Klei čiăng đru braih mkuê̆ kơ dŭm gŏ êsei dôk pla dliê ti čar Kon Tum ka dưi mâo ngă ôh. Anei jing bruă mâo klei phung bi ala Êpul gơ̆ng bruă ƀuôn sang čar Kon Tum gưl XII mđing hlăm klei êmuh ti anôk bi kƀĭn tal 7 dôk mkŏ mjing ti ƀuôn prŏng Kon Tum. Pô bi ala Ka Ba Thành, Khua bruă Đảng kdriêk Tu Mơ Rông bi êdah klei amâo mâo ư ai ôh, kyuadah hdră êlan anei dôk hlăm hdră mơ̆ng lăn čar mđĭ kyar klei duh mkra ala ƀuôn krĭng mnuih djuê ƀiă, lehanăn krĭng čư̆ čhiăng, ară anei čar ka dưi ngă mơh:

“Klei bi đru anei jing hdră tĭng yap mơ̆ng thŭn 2021- 2025, ƀiădah ară anei giăm jih thŭn 2024 snăn êla srăng mâo klei dưi ngă bruă anei? Kâo hmăng hmưi dưi mâo klei gĭt gai jăk kơ bruă anei, kñăm mâo đru kơ mnuih ƀuôn sang dôk hlăm klei dleh dlan dưi dưn jih hdră êlan đu anei, kơ digơ̆ dưi mdul hlăm klei hdĭp”.

          Thŭn 2024 ênhă dliê pla ti Kon Tum tui si hdră jing êbeh 2.100 héc- ta lehanăn ênoh čiăng mâo braih đru kơ mnuih răng mgang dliê, pla dliê jing êbeh 1.000 tôn. Tui si Nguyễn Hữu Tháp, K’iăng khua knơ̆ng bruă sang čư̆ êa čar Kon Tum, mâo hĕ klei ka dưi ngă bruă anei jing dôk gun kpăk hŏng mta mtrŭn ti pruĕ mrô 22, hlăm hră mtrŭn mrô 12 hrue 20/9/2022 mơ̆ng phŭn bruă lŏ hma:

“klei gun kpăk anôk anei ară anei ka lŏ mâo ôh klei čoh čuăn klă kơ ênoh braih srăng pioh đru hlue ênhă, amâodah hlue ênoh mnuih, čiăng bi djŏ hŏng klei jing hlăm alŭ wăl. Ka mâo ôh mta mtrŭn kơ anôk bruă mâo klei dưi bi mklă kơ ênoh braih srăng mbha hlăm bruă răng mgang, lehanăn pla mjing dliê. Ka mâo ôh klei čoh čuăn hlei gưl mâo klei dưi bi mklă kơ ênoh braih ti alŭ wăl jing ti gưl čar, gưl kdriêk, lehanăn ya anôk bruă srăng bi êdah”.

 Djŏ tuôm hŏng jih jang klei gun kpăk mrâo lač, dưi thâo čar kontum mâo leh lu hră mơar hưn hŏng dŭm phŭn dhar bruă gưl dlông ktrâo atăt brei hdră ruh mgaih. Ƀiădah truh kơ ară anei, dŭm phŭn dhar bruă ăt ka mâo mơh klei ktrâo atăt klă, kyuanăn čar ka mâo mtam hdră êlan mbha braih kơ mnuih ƀuôn sang nao hlăm bruă pla mjing dliê. Lu klei blŭ mơ̆ng phung bi ala êpul gơ̆ng bruă ƀuôn sang čar Kon Tum lač, klei mâo leh yơh dŭm hdră êlan pioh đru, ƀiădah boh sĭt amâo mâo ƀuh ôh, klei anei ngă hmăi amâo mâo jăk prŏng êdi hŏng klei hdĭp mnuih ƀuôn sang ngă bruă pla kyâo dliê.

