĭng kahan knông lăn čar Dak Lak brei thâo, hdră anei dôk mâo klei bi lar ktang, mbĭt hŏng dŭm hdră ngă bruă mơ̆ng phung lĭng kahan ao mtah, lŏ mâo lu êpul êya, grăp čô dôk đru mguôp ba dŭm hdră mtrang mngač êlan klông truh ti dŭm alŭ, ƀuôn. Dŭm hdră anei dôk bi mlih klei jing alŭ ƀuôn, krĭng ƀuôn sang ti alŭ wăl knông lăn. Hluê anăn đru kơ bruă kriê dlăng, răng mgang klei kiă kriê ala čar, klei êđăp ênang krĭng knông lăn.

“Hluê ngă hdră mkŏ mkra krĭng ƀuôn sang mrâo, hmei bi mguôp hŏng alŭ wăl ngă klei bi hmô kuič mngač krĭng knông lăn. Ară anei, hmei dôk hluê ngă dŭm klei bi hmô ti dŭm să knông lăn, đru mguôp hluê ngă jăk dŭm hnơ̆ng čoh čuăn mkŏ mkra krĭng ƀuôn sang mrâo. Hluê anăn, dưi ngă jăk bruă mtrŭt mjhar, hâo hưn kơ mnuih ƀuôn sang ngă jăk hdră mtrŭn, hdră êlan mơ̆ng Đảng, klei bhiăn ala čar, boh nik jing bi lar bruă klam mơ̆ng mnuih ƀuôn sang hŏng bruă mkŏ mjing, kriê dlăng, răng mgang klei dưi kiă kriê, klei êđăp ênang krĭng knông lăn ala čar”.

            Dŭm hdră kuič mngač krĭng knông lăn mơ̆ng lĭng kahan răng mgang knông lăn dôk ba klei hơ̆k mơak kơ mnuih ƀuôn sang krĭng knông lăn čar Dak Lak. Amâo djŏ knŏng đru kơ krĭng ƀuôn sang mâo klei mlih jăk, dŭm hdră anăn lŏ đru kơ klei bi mguôp lĭng kahan, mnuih ƀuôn sang ƀrư̆ hruê ƀrư kjăp, bruă kriê dlăng, răng mgang knông lăn ƀrư̆ hruê ƀrư̆ tŭ dưn hĭn.