Ară anei, ênoh mnuih mâo klei đăo knang hlăm krĭng mnuih ƀuôn sang jing mnuih djuê ƀiă jing 29 êbâo 567 čô (klei čih yap ti thŭn 2021). Dŭm thŭn êgao, bruă ba mdah leh anăn hluê ngă dŭm hdră êlan kơ phung mâo klei đăo knang dưi đru mđĭ hĭn klei thâo săng hlăm yang ƀuôn kơ k’hưm, bruă klam mơ̆ng phung mâo klei đăo knang hlăm krĭng mnuih djuê ƀiă leh anăn bruă klam mơ̆ng dŭm êpul êya, grăp čô djŏ tuôm hŏng bruă kriê dlăng, mtrŭt mjhar mnuih ƀuôn sang răng mgang klei êđăp ênang, răng mgang ala čar.

Bruă čuă êmuh, mđĭ ai đru kơ phung mâo klei đăo knang hlăm wưng êgao mâo lu klei uêñ mĭn, ktrâo lač leh anăn hmao hluê ngă kluôm ênŭm. Hdră êlan hŏng phung mâo klei đăo knang hlăm krĭng mnuih ƀuôn sang jing mnuih djuê ƀiă dưi mkŏ mjing leh klei găl čiăng kơ gưl bruă Đảng nah gŭ, bruă sang čư êa, êpul bruă, dhar bruă, alŭ wăl leh anăn boh nik jing phung ngă bruă djuê ana hnêč mtrŭt mjhar leh anăn bi lar jih hnơ̆ng bruă klam yuôm bhăn mơ̆ng phung mâo klei đăo knang. Mơ̆ng anăn, diñu dưi bi lar bruă klam hlăm djăp mta bruă hlăm klei hdĭp yang ƀuôn, mâo lu klei đru mguôp klă klơ̆ng hlăm bruă bi ktưn khăp kơ ala čar, mđĭ kyar bruă duh mkra – ala ƀuôn, lăm klei ư êpa, bi hrŏ klei ƀun ƀin, mkŏ mjing klei hdĭp kreh dhar, mđĭ klei bi mguôp jih jang djuê ana, răng mgang klei êđăp ênang yang ƀuôn leh anăn wăl hdĭp mda krĭng mnuih djuê ƀiă.

Hlăm mmông bi tuôm hŏng phung mâo klei đăo knang ti alŭ wăl giăm anei, Đỗ Trọng Hưng, Khua bruă Đảng čar Thanh Hoá yap yuôm bhăn êpul phung mâo klei đăo knang hlăm mnuih ƀuôn sang jing mnuih djuê ƀiă mâo leh klei hur har nao hgŭm leh anăn mtrŭt mjhar mnuih ƀuôn sang nao hlăm dŭm mta bruă hlăm yang ƀuôn, mâo lu klei đru mguôp klă klơ̆ng kơ klei đĭ kyar bruă duh mkra – ala ƀuôn. Hŏng klei đăo knang, klei hriăm leh anăn klei thâo pô, phung mâo klei đăo knang mâo nanao klei bi hmô nao êlâo, hur har hâo hưn, mtrŭt mjhar mnuih ƀuôn sang jing mnuih djuê ƀiă hluê gưt hdră mtrŭn, hdră êlan mơ̆ng Đảng, klei bhiăn ala čar, mkŏ mjing klei bi mguôp jih jang djuê ana leh anăn răng mgang klei êđăp ênang yang ƀuôn, mđĭ kyar bruă duh mkra, kriê pioh, bi lar knhuah gru djuê ana. Đỗ Trọng Hưng brei thâo: Kâo mñă kơ phung mâo klei đăo knang hlăm mnuih ƀuôn sang jing mnuih djuê ƀiă lŏ dơ̆ng bi lar bruă klam jing mta kñăm leh anăn kmeh gơ̆ng mơ̆ng pô, mâo nanao klei nao êlâo hlăm djăp mta bruă hlăm klei hdĭp grăp hruê, mđĭ ai, atăt ba gŏ sang, găp djuê, mnuih ƀuôn sang anôk pô dôk hluê gưt dŭm hdră mtrŭn mơ̆ng Đảng, hdră êlan, klei bhiăn ala čar, hur har nao hgŭm hlăm dŭm mta bruă bi ktưn khăp kơ ala čar, kñăm mđĭ kyar bruă duh mkra ala ƀuôn, mđĭ hĭn klei mă bruă knuă, gĭr ktưn, kpưn đĭ kơ mdrŏng, čŏng pô tui hriăm, dưn yua leh anăn hluê ngă dŭm klei bi hmô mđĭ kyar bruă duh mkra mâo boh tŭ dưn, mơ̆ng anăn mtô kơ mnuih ƀuôn sang hrăm mbĭt hluê ngă. Rơ̆ng jêñ jêñ klei blŭ hrăm hŏng gưl bruă Đảng nah gŭ, bruă sang čư êa leh anăn êpul ngă bruă djŏ tuôm hlăm bruă gang mkhư̆ phung ngă soh, gang mkhư̆ bruă hâo hưn, gang mkhư̆ klei mđĭ kyar klei đăo soh čhuai hlăm krĭng mnuih ƀuôn sang jing mnuih djuê ƀiă, kriê pioh leh anăn bi lar knhuah dhar kreh jăk siam djuê ana pô, nao mbĭt hŏng bruă lui hĕ dŭm klei bhiăn amâo mâo lŏ djŏ, mkŏ mjing ƀuôn sang dhar kreh, alŭ ƀuôn sang mrâo mrang, đru mkŏ mjing ƀuôn sang ƀrư̆ hruê ƀrư̆ mrâo mrang, mdrŏng siam leh anăn mâo klei bi hmô jăk.

