Krĭng kwar Krah  leh anăn Lăn Dap Kngư mâo 19 čar, ƀuôn prŏng. Dua krĭng anei mâo klei mdê hjăn kơ lăn ala, bruă duh mkra, dhar kreh, ala ƀuôn mdê hjăn, lu klei găl ƀiădah ăt mâo lu klei dleh dlan, lông dlăng. Anei jing dŭm bruă brei mđing hlăm klei hlue ngă bruă mtrŭt mjhar phung mniê leh anăn dŭm hdră êlan mdê hjăn hŏng phung mniê ti dŭm čar kwar Krah- Lăn Dap Kngư. Hlăm krĭng anei, Đà Nẵng jing alŭ wăl dôk mrô sa kơ ênoh phung mniê ngă knuă druh hgŭm hlăm gưl bruă Đảng ti jih 3 gưl leh anăn lu hĭn tal 3 hlăm kluôm ala kơ ênoh phung knuă druh hgŭm hlăm gưl bruă Đảng nah gŭ. Dŭm čar: Nghệ An, Thừa Thiên-Huế, Đak Nông mâo ênoh phung knuă druh hgŭm lu hĭn krĭng wăl ti gưl čar, kdriêk, să.

Kon Tum, Dak Lak leh anăn Gia Lai mâo ênoh phung mniê hgŭm hlăm gưl bruă Đảng jing mnuih djuê ƀiă lu hĭn (yap hlăm ênoh jih jang phung mniê hlăm gưl bruă bruă Đảng). Hlăk êjai anăn, Gia Lai jing alŭ wăl mâo lu klei êdah êdi hŏng ênoh phung mniê hgŭm hlăm gưl bruă Đảng 3 gưl bi leh bruă klam leh anăn hgao hnơ̆ng kčah hlăm Asăp mtrŭn mrô 35-CT/TW mơ̆ng Phŭn bruă kđi čar. Ênoh phung mniê bi ala  Bruă kƀĭn ala leh anăn bi ala Êpul gơ̆ng bruă ƀuôn sang gưl čar mơ̆ng Gia Lai êbeh 30% mkă hŏng hnơ̆ng kčah, dôk mrô 4 hlăm krĭng kwar Krah- Lăn Dap Kngư.

 Hlue si dŭm boh phŭn dưi hưn mdah hlăm Klei bi kƀĭn hŏng hdră mđĭ kyar bruă duh mkra, klei hdĭp mda djăp mta mơ̆ng phung mniê 19 čar krĭng kwar Krah- Lăn Dap Kngư dưi mkra mđĭ klă mngač. Võ Thanh An,  Khua Anôk bruă čung ba mnuih ƀuôn sang, Khua Knơ̆ng bruă mặt trận čar Quảng Ngãi lač, klei bi knăl klă mngač kơ bruă klam phung mniê ti krĭng wăl jing ênoh phung mniê păn kjăp dŭm bruă klam hlăm gưl bruă Đảng, bruă sang čư̆ êa, phung mniê bi ala leh anăn Êpul gơ̆ng bruă ƀuôn sang lu hĭn êlâo. Bruă hrŏng ruah phung bi ala jing phung mniê hgŭm ngă khua bi ala bruă kƀĭn ala leh anăn Êpul gơ̆ng bruă ƀuôn sang dŭm gưl ară anei đĭ kơ ênoh leh anăn hnơ̆ng jăk, mda asei, klei thâo kđi čar, bruă knuă klă klơ̆ng ngă djŏ klei čiăng, lu hĭn mkă hŏng wưng êlâo.

 “Mơ̆ng bruă ktuê dlăng, bruă mặt trận čar Quảng Ngãi ƀuh phung mgơ̆ng asei bi ala bruă kƀĭn ala leh anăn Êpul gơ̆ng bruă ƀuôn sang dŭm gưl mâo klei jăk, thơ̆ng kơ bruă, mâo klei thâo mă bruă êpul. Jing kban mkŏ plah wah Đảng, bruă sang čư̆ êa hŏng Bruă kƀĭn ala, Êpul gơ̆ng bruă ƀuôn sang dŭm gưl, hŏng phung bi ala kơ mnuih ƀuôn sang”.

