Dhar Bruă Kbĭn ala ksiêm dlăng, bi klă 2 hdră mtrŭn djŏ tuôm hŏng ngăn prăk leh anăn hdră êlan ksiêm dlăng Bruă hluê ngă dŭm hdră êlan, klei bhiăn lăn čar kơ bruă kriê dlăng, yua anôk mă bruă leh ngă klei mkŏ dăp anôk bruă Knŭk kna. Khua Bruă Kbĭn ala Trần Thanh Mẫn mñă ktang:

 “Anei jing klei čih ksiêm dlăng tal êlâo mơ̆ng Bruă Kbĭn ala gưl 16, kyuanăn, bruă mprăp srăng dưi ngă kjăp, djŏ hdră bhiăn leh anăn kreh knhâo mơ̆ng mphŭn. Boh nik, bruă ktuê dlăng anei srăng bi mguôp kjăp hŏng dŭm klei gĭt gai hdră êlan mơ̆ng gưl dlông kơ bruă gang mkhư̆ klei luč liê mang leh anăn klei amâo mâo jăk, boh nik jing hdră mtrŭn mrô 4 mơ̆ng gưl dlông. Ară anei, klei kiă kriê, ba yua anôk mă bruă leh ngă klei mkŏ dăp, anôk bruă Knŭk kna dôk dưi mâo mnuih ƀuôn sang, yang ƀuôn uêñ mĭn êdi”.

Brei klei blŭ kơ bruă swil mlan 5, Khua dhar bruă swil leh anăn ktuê dlăng klei hưn mơ̆ng Dhar Bruă Kbĭn ala mñă kơ Knŭk kna, Khua Knŭk kna gĭt gai dŭm Phŭn, dhar bruă leh anăn alŭ wăl mđĭ hĭn klei ksiêm dlăng hnơ̆ng jăk êa săng E10, mtrŭt mđĭ bruă hâo hưn čiăng mkŏ mjing klei sa ai hlăm klei ngă bruă, mđĭ hĭn klei ksiêm dlăng leh anăn bi mguôp kjăp hŏng Bruă sang čư̆ êa ƀuôn prŏng Hà Nội hlăm klei hluê ngă dŭm hdră êlan prŏng ti alŭ wăl. Hlăm anăn, čiăng mâo hdră êlan klă klơ̆ng čiăng hluê ngă dŭm hdră đru anôk dôk mrâo, krŭ wĭt čiăng bi hơĭt klei hdĭp leh anăn hdră duh ƀơ̆ng mnuih ƀuôn sang alŭ wăl hmăi mơ̆ng hdră. Bi kơ mta phŭn anei, Khua dhar bruă kreh knhâo mrâo mrang leh anăn wăl hdĭp mda Nguyễn Thanh Hải lač, klei hưn mdah čiăng bi mbŏ thiăm boh klei duah mplư giăm anei, anăn jing klei mlpư, mgô̆ phung khua thŭn, phung leh mdei brei siñê dŭm klei kuôl kă mdei msăn čiăng hưn brei răng kơ mnuih ƀuôn sang, mbĭt anăn mnnă kơ dŭm alŭ wăl srăng mâo hdră êlan msir boh klei anei:

 “Jih klei hdĭp digơ̆ mkiêt mkuôm, jing ba brei jih kơ knơ̆ng bruă duah mplư anei. Kyuanăn, hlăm klei hưn mdah ăt srăng ba mta phŭn anei jing mrâo leh anăn mjêč. Ăt mñă kơ anôk bruă djŏ tuôm bi klă ti alŭ wăl dŭm dă, čar, drei mâo klei kčŭt hưn mơ̆ leh anăn si drei kiă kriê, mgaih msir.

Uêñ mĭn kơ bruă sang hră mơar, khua dhar bruă dhar kreh, mtô bi hriăm Nguyễn Đắc Vinh brei thâo, êlâo duh hdră êlan Knŭk kna amâo mâo mă prăk hriăm kơ đa đa bruă msĕ si lĭng kahan, hriăm nai.

 “Đa đa mta bruă phŭn mâo mnuih ƀuôn sang ka thâo msĕ si pui kmlă hạt nhân dôk čiăng êdi, dŭm hdră êlan ka mâo ai iêo jak kyuanăn diñu ka mŭt - ƀiădah jing yuôm bhăn êdi, kyuanăn Knŭk kna srăng đru leh anăn klă klơ̆ng tinei jing lui hĕ prăk hriăm, anei jing boh klei čiăng hâo hưn brei mnuih ƀuôn sang thâo, mâo thiăm klei ruah kơ bruă bi hriăm, mâo klei hrŏng ruah găl guôp čiăng bi mbŏ ai dưi kơ lăn čar”.

 Blŭ hlăm hlăm klei kƀĭn,  Khua Bruă Kbĭn ala Trần Thanh Mẫn bi myuôm dhar bruă Swil leh anăn ktuê dlăng mâo lu klei mlih mrâo hlăm hdră hưn mdah, mbĭt anăn mñă grăp mlan, dhar bruă bi mguôp hŏng mặt trận čar kwar, anôk thâo klei čiăng, klei akâo mơ̆ng mnuih ƀuôn sang čiăng mđĭ hnơ̆ng jăk klei hưn mdah. Khua Bruă Kbĭn ala Trần Thanh Mẫn mñă klă:

 “Bruă čung ba mnuih ƀuôn sang êlam hĭn, amâo djŏ knŏng mdei hlăm bruă drông mnuih ƀuôn sang, msir hră mơar, mơĭt klei akâo. Ƀiădah kâo mñă bruă swil srăng jing anôk thâo hnưm ai tiê mnuih ƀuôn sang, jing klei hưn kơ hdră êlan, jing giê mkă hnơ̆ng jăk kiă kriê ala čar. kâo mñă hlăm wưng kơ anăp srăng uêñ mĭn 5 mta. Sa jing amâodưi brei bruă swil nao êdei klei ăl čôñ mơ̆ng mnuih ƀuôn sang. Pô srăng mđing hmư̆, thâo klă boh sĭt leh anăn mâo klei blŭ êlâo. Tal 2, wĭt lač klei akâo phung bi ala srăng klă klơ̆ng hĭn. Ênoh klei wĭt lač lu jing năng čih yap, ƀiădah giê mkă knhal tuč jing srăng mâo hră mơar wĭt lač, leh anăn boh klei dưi msir mơ̆ mnuih ƀuôn sang ƀuh găl mơ̆”.

Khua Bruă Kbĭn ala ăt mñă, ktuê dlăng bruă swil srăng ruah djŏ klei kpăk, ksiêm mbha boh klei. Boh klei lŏ hluê si klei msir jih hnơ̆ng, mâo mâo ñĕ đuĕ. Boh klei dưi msir djŏ hdră bhiăn, jih klei dưi, amâo mâo mta mrâo srăng gĭr mtrŭt mjhar, rơ̆ng djŏ hdră bhiăn, amâo mâo lui sui, ngă luč klei êđăp ênang, mđĭ hnơ̆ng jăk bruă čung ba mnuih ƀuôn sang, srăng mâo hdră tă, phŭn agha, anôk bruă klam, akâo klei msir leh anăn hdră ktuê dlăng klei akâo, bruă mlan êlâo srăng dưi mtrŭt mjhar, bi klă hlăm mlan êdei./.