Ti Sơn La, čar mâo êbeh 1,3 êklăk čô mnuih, hlăm anăn mnuih djuê ƀiă êbeh   83%, bruă klam mơ̆ng knuă druh mniê mnuih djuê ƀiă, mă bruă mbĭt, bi đru klam hŏng phung khua kiă kriê čar ƀuh leh klă mngač. Boh nik ară anei ti Sơn La jing leh anôk mđĭ kyar bruă lŏ hma hŏng kdrăp mrâo mrang, bruă pla mjing doh, hŏng hbâo brŭ. Phung mniê mâo leh bruă klam hlăm jih jang bruă mâo Sơn La hlăk dôk ngă. Tui si Lưu Minh Quân, Khua anôk bruă đru čung ba mnuih ƀuôn sang mơ̆ng bruă Đảng čar Sơn La, čar mâo nanao klei duh mĭn bruă knuă mă hŏng phung knuă druh, boh nik knuă druh mniê. Hnơ̆ng ênoh phung bi ala mniê ti anôk bruă kƀĭn ala, hlăm êpul gơ̆ng bruă ƀuôn sang, phung mniê hlăm êpul khua kiă kriê bruă Đảng, lehanăn ênoh phung mniê mâo mŭt đảng jing kdlưn hĭn nanao hŏng gưl êlâo. Lač kơ đảng viên mrâo mŭt. Brei ƀuh dŭm klei tŭ dưn hlăm bruă mtăp mđơr êkei mniê, lehanăn mđĭ k’hưm phung mniê ti čar, Lưu Minh Quân lač:

Bruă knơ̆ng ti Sơn La anăn jing phung khua kiă kriê gĭt gai bruă đru kơ phung mniê bi hrŏ ƀun hŏng klei kjăp, hlăm djăp mta bruă ngă hlăm čar. Sơn La jing 1 hlăm 14 boh čar kluôm ala ngă leh hră mơar hŏng gưl dlông ba yua hdră duh mkra pla mjing ênuk mrâo, mâo bruă kiă kriê klei thâo mkiêt mkriêm, lehanăn brei čan prăk pioh mđĭ bruă knuă, dưi ngă djŏ hŏng klei čiăng mrâo. Sơn La ăt ngă dŭm hdră đru kơ phung mniê hriăm bruă, mjing bruă mă kơ êbeh 9.700 čô amai adei. Mkŏ mjing bruă bi ktưn hlăm êpul phung mniê Việt Nam ênuk ară anei, krơ̆ng nanao 651 hdră bi hmô, mâo leh 2818 čô jing phung kdlưn hĭn, hŏng 1292 čô amai adei djăp ênoh čuăn jing mniê Việt Nam ênuk mrâo mrang.

Ti Lai Châu, tui si Vũ Mạnh Hà, Khua hlăm anôk mprăp kơ êpul bruă Đảng gưl dlông, k’iăng khua bruă Đảng čar Lai Châu, snăn čar Lai Châu ngă tal êlâo bruă mđĭng mjuăt bi hriăm phung mniê, ngă bruă kơ phung mniê, lehanăn klei mtăp mđơr êkei mniê. Hlăm jih jang hdră mtrŭn, djŏ tuôm hŏng bruă duh mkra klei hdĭp mda mnuih djuê ƀiă, snăn djŏ tuôm lu hŏng phung mniê, phung hđeh mniê mnuih djuê ƀiă. Msĕ si, bruă Đảng čar Lai Châu mâo leh hdră mtrŭn mrô 06 hrue 15 / 3 / 2021 kơ bruă mđĭ hnơ̆ng thâo bruă hlăm êpul khua kiă kriê, jing mnuih djuê ƀiă hlăm dŭm boh să wưng thŭn 2021-2025, tă êlan mă bruă hlŏng truh thŭn 2030; asăp mtrŭn 9/2021 mơ̆ng êpul khua kiă kriê bruă Đảng čar kơ klei mđĭ hĭn bruă kiă kriê mơ̆ng dŭm gưl bruă Đảng, kñăm čiăng bi hrŏ klei bi dôk ung mô̆ mơ̆ng mda, klei bi dôk ung mô̆ amiêt awa sa êrah, hdră êlan đru kơ phung mniê rŭ mjing bruă knuă kơ phung mniê, mâo dŭm hdră êlan ngă bruă hŏng phung mniê, hdră êlan mdei kkiêng anak, dlăng kriê klei suaih pral, bruă mdrao mgŭn hŏng hră ênua, hdră ƀă kkiêng anak ƀiă, răng mgang klei dưi êngiê lehanăn klei tŭ dưn kơ phung mniê ti anăp klei bhiăn...  

