Mă klei blŭ kơ hdră mtrŭn hgŭm kiă kriê plah wah dhar bruă gĭt gai bruă kƀĭn ala lehanăn êpul khua bruă mặt trận čar kwar gưl dlông pia klah čŭn (jing hdră mtrŭn mrô 525) kơ klei bi tuôm hŏng phung bi ala mnuih ƀuôn sang, mơ̆ng phung bi ala bruă kƀĭn ala, phung bi ala lač klei: “Phung bi ala nao ti anôk bi tuôm hŏng mnuih ƀuôn sang, knŏng nao dôk hmư̆ đuič”.  Khua anôk bru đru čung ba mnuih ƀuôn sang Dương Thanh Bình brei thâo, leh 10 thŭn hlue ngă hdră mtrŭn mrô 525, lu phung bi ala bruă kƀĭn ala čŏng ngă leh jăk hĭn klei bi tuôm hŏng mnuih ƀuôn sang hŏng lu hdră mdê mdê, mđing hmư̆ ksiêm duah lehanăn bi klin, ba jih jang klei mnuih ƀuôn sang akâo kơ dŭm anôk bruă mâo klei dưi mghaih msir. Siămdah, K’iăng khua bruă kƀĭn ala Trần Quang Phương bi êdah klei bi mlih kơ boh phŭn, hdră êlan klei bi tuôm hŏng mnuih ƀuôn sang năng mđing êdi kơ klei “Pô bi ala nao ti tuôm knŏng kăp dôk hmư̆ đuič”:

“Bi tuôm hŏng mnuih ƀuôn sang ară anei knŏng jing klei bi tuôm hŏng mnuih ruah nao bi ala brei đuič msĕ si tiŏ nao knuă druh, mnuih ngă bruă mơ̆ng dŭm êpul bruă, dhar bruă hlăm să dŭm phung knuă druh khua thŭn, phung leh wĭt mdei bruă mâo k’hưm knŏng ƀiădah đuič mâo mnuih nao hŏng klei êngiê. Anei jing hdră mkŏ mjing dah mkă tĭng mâo lu hdră: Bi mtuôm jêñ jêñ, bi tuôm hlue bruă čiăng, bi tuôm hŏng êlan online, bi tuôm klă anăp... snăn brei lŏ mâo hdră êlan mlih mrâo. Kñăm čiăng dưi mâo mă lu klei blŭ mơ̆ng mnuih ƀuôn sang, mghaih msir lehanăn wĭt lač klei akâo, lehanăn ksiêm dlăng bruă mghaih msir bruă knuă”.

     Bi k’iăng khua bruă kƀĭn ala Nguyễn Khắc Định mâo klei blŭ snei:

“Mâo čar tui hlue êpul bi ala truh kơ êpul êya klei ruah khua lehanăn nao nanao yơh hlăm jih wưng păn bruă. Msĕ snăn 3 čô pô bi ala tui si ruah mdưm ti 3 kdriêk jing bi mlih nanao yơh hlăm 3 kdriêk anăn. Mâo sa čô pô bi ala kgŭ blŭ, sa čô dôk ti bruă nah gŭ hĭn, tăp năng dôk ti anôk knhal tuič. Bi pô bi ala dôk ti anôk tal êlâo, kgŭ mă tŭ klei blŭ lehanăn wĭt lač. Kyuanăn mâo dŭm pô bi ala nao ti anôk bi tuôm ƀiădah knŏng dôk hmư̆, klei anei jing sĭt snăn êdi”.

        Phung bi ala mâo klei akâo hŏng dŭm alŭ wăl mâo lu pô bi ala bruă kƀĭn ala năng bi mbha lu êpul mâo ênoh lehanăn gưl bi tuôm hŏng mnuih ƀuôn sang jing lu blư̆ hĭn. Snăn hlăm grăp blư̆ bi tuôm hŏng mnuih ƀuôn sang knŏng lu hlăm bruă sang hră mơar, bruă knuă mă, klei kơ lăn ala...  jing jih jang bruă dôk hlăm klei dưi ti alŭ wăl, hmăi djŏ hŏng klei tŭ dưn sĭt êmĭt kơ klei hdĭp mnuih ƀuôn sang. Kyuanăn yơh, mâo lu phung khua kiă kriê alŭ wăl nao ti anôk bi tuôm hŏng phung bi ala knŏng dôk kăp hmư̆ klei blŭ, dôk hlăm klei dưi pô ngă.