Khădah snăn, êngao kơ dŭm klei mngač, adôk mâo klei sĭt năng mđing dlăng. Ênoh mrô đĭ kyar phung mniê ti lu mta bruă adôk ƀiă hĭn hnơ̆ng hnơ̆ng kah knar kluôm ala, msĕ si ênoh mnuih mă bruă dưi mtô ƀiă, prăk hrui wĭt ƀiă leh anăn ênoh gŏ êsei ƀun lu; klei ngă jhat hlăm gŏ sang dleh ktuê dlăng; ênoh phung mniê mnuih djuê ƀiă jing khua gĭt gai adôk ƀiă mkă hŏng êpul knuă druh phung mniê. Siu H’Thoan, Khau Êpul hgŭm phung mniê kdriêk Čư̆ Prông, čar Gia Lai lač:

 “ Amai adei dôk mđing ară anei jing bruă mă, prăk hrui wĭt. Bruă duh mkra ară anei adôk tuôm hŏng klei dleh dlan. Hlăm anăn ăt djŏ tuôm kơ klei thâo săng leh anăn klei thâo săng, klei găl mđĭ kyar. Amai adiê mnuih djuê ƀiă lu ngă lŏ hma, bruă ngă hdră bruă adôk kƀah, klei găl čiăng đĭ kyar ƀiă anăn msir mgaih bruă mă, mjing bruă mă kơ amai adei mâo klei gĭr mđĭ kyar bruă duh mkra yuôm bhăn snăk.”

Bi ala kơ Anôk bruă mkŏ mjing, Nguyễn Thị Minh Hương, K’iăng Khua Êpul hgŭm phung mniê Việt Nam mpŭ tŭ yap dŭm boh phŭn bi trông, kčĕ mơ̆ng phung bi ala leh anăn čang hmăng anei srăng jing sa hlăm dŭm tur knơ̆ng kơ dŭm alŭ wăl kčah čiăng dŭm hdră msir mđĭ bruă klam, kơhưm phung mniê, kčĕ klei bhiăn klă klơ̆ng mkŏ mjing hdră êlan kơ phung mniê tŭ dưn; mjing djăp klei găl čiăng kơ knuă druh phung mniê mâo klei găl mđĭ lar klei thâo, bi mklă kơhưm pô čiăng đru mguôp, duh myơr kơ gŏ sang leh anăn ala ƀuôn.

 “  Dŭm bruă ăt mâo bruă Đảng, bruă sang čư̆ êa mđing dlăng, khădah snăn ăt adôk mâo klei bi kpleh plah wah hră mơar leh anăn pŏk ngă hlăm boh sĭt. Knyă druh êpul hgŭm ƀuh bruă klam pô jing pral, mbruă hĭn hlăm klei hlue ngă hdră êlan leha năn mđing kơ phung mniê kyua grăp êpul, grăp čô snăn srăng mâo klei mdê hjăn , wăt hlăm êpul mnuih djuê ƀiă snăn ăt mâo êpul mde mdê snăn brei bi mklă klei čiăng mơ̆ng grăp êpul čiăng mkra mjing bruă ngă bi djŏ guôp leh anăn mâo hdră msir djŏ guôp hŏng êpul”

 Hŏng 2 êpul bi trông mâo “Boh klei hlue ngă bruă knuă phung mniê leh anăn bruă hlue ngă hdră êlan hŏng dŭm êpul phung mniê mdê hjăn” leh anăn “ Bruă knuă druh mniê leh anăn mđĭ lar bruă klam phung knuă druh mniê”, klei bi trông čih yap lu klei mĭn đru mguôp kñăm lŏ dơ̆ng hlue ngă ngă jăk bruă klam phung knuă druh mniê hlăm boh klei mrâo. Hlăm anăn, hdră msir tur knơ̆ng jing mđĭ ktang bruă duh mkra, dhar kreh, ala ƀuôn, mđĭ klei hdĭp mda mnơ̆ng dhơ̆ng, ai tiê phung mniê djuê ƀiă, phung mniê hluê đăo leh anăn mđĭ hnơ̆ng thâo bruă phung knuă druh Êpul hgŭm phung mnuê mnuih djuê ƀiă, čiăng mlih mrâo boh phŭn, hdră ngă bruă djŏ hŏng boh sĭt mbĭt anăn mâo klei bhiăn mđing čiăng mkŏ mjing hlue ngă hdră êlan ară anei kơ bruă knuă phung mniê./.