Ktuê êlan anei dưi mbha 3 ênoh rŭ mkra; hlăk čar Khánh Hòa ngă pô duh bi liê 32 km, prăk bi liê 5.632 êklai prăk, ênoh mrô 1; Phŭn bruă êlan klông dŭ mdiăng ngă pô bi liê 37,5 km, ênoh bi liê 9.818 êklai prăk, mrô 2; adôk jing čar Dak Lak ngă pô bi liê (mrô 3). Wăt tơdah hdră bruă dưi rŭ mkra hlăm krah mlan 6/2023, ƀiădah truh ară anei ktuê êlan ăt ka mâo anôk rŭ mkra, bruă ruh mgaih anôk ala dôk tuôm hŏng lu klei dleh dlan, ngă gun kpăk brei ruh mgaih.

Êlan dơ̆ng pral Khánh Hòa – Ƀuôn Ama Thuôt găn kdriêk Mdrak truh 17 km, mâo knơ̆ng bruă sang čư̆ êa čar Khánh Hòa jing pô duh bi liê. Hŏng ênhă anôk srăng ruh mgaih kluôm klông čiăng rŭ mkra êlan jing 127,1 ha mơ̆ng 143 gŏ êsei mnuih ƀuôn sang. Hlăm anăn mâo dŭm mta lăn dôk hlăm ênoh ruh mgaih, kñăm bi čiu hnô jing dŭm đang dliê ana kyâo akasi, lăn dôk hlăm 3 mta dliê, lehanăn lăn pla mjing. Nguyễn Đức Thảo – k’iăng khua knơ̆ng bruă sang čư̆ êa kdriêk Mdrak hưn, hlăm wưng anei, bruă ruh mgaih anôk ala knŏng mrâo ngă bruă bi mlih klei čuăl mkă, mkŏ mjing klei bhiăn djă yua lăn, anăp êlan, kdrŭn tuh mnơ̆ng pioh mkra êlan, anôk mkăm djah, bi leh bruă mkă tĭng, lehanăn bi mlih hla kak anôk ala, bruă ksiêm mnơ̆ng dhơ̆ng phŭn kyâo, mnơ̆ng pla mơ̆ng dŭm pô djŏ tuôm, êpul bruă djŏ hlăm klông anôk pioh mkra êlan. Ară anei kdriêk ăt ka ba jao mơh jih jang dŭm ênhă leh mâo hrui wĭt kơ êpul mkra êlan. Nguyễn Đức Thảo lač kơ klei ruh mgaih anôk ala pioh mkra êlan:

         “Hdră kčah jing ti hrue 30/6 bi jao truh 70% anôk ala leh mâo hrui wĭt, siămdah truh ti wưng anei bruă ba jao anôk ala ka dưi djŏ ôh hŏng hdră kčah. Ară anei kdriêk hlăk dôk mkŏ mjing hdră ngă bruă, hưn bi êdah klă jih jang bruă hâo mdah truh hŏng dŭm êpul bruă, mnuih mâo ênhă hmăi djŏ hlăm klei čiu hnô ruh mgaih anôk ala”.

        Trương Thanh Tâm – K’iăng khua anôk bruă kiă kriê lăn ala kdriêk Mdrak lač, mta phŭn ngă êmưt klei ruh mgaih anôk ala pioh mkra êlan dơ̆ng pral găn kdriêk jing dôk gun kpăk hŏng mta mtrŭn mrô 10/2023 mơ̆ng knơ̆ng bruă sang čư̆ êa čar Daklak. Klei mklă mklơ̆ng anăn bi êdah, dliê pla ti lăn dliê mơ̆ng mnuih ƀuôn sang dlăng kriê, snăn hrui bi tĭng djŏ ênoh hlăm klei bi mđăo ênoh. Bruă čoh čuăn ênoh čiu hnô knŏng mrâo ngă hlăm hrue 30/6, ară anei ka mâo ôh klei ktrâo atăt klă čoh čuăn phŭn agha mta lăn mơ̆ng grăp čô, êpul bruă... Čiăng pral kơ bruă ruh mgaih anôk ala, Tâm lač, knơ̆ng bruă sang čư̆ êa čar Daklak ngă bi pral bruă bi mlih klei bhiăn ngă bruă čiăng bi djŏ guôp. Ñu lŏ brei thâo:

         “Kdriêk mâo leh klei akâo kơ čar bi mlih hĕ klei mklă mtrŭn mrô 10 hlue hŏng hdră êlan leh čiu hnô anôk ala kơ mnuih ƀuôn sang bi năng hŏng ya bruă digơ̆ ngă leh hŏng dliê kyâo hlăm klei bi ktưn mđĭ ênoh. Ênoh čiu hnô knŏng tĭng hlue ênoh bi liê kơ bruă mjut mjing dliê, amâo mâo tĭng ôh kơ ênoh srăng mâo mơ̆ng dliê anăn. Ktrâo atăt bi klă mngač, hdră ngă bruă, thâo bĭt nik phŭn agha klei djă yua lăn pioh mjing knơ̆ng kơ bruă čiu hnô kơ mnuih ƀuôn sang, mjing knơ̆ng kơ bruă ruh mgaih anôk ala”.

        Ti kdriêk Ea Kar, bruă mkra êlan dơ̆ng pral Khánh Hòa - Ƀuôn Ama Thuôt găn djŏ mâo boh taih êbeh 13,5 km. Kdrêč êlan anei dôk hlăm kdrêč bruă mrô 2, mrô 3. Hŏng anôk djŏ čiăng ruh mgaih anôk ala jing 104,4 ha. Truh ti wưng anei, bruă ksiêm yap ênŭm leh 100% hdră kčah, mâo bi mklă lehanăn hrui wĭt truh 13 hdră čiu hnô kơ 69,2 ha, mâo jao leh anôk ala truh 50,2 ha lehanăn djăp 48%, mkă hŏng hdră kčah ăt adôk êmưt hlăm klei ngă bruă. Chu Vĩnh Cường – Khua kiă kriê lăn ala kdriêk Ea Kar lač: 

 “Tal sa, hŏng bruă čiu hnô ruh mgaih anôk ala hmei mtă kơ knơ̆ng bruă sang čư̆ êa čar pral bi mklă ênoh mrâo klei kơ lăn ala, tui si Êpul gơ̆ng bruă bi mklă hlăm dŭm bruă čiu hnô. Tal dua, akâo kơ čar pral ksiêm dlăng mnuih dưi dưn mơ̆ng kyâo dliê digơ̆ pla, leh mâo tŭ mă ênoh čiu hnô. Mtrŭt mnuih ƀuôn sang leh mâo tŭ mă ênoh čiu hnô snăn pral jao yơh lăn anăn pioh kơ pô duh bi liê pral dưi mkra êlan”.

Jih jang klei dleh dlan gun păk ƀuh jing msĕ sơăi dôk ti klei mklă mtrŭn mrô 10/2023 mơ̆ng knơ̆ng bruă sang čư̆ êa čar Daklak, bruă čoh čuăn ênoh lăn čiu hnô anôk ala lĕ hlăm klei êmưt, jing ka mâo ôh klei ktrâo atăt klă mngač kñăm bi kčah hrue mlan, tui duah phŭn agha klei djă yua lăn, đru kơ dŭm mta ana tŭ yuôm... Bruă bi mlih klei mklă mtrŭn, ruh mgaih klei gun kpăk bi hlue ngă hŏng klei pral, čiăng kơ jih jang bruă ruh mgaih anôk ala pral mâo anôk pioh kơ bruă mkra êlan./.