Hdră êlan čuăl mkă, mjuăt bi hriăm lehanăn bi hriăm mbŏ kơ knuă druh mniê hlăm 5 thŭn êgao mâo leh klei tŭ dưn jăk. Tal êlâo, jing klei thâo săng, bruă klam lehanăn klei ngă bruă mơ̆ng dŭm gưl bruă Đảng, bruă sang čư̆ êa lehanăn jih jang yang ƀuôn, hlăm anăn mâo phung mniê jing yuôm bhăn snăk, anôk phung mniê, bruă phung mniê hlăm boh klei mrâo ară anei mâo lu klei bi mlih leh. Tal dua, kơ klei mtăp mđơr êkei mniê hlăm djăp mta bruă kđi čar, bruă duh mkra, dhar kreh yang ƀuôn mâo leh klei bi mlih jăk mơh. Êpul knuă druh mniê jing khua kiă kriê ti dŭm anôk bruă êpul êya đĭ nanao kơ ênoh lehanăn hnơ̆ng thâo”.

 Tôn Thị Ngọc Hạnh, K’iăng khua êpul hgŭm bruă mniê Việt Nam brei thâo klah čŭn kơ boh tŭ dưn bruă mniê mâo leh dưi ƀuh mâo klei bi mlih klă mngač êdi. Bruă klam mơ̆ng dŭm gưl, dhar bruă, djăp alŭ wăl hlăm wưng leh êgao đĭ hĭn mơh. Lehanăn mâo klei mđing hĭn êdi, phung mniê hgŭm lu hĭn hlăm bruă yang ƀuôn, bi êdah bruă klam, klei găl, lehanăn klei thâo đru ba wĭt leh boh tŭ dưn kơ dŭm alŭ wăl lehanăn hlăm kluôm ala. Siămdah, klei dôk bi kah êkei hŏng mniê ăt adôk prŏng jing leh mnơ̆ng bi kgăn hlăm dhar kreh, kơ hdră êlan, ƀuh ăt adôk prŏng kơ klei čiăng mđĭ kyar hŏng phung mniê. Lŏ dơ̆ng mđing lu hĭn bruă knuă kơ phung mniê, mâo dŭm hdră êlan đru kơ phung mniê hlăm ênuk ară anei, mjing knơ̆ng čiăng bi mâo klei mtăp mđơr êkei mniê hlăm jih jang bruă knuă dơ̆ng mơ̆ng kđi čar, bruă duh mkra, dhar kreh yang ƀuôn.      Tôn Thị Ngọc Hạnh lač:

Hŏng jih jang bruă hlue ngă hdră êlan mbĭt hŏng êpul phung mniê, boh nik jing dŭm hdră êlan rơ̆ng kơ klei dưi êngiê hŏng phung mniê, knư̆ hrue knư̆ dưi bi leh jăk hĭn, mâo dŭm hdră êlan kơ klei hdĭp mda ala ƀuôn jăk dưi bi lar hlăm djăp anôk. Đru kơ mniê mnuih djuê ƀiă, mniê amâo mâo jăk asei mlei, mniê đuĕ hiu dôk ka hơĭt, lehanăn phung mniê khua thŭn... Ƀuh klei dưn yua, lehanăn boh tŭ dưn hlue ngă hdră êlan hlue ngă ăt adôk mâo lu klei năng mđing.

Boh tŭ dưn bruă mniê wưng leh êgao, mâo bi mklă leh bruă klam mơ̆ng êpul bruă mniê. Bruă hlue ngă dŭm hdră êlan kơ phung mniê jing yuôm snăk ƀuh leh hlăm wưng êgao, lŏ sa blư̆ dơ̆ng bi êdah bruă mđing uêñ mơ̆ng dŭm gưl bruă Đảng, klei ngă bruă bi krăp mơ̆ng jih jang bruă sang čư̆ êa, dŭm dhar bruă, êpul êya hŏng bruă mniê; boh nik čŏng tui tiŏ bi hmao hŏng klei jing sĭt hlăm bruă knuă mơ̆ng êpul hgŭm mniê hlăm wưng leh êgao./.