Êjai klei kreh knhâo mrâo mrang leh anăn mlih mrô amâo lŏ jing klei kbưi ôh, ƀiădah jing mnơ̆ng đru, lu phung mniê mnuih djuê ƀiă pai mă klei găl anei. Hŏng klei mbruă, diñu bi mdrŏng kơ gŏ sang leh anăn bi lar  knhuah dhar kreh djuê ana pô, đru ngă tŭ dưn hdră êlan mrô 8 “Hluê ngă klei mtăp mđơr êkei mniê leh anăn mgaih msir boh klei mjêč kơ phung mniê leh anăn phung hđeh”, hlăm hdră ala čar kñăm mđĭ kyar bruă duh mkra ala ƀuôn krĭng mnuih djuê ƀiă leh anăn krĭng čư̆ čhiăng.

Sa hlăm dŭm klei anăn jing hdră bruă mơ̆ng Khà Thị Hạnh, sa čô mniê Thái mơ̆ng Lai Châu. Hriê kơ prŏng ti krĭng čư̆ čhiăng, ñu thâo klă dŭm mta ana êa drao anôk pô dôk. Ƀuh bruă mdrao mgŭn đưm ƀrư̆ luč ram, ñu gĭr nao hriăm ti sang hră Y Dược Lê Hữu Trác. Hŏng klei hriăm êlam, ñu thâo jih dŭm mta êa drao đưm leh anăn thâo dưn yua klei mrâo mrang čiăng ngă kơ êa drao kyâo jing jĕ hĭn leh anăn yua lu hĭn.

Yua klei bi lar ktang mơ̆ng Tiktok, Khà Hạnh mkŏ mjing mbah mđung rup "Tây Bắc TV". Dŭm video mơ̆ng ñu mdar klei tui duah, pĕ, mkra mjing êa drao kyâo mbĭt hŏng dŭm klei kah mbah ênưih thâo săng kơ êa drao dưi đru mâo lu mnuih dlăng, đru kơ êa drao Yŭ Dưr truh hŏng grăp čô.

 “Êjai ngă mbah mđung rup Tây Bắc TV tal êlâo hmei ngă sa mbah. Leh wưng bhiâo, hmei dưi bi klă kơhưm pô leh anăn dưi ba čhĭ lu boh mnga, êa drao. Kâo ƀuh, tơdah hjăn kâo dưi ngă pô mkăn si ngă? Sơnăn hmei lŏ ngă lu mbah leh anăn mtô kơ lu amai adei krĭng tlaih kbưi, ăt msĕ mơh pô mnơ̆ng Ocop čiăng ba mnơ̆ng dhơ̆ng pô hlăm online”.

Phŭn kčưm, Khà Hạnh knŏng čiăng kah mbha klei hriăm. Ƀiădah dŭm klei wĭt lač jăk mơ̆ng phung blei, dŭm klei yăl kơ mnơ̆ng pô dưi đru kơ grăp čô suaih hĭn lŏ brei kơ ñu mâo boh kdrŭt. Ñu ƀuh:

 “Kâo ƀuh anak mnuih leh anăn yang ƀuôn mlih. Tơdah anôk bruă pô amâo mâo mlih jing pô srăng êmưt hĭn. Lai Châu jing anôk mâo lu boh mnga jăk yâo, boh nik jing êa drao. Tơdah knŏng guôn phung tuê nao blei jing dleh êdi, klei čhĭ mnia ăt êmưt mơh. Pô ƀuh phung blei ti online pô srăng tinăn mơh”.

Krĭng mnuih djuê ƀiă leh anăn čư̆ čhiăng jing anôk hdĭp mda mơ̆ng êbeh 14,6 êklăk čô, mâo 15% ênoh mnuih ƀuôn sang kluôm ala, hnơ̆ng gŏ êsei ƀun giăm 22%, lu hĭn mkă hŏng hnơ̆ng kah knar lăn čar. Phung mniê mnuih djuê ƀiă jing êpul tŭ klei hmăi mơ̆ng klei ktrŏ ƀun ƀin. Mbĭt anăn, êwang kpleh mrô êdah klă: hnơ̆ng mnuih djuê ƀiă yua internet leh anăn mâo măi tĭnh ƀiă hĭn hŏng hnơ̆ng kah knar, jing klei kpăk nao jĕ klei găl bruă duh mkra mrô.

Biădah hlăm klei lông dlăng ăt mâo klei găl. Phung mniê mnuih djuê ƀiă jing phung mâo klei hrăm krĭng lăn, jing phŭn boh mnga bruă lŏ hma, mnơ̆ng mkra hŏng kngan. Anei jing ngăn dŏ yuôm bhăn, msĕ anôk mă mah, tơdah dưi yua djŏ hdră hlăm bruă duh mkra mrâo. Klei yăl dliê mơ̆ng Khà hạnh jing klei bi klă kơ sa čô mniê mnuih djuê ƀiă dưi hâo hưn leh anăn mrâo mrang čiăng ba wĭt boh tŭ dưn kơ yang ƀuôn. Mơ̆ng ngă pô mbah"Tây Bắc TV" leh anăn ba čhĭ boh mnga, êa drao, ñu lŏ mkŏ mjing lu mbah mkăn, mtô kơ lu phung amai adei krĭng kbưi leh anăn phung pô mnơ̆ng OCOP ba mnơ̆ng dhơ̆ng kơ Online.

Ƀuh klă dŭm klei lông dlăng leh anăn klei găl anei, knŭk kna ngă bruă ktang phĭt. Hdră êlan mrô 8 hlăm hdră ala čar kñăm jing sa klei bi klă sĭt. Khua êpul bruă phung mniê Việt Nam Nguyễn Thị Tuyến mñă klă: “Mta kñăm mơ̆ng hdră êlan mrô 8 jing mđĭ hĭn klei thâo, bi mlih klei mĭn amâo djŏ, kriê dlăng klei hdĭp kơ phung mniê leh anăn phung hđeh, ngă mta kñăm mtăp mđơr êkei mniê leh anăn bi lar bruă klam mơ̆ng phung mnuiê hlăm klei mđĭ kyar bruă duh mkra ala ƀuôn.”