Dŭm thŭn êgao, klei hdĭp mda mnuih ƀuôn sang jing mnuih djuê ƀiă leh anăn krĭng čư̆ čhiăng dưi mâo klei mlih êdah êdi, hnơ̆ng gŏ sang ƀun ƀin hlăm krĭng mnuih djuê ƀiă hrŏ hmar hĭn, mnuih ƀuôn sang ƀrư̆ hruê ƀrư̆ đăo knang kơ klei gĭt gai mơ̆ng Đảng, klei kriê dlăng mơ̆ng knŭk kna, đru răng mgang klei êđăp ênang yang ƀuôn. Mâo dŭm klei anei kyua klei đru mguôp mơ̆ng phung mâo klei đăo knang. Hluê si klei bi klă mrô 12/2018/QĐ-TTg, phung mâo klei đăo knang srăng dưi mâo klei đru kơ mnơ̆ng yua, klei mđĭ ai hlăm wưng thŭn mrâo, knăm mơak dŭm djuê ana mnuih djuê ƀiă, nao čuă êmuh, mâo klei đru tơdah êngoh duam, mâo klei dleh dlan, dưi mâo klei hưn hŏng dŭm adŭ mtô bi hriăm, nao čuă dlăng, tui hriăm, kah mbha klei thâo leh anăn klei hưn mjêč.

Êngao kơnăn, dŭm gưl bruă Đảng nah gŭ, bruă sang čư êa, bruă mặt trận, êpul êya bruă kđi čar yang ƀuôn mkŏ mjing leh klei mbha grăp tuôr hră klei mrâo Djuê ana leh anăn đĭ kyar, klei mrâo alŭ wăl kơ jih jang phung mâo klei đăo knang hlăm kluôm ala, mkŏ mjing 4.453 klei kƀĭn trông kah mbha, hâo hưn, mkŏ mjing 1.882 hdră mtô bi hriăm, mđĭ klei thâo, mkŏ mjing 24.303 klei hiu čuă dlăng, tui hriăm klei thâo ti dŭm čar, ƀuôn prŏng leh anăn ƀuôn prŏng phŭn Hà Nội kơ phung mâo klei đăo knang hlăm kluôm ala.

