Jao klei dưi kiă kriê dưi yap jing kliăng čiăng mđĭ hĭn klei tŭ dưn hlue ngă hdră bhiăn hlăm bruă lŏ hma, boh nik dŭm čar mâo hnơ̆ng prŏng bruă lŏ hma. Pô bi ala Phạm Văn Hòa, êpul mơ̆ng Đồng Tháp, lač klei jao klei dưi kơ alŭ wăl hlăm bruă kiă kriê bruă mkra mjing mnơ̆ng ƀơ̆ng kơ mnơ̆ng rông jing yuôm bhăn, đru bi hrŏ klei hdră êlan mă bruă ktrŏ, lehanăn mđĭ hĭn bruă klam:

“Kâo čang hmăng klei mbha gưl kơ alŭ wăl kiă kriê bruă hrui mă, lehanăn mkăp hră tŭ yap djăp ênŭm pioh mkra mjing mnơ̆ng ƀơ̆ng kơ mnơ̆ng rông, amâo lŏ guôn mơ̆ng phŭn bruă ôh. Jao kơ khua knơ̆ng bruă sang čư̆ êa gưl čar mâo klei dưi mkăp, hrui mă hră mơar, tơdah anôk bruă djăp klei găl snăn alŭ wăl jing pô đua klam phŭn.”

Siămdah, mbĭt hŏng bruă jao klei dưi, lu phung bi ala mñă, lŏ bi hyuă kjăp hĭn klei dưi kơ alŭ wăl nah gŭ, boh nik hŏng bruă mdrao mgŭn mnơ̆ng rông hlăm alŭ wăl, anôk hlăk dôk kƀah leh mâo bruă bi mŭt mbĭt, car bi hrŏ leh anôk mă bruă. Pô bi ala Chu Thị Hồng Thái, êpul mơ̆ng Lạng Sơn lač, klei dôk awăt hlăm bruă mdrao mgŭn mnơ̆ng rông, leh lu ƀuôn hgŭm amâo lŏ mâo ôh knuă druh kjăp hlăm bruă, êjai anăn tui si klei čih mkra bi lŏ jao thiăm bruă gang mkhư̆ klei ruă tưp kơ gưl ƀuôn hgŭm. Pô bi ala čang hmăng bi mâo mta mtrŭn klă mngač, lehanăn hŏng klei mgô̆ hlăm bruă dăp mnuih ngă bruă mdrao mgŭn ti đa đa alŭ wăl, kñăm dưi mă bruă hlăm klei gang mkhư̆ klei ruă tưp hlăm bruă rông mnơ̆ng:

Bi hŏng hdră bhiăn bruă mdrao mgŭn mnơ̆ng rông, kâo mâo klei akâo kơ dŭm anôk bruă čih mkra bi ksiêm duah hdră mkra dŭm mta mtrŭn hŏng dŭm alŭ wăl, mgô brei mâo mnuih ngă bruă mdrao mgŭn kơ mnơ̆ng rông. Hŏng dŭm mta mtrŭn anăn bi čih dăp hlăm klei bhiăn, snăn jih jang bruă klam bi mâo hŏng pô ngă bruă mdrao mgŭn mnơ̆ng rông, boh nik hlăm gưl ƀuôn hgŭm êlâo dih mâo, ƀiădah ară anei amâo lŏ mâo ôh. Snăn dôk hlăm ƀuôn hgŭm ară anei hlei pô klam ngă bruă anei?”

Boh sĭt brei ƀuh, bruă mdrao mgŭn mnơ̆ng rông dưi bi hmô msĕ si: “Knga, ală, lehanăn jing jơ̆ng” mơ̆ng dhar bruă rông mnơ̆ng, mdrao mgŭn mnơ̆ng rông, tơdah kƀah bruă anei sĭt nik srăng jing anôk kƀah hŏng bruă kăp ksiêm klei ruă tưp. Mơ̆ng anăn, bruă mbha gưl brei nao mđrĭng kơ bruă ktrâo atăt klă mngač kơ mnuih mă bruă, ênoh čuăn, lehanăn bruă klam mơ̆ng bruă sang čư̆ êa alŭ wăl.

Mbĭt hŏng anăn, pô bi ala Nguyễn Thị Sửu, Êpul mơ̆ng ƀuôn prŏng Huế brei thâo: Jao klei dưi bi kjăp kơ alŭ wăl brei bi djŏ hŏng klei bhiăn kiă kriê, čiăng rơ̆ng dưi mâo klei bi sa hnơ̆ng, amâo mâo lĕ hlăm klei mđĭ kđăl kơ klei dưi, boh nik hlăm bruă pla mjing, lehanăn bruă lŏ hma doh:

“leh bi mklin mbĭt dua phŭn bruă lŏ hma, lehanăn wăl hdĭp mda, drei bi sa hnơ̆ng hdră êlan mă bruă dơ̆ng mơ̆ng gưl dlông hlŏng kơ nah gŭ. Čang hmăng mâo mkŏ mjing Êpul kiă kriê gưl ala čar kơ bruă lŏ hma doh, mjing knơ̆ng kơ klei kiă kriê bi sa hdră, đăm ôh sa alŭ wăl ngă mdê mdê, huĭdah lĕ hĕ hlăm klei amâo mâo sa hnơ̆ng, lehanăn klei tŭ dưn amâo mâo prŏng ôh."”

Dŭm klei blŭ mơ̆ng phung bi ala brei ƀuh: bruă mbha gưl, brei nao mđrĭng hŏng bruă kăp ksiêm lehanăn klei đua klam prŏng. Tơdah alŭ wăl leh mâo klei dưi kiă kriê, nao mbĭt klei thâo mă bruă, jih jang hdră êlan ngă bruă dưi păn kjăp sa hnơ̆ng, lehanăn mâo klei bhiăn kăp ksiêm klă mngač čiăng kơ jih jang bruă mă bi tŭ jing, ba wĭt klă boh tŭ hlăm bruă./.