        Ti anôk bi kƀĭn khua bi ala bruă kƀĭn ala Vương Đình Huệ mñă: Pô bi ala bruă kƀĭn ala jing mnuih bi ala brei kơ klei mĭn mơ̆ng mnuih ƀuôn sang ti anôk ruah leh pô lehanăn pô bi ala kơ mnuih ƀuôn sang kluôm ala, mâo bruă đua klam ti anăp mnuih ƀuôn sang, lehanăn ti anăp anôk bruă kƀĭn ala. Kyuanăn, đơ knua hlăm klei bi tuôm hŏng phung bi ala kơ mnuih ƀuôn sang amâo mâo djŏ knŏng ti alŭ wăl ruah leh pô đuič ôh, ƀiădah wăt hlăm anôk ngă bruă mơh:

“Hŏng ênoh čuăn pô bi ala bruă kƀĭn ala ăt pia jing pô bi ala brei mâo klei bi mguôp kjăp hŏng mnuih ƀuôn sang, mđing hmư̆ klei blŭ mơ̆ng mnuih ƀuôn sang, mâo mnuih ƀuôn sang đăo knang. Hdră bhiăn mkŏ mjing bruă kƀĭn ala lŏ mlih mrâo thŭn 2020, lač leh: Pô bi ala bruă kƀĭn ala mâo nanao klei bi tuôm hŏng mnuih ƀuôn sang, mđing hmư̆ klei mĭn mnuih ƀuôn sang. Pô bi ala bruă kƀĭn ala jing bi tuôm hŏng mnuih ƀuôn sang tui si hdră bi tuôm mơ̆ng êpul khua bi ala bruă kƀĭn ala jing sa mta. Tal dua jing bi tuôm hŏng mnuih ƀuôn sang ti anôk pô dôk lehanăn ngă bruă. Hdră mtrŭn tinăp anei ăt năng bi mngač hĭn si srăng ngă, brei mâo klei ktrâo atăt ngă bruă bi klă mngač mơh”.

        Dhar bruă gĭt gai bruă kƀĭn ala mâo leh klei bi tŭ ư kơ bruă lŏ mlih mrâo, thiăm mbŏ hdră mtrŭn mrô 525, mdưm hlăm klei mkŏ mjing hdră mtrŭn mơ̆ng dhar bruă gĭt gai bruă kƀĭn ala, jao kơ Êpul kiă kriê bruă kăp mđing hmư̆ klei blŭ mnuih ƀuôn sang kiă kriê hŏng klei bi mguôp dŭm anôk bruă djŏ tuôm pioh mkŏ mjing hdră mtrŭn bi djŏ hŏng mta mtrŭn mơ̆ng klei bhiăn.

Ăt ti anôk bi kƀĭn tal anei, dhar bruă gĭt gai bruă kƀĭn ala ksiêm kơ klei hâo mdah bruă mđing hmư̆ klei blŭ mơ̆ng mnuih ƀuôn sang mơ̆ng anôk bruă kƀĭn ala mlan 5 lehanăn mlan 6 leh êgao. Khua anôk bruă hlue ngă klei bhiăn Lê Thị Nga lač kơ klei amĭ ama hđeh hriăm hră dôk dăp pruĕ jih mlam čiăng ngă hră mơar kơ anak pô nao hriăm adŭ 10, anei jing sa klei ktrŏ êdi hŏng hđeh hriăm hră:

“Klei ktrŏ hŏng hđeh hriăm hră bi lông mŭt adŭ 10 ti Hà Nội, ƀuôn prŏng Hồ Chí Minh jing klei dôk găn hlăm lu thŭn leh. Klei bi lông mŭt adŭ 10 ară anei, lŏ jing sa klei dleh hĭn hŏng bi lông nao mŭt gưl prŏng. Djŏ mơ̆ drei kƀah hĕ êdi sang hră gưl 3 knŭk kna, amâodah si hdră ngă bruă čiăng bi jăk hĭn? Knŭk kna mtă kơ phŭn bruă sang hră mơar mâo klei hâo mdah, snăn hmei mâo klei mtă brei lŏ mdưm hlăm klei hâo mdah kơ bruă kăp mđing hmư̆ klei mĭn mnuih ƀuôn sang”./.