Knŏng hlăm dŭm klei kƀĭn mkăp brei klei hưn, phung mâo klei đăo knang dưi mđing hmư̆ kơ boh sĭt bruă duh mkra ala ƀuôn hlăm alŭ wăl ti dŭm thŭn êlâo leh anăn hdră êlan hlăm dŭm thŭn kơ anăp, mâo klei hưn kơ boh sĭt klei êđăp ênang bruă kđi čar, yang ƀuôn hlăm alŭ wăl leh anăn hlăm kluôm ala. Bi kơ dŭm hdră mnêč mrâo, hdră ngă bruă bi kdơ̆ng hŏng knŭk kna leh anăn boh sĭt bruă djuê ana, hdră êlan djuê ana hlăm wưng kơ anăp, boh nik jing phung mâo klei đăo knang mda asei nao hriăm, kah mbha klei thâo, nao čuă dlăng đa đa klei bi hmô mđĭ kyar bruă duh mkra. Anei jing dŭm klei găl čiăng đĭ kyar, pŏk phai dŭm klei bi hmô jăk, mâo boh tŭ dưn hlăm krĭng mnuih djuê ƀiă. Nguyễn Văn Sài, k’iăng khua adŭ bruă mnuih mă bruă kahan êka êkeh leh anăn yang ƀuôn – bruă djuê ana kdriêk Lăn Lãng – čar Lạng Sơn brei thâo “Hmei srăng gĭr kñăm kơ bruă gĭt gai, ktrâo lač, tă hdră si srăng ngă čiăng bi lar bruă klam mơ̆ng phung mâo klei đăo knang, boh nik jing phung mâo klei đăo knang mda asei čiăng bi lar bruă klam, lu phung mâo klei đăo knang mda asei srăng đru mguôp ai tiê diñu, boh nik diñu mbruă hĭn hlăm bruă mđĭ kyar klei hdĭp mda gŏ sang leh anăn mtrŭt mjhar mnuih ƀuôn sang…”

Hŏng dŭm adŭ mtô mjuăt bi hriăm, mkăp brei klei hưn, phung mâo klei đăo knang dưi mâo klei hriăm, mâo klei hưn mrâo kơ hdră êlan, hdră mtrŭn mơ̆ng Đảng, klei bhiăn ala čar, boh sĭt klei đĭ kyar bruă duh mkra ala ƀuôn nao mbĭt hŏng bruă rơ̆ng klei êđăp ênang, hâo hưn kơ bruă kriê pioh knhuah dhar kreh leh anăn klei bi mguôp djuê ana ti alŭ wăl. Boh nik, phung mâo klei đăo knang dưi mâo klei hrăm kơ dŭm mta phŭn, hdră êlan hâo hưn, mtrŭr mjhar hlăm krĭng mnuih djuê ƀiă čiăng mkŏ mjing tur knơ̆ng hlăm bruă mtrŭt mjhar mnuih ƀuôn sang ti alŭ wăl. Hluê si aduôn Ma Thị Như Trang, k’iăng khua bruă mặt trận kdriêk Hàm Yên, Tuyên Quang: “Ară anei hlăm kdriêk mâo 195 čô mâo klei đăo knang hlăm krĭng mnuih djuê ƀiă, anei jing phung êdah êdi hlăm bruă hluê ngă klei hâo hưn, mtrŭt mjhar mnuih ƀuôn sang hluê gưt hdră êlan, hdră mtrŭn mơ̆ng Đảng, klei bhiăn ala čar, boh nik hlăm hdră lăm klei ư̆ êpa, bi hrŏ klei ƀun ƀin, mkŏ mkra krĭng ƀuôn sang mrâo”.

Bruă mkăp brei klei hưn kơ phung mâo klei đăo knang amâo djŏ knŏng jing mđĭ mđĭ ai, ƀiădah lŏ jing klei hriăm, hră mơar yuôm bhăn čiăng kơ phung mâo klei đăo knang hluê ngă jăk bruă hâo hưn hdră êlan, hdră mtrŭn mơ̆ng Đảng, klei bhiăn ala čar truh kơ mnuih ƀuôn sang jing mnuih djuê ƀiă, kah mbha klei hriăm hlăm bruă mđĭ kyar bruă duh mkra – ala ƀuôn, lăm klei ư̆ êpa, bi hrŏ klei ƀun ƀin leh anăn đru hlăm bruă kriê pioh, bi lar knhuah dhar kreh dŭm djuê ana ti alŭ wăl… Hluê anăn đru kơ mnuih ƀuôn sang jing mnuih djuê ƀiă mđĭ hĭn klei thâo săng, mđĭ hnơ̆ng klei hdĭp kơ gŏ sang, yang ƀuôn, đru rơ̆ng klei êđăp ênang krĭng mnuih djuê ƀiă, krĭng čư̆ čhiăng leh anăn krĭng knông lăn.