 Ăt hlăm klei bi kƀĭn Êpul gơ̆ng bruă ƀuôn sang čar Kon Tum, klei kơ dŭm gŏ êsei mnuih djuê ƀiă kƀah lăn dôk, lăn pla mjing hlăk jing leh bruă ktrŏ hlăm klei trông čhai. Mâo lu klei blŭ mơ̆ng phung bi ala lač, mâo klei bi kpleh jing prŏng êdi plah wah klei hâo mdah hŏng boh sĭt klei hdĭp mda mnuih ƀuôn sang. Tui si klei hâo mdah mơ̆ng knơ̆ng bruă sang čư̆ êa čar Kon Tum, tui si tĭng hlăm 6 mlan akŏ thŭn 2024, hnơ̆ng ênoh gŏ êsei mnuih djuê ƀiă hlăm čar mâo lăn dôk lehanăn lăn pla mjing djăp truh 99,3%. Ƀiădah tui si Phan Thị Thủy, Khua anôk bruă dhar kreh – yang ƀuôn ƀuh jing jih jang ênoh hâo mdah anăn amâo mâo sĭt ôh, amâo mâo djŏ ôh hŏng klei hdĭp mnuih ƀuôn sang:

“Boh sĭt klei dôk găn, hlăm sa boh sang mâo 2;3 gŏ êsei dôk hlăm anăn. Ăt knŏng jing huă ƀơ̆ng, dôk hlăp đuič, kyuadah amâo mâo lăn pla mjing ôh. Boh sĭt jing msĕ snăn yơh. Brei tĭng hĕ si srăng ngă, đăm ôh knŏng tui tiŏ hŏng ênoh hưn amâo mâo sĭt, jing sa klei dleh êdi”.

 Phung bi ala Êpul gơ̆ng bruă ƀuôn sang čar Kon Tum bi lač, bruă mghaih msir lăn pla mjing, lăn dôk kơ dŭm gŏ êsei mnuih djuê ƀiă, amâo mâo djŏ jing klei dưi đru kơ digơ̆ hơĭt klei hdĭp, ƀiădah lŏ mđĭ hĭn mơh klei mnuih ƀuôn sang đăo knang kơ klei Đảng, Knŭk kna kiă kriê, đru lŏ bi kjăp hĭn klei thâo bi mguôp jih jang djuê ana, răng mgang kjăp klei êđăp ênang bruă kđi čar, klei êđăp ênang yang ƀuôn hlăm krĭng mnuih djuê ƀiă, krĭng knông lăn. Kyuanăn yơh bruă hlue ngă dŭm hdră êlan anei jing brei mâo klei kăp ksiêm, djŏ hŏng boh sĭt klei dôk găn hlăm klei hdĭp.  Pô bi ala Xiêng Thanh Phúc hŏng klei amâo lŏ mdăp ôh lač, kâo amâo mâo đăo ôh ênoh anăn jing sĭt, kyuadah lač hĕ hlăm kluôm čar knŏng adôk mă giăm 1% ênoh gŏ êsei mnuih djuê ƀiă kƀah lăn dôk lehanăn lăn pla mjing:

“Kâo amâo mâo đăo ôh kơ ênoh anei jing sĭt. Tui si kâo ƀuh klei anei amâo mâo djŏ ôh. Boh sĭt drei ƀuh hlăm krĭng mnuih djuê ƀiă, amâo jăk lŏ mâo lăn pioh dôk ôh. Lehanăn lăn pla mjing kƀah snăk sơưn. Nĕ ti ƀuôn Nông Nội, jing ƀuôn yap jing mâo klei đĭ kyar hĭn hlăm să Đăk Nông tinăn lu snăk gŏ êsei mnuih ƀuôn sang dôk kƀah lăn dôk lehanăn lăn pla mjing. Brei drei mă bruă bi sĭt tui duah ênoh sĭt”.

Mơ̆ng dŭm dhar bruă djŏ tuôm čar Kontum bi êdah brei ƀuh, êbeh 20 thŭn êgao hlue ngă hdră êlan mơ̆ng Đảng, Knŭk kna čar mâo đru leh lăn dôk, lehanăn lăn pla mjing kơ êbeh 16.100 gŏ êsei mnuih djuê ƀiă. Ară anei, kluôm čar adôk giăm 3.900 gŏ êsei mnuih djuê ƀiă dôk kƀah lăn dôk lehanăn lăn pla mjing./.