Ti Dak Lak, Êpul bi ala bruă kƀĭn ala čar bi hgŭm hŏng kahan ksiêm čar mkŏ mjing klei kƀĭn trông mă klei blŭ kơ hră čih Hdră bhiăn Kđi klei (lŏ mlih mrâo), Hdră bhiăn mkŏ mjing anôk bruă ksiêm dlăng klei ngă soh hdră bhiăn (lŏ mlih mrâo) leh anăn hră čih Hdră mtrŭn kơ klei bhiăn, hdră êlan mdê hjăn msir mghaih klei ngă soh djŏ tuôm hŏng bruă duh mkra knŭk kna, bruă duh mkra êngao knŭk kna, ba yua klei kreh knhâo - kdrăp mrâo, mlih mrâo hŏng klei mbruă leh anăn mlih mrô.

Phung bi ala bi tŭ ư kơ klei čiăng mkŏ mjing dŭm hdră bhiăn, hdră mtrŭn kñăm mkăp djŏ hŏng klei čiăng hlăm boh sĭt. Lu klei blŭ đru mguôp kơ bruă kah mbha klei dưi ksiêm dlăng, ksiêm wĭt dŭm klei čuăn kơ hnơ̆ng bi kmhal, lăm lui amâodah mdei ksiêm dlăng klei soh, mbĭt anăn kčĕ thiăm mbŏ dŭm klei ngă soh, klei soh mrâo.

Đru mguôp klei blŭ kơ hră čih Hdră bhiăn kđi klei (lŏ mlih mrâo), pô bi ala Knơ̆ng bruă Hdră bhiăn čar Dak Lak lač klei ba yua dŭm klei blŭ "klei soh bi knar", "klei soh kjham hĭn", "klei soh hdjul hĭn" ti kdrêč 6, mta 4 ka djŏ guôp ôh hŏng hdră čih mkra hdră bhiăn.

"Klei soh jing anăn piâ djŏ hŏng hdră bhiăn mơ̆ng klei soh, amâo djŏ klei bi êdah hnơ̆ng kjham mơ̆ng klei soh amâodah hnơ̆ng bi kmhal. Kyua anăn, akâo ksiêm dlăng amâo yua dŭm klei blŭ anei čiăng rơ̆ng klei djŏ klă mơ̆ng hdră čih mkra."

Hŏng klei čih mkra Hdră bhiăn mkŏ mjing anôk bruă ksiêm dlăng phung ngă soh (lŏ mlih mrâo), lu klei blŭ lač kơ klei gun kpăk hlăm bruă ksiêm dlăng ti nah gŭ, boh nik hlăk pŏk ngă gru hmô anôk bruă ksiêm dlăng dua gưl.

Thượng tá Đặng Quang Hưng, Khua kahan ksiêm ƀuôn hgŭm Ea Kao, bi tŭ ư hŏng klei čih mkra djăp ênŭm bruă klam, klei dưi mơ̆ng Phung ksiêm duah jing Khua amâodah K’iăng Khua kahan ksiêm gưl să, mbĭt anăn akâo lŏ dơ̆ng bi leh klei bhiăn čiăng rơ̆ng klei dưi hlue ngă.

"Brei čoh čuăn klă kơ klei mbha gưl, klei dưi, bruă klam mơ̆ng grăp anôk bruă leh anăn hdră msir mgaih tơdah mâo klei bi mlih kơ mnuih mă bruă; mbĭt anăn bi mklă klă klơ̆ng hnơ̆ng kčah bruă klam mơ̆ng pô dưi mbha ăt msĕ mơh dŭm tĭng hlăm klei jao bruă. Klei kƀah dŭm mta phŭn bi mklă pô gĭt gai, hnơ̆ng kčah bruă klam leh anăn hdră bi mlih srăng ngă truh klei kpăk đuôm, gun kpăk hlăm bruă hluê ngă hdră mtrŭn gĭt gai leh anăn hluê ngă dŭm mta bruă hlăm klei kčŭt hưn."

Êpul bi ala anôk bruă kƀĭn ala čar Dak Lak čih yap lu klei blŭ hŏng ai tiê, djŏ hŏng boh sĭt. Dŭm klei đru mguôp srăng dưi bi mklin, mơĭt kơ anôk bruă kƀĭn ala ksiêm dlăng hlăm hdră bi leh dŭm hdră bhiăn, hdră mtrŭn ba mdah ti anôk bi kƀĭn.

Mbĭt hŏng Dak Lak, kahan ksiêm čar Lâm Đồng ăt bi hgŭm hŏng Êpul bi ala bruă kƀĭn ala čar mkŏ mjing klei bi kƀĭn hâo hưn, mkăp klei hâo hưn leh anăn mă klei blŭ mguôp hŏng dŭm hdră bhiăn, hdră mtrŭn mâo Phŭn bruă kahan ksiêm gĭt gai čih mkra.

Klei bi kƀĭn dưi mkŏ mjing klă anăp mguôp hŏng online truh kơ kahan ksiêm dŭm să, ƀuôn hgŭm, wăl krah hlăm čar.

Phung bi ala mđing đru mguôp klei blŭ kơ hră čih Hdră bhiăn Kđi klei (lŏ mlih mrâo), Hdră bhiăn mkŏ mjing anôk bruă ksiêm dlăng klei ngă soh hdră bhiăn (lŏ mlih mrâo) leh anăn hră čih Hdră mtrŭn kơ klei bhiăn, hdră êlan mdê hjăn msir mghaih klei ngă soh djŏ tuôm hŏng bruă duh mkra knŭk kna, bruă duh mkra êngao knŭk kna, ba yua klei kreh knhâo, kdrăp mrâo, mlih mrâo mbruă leh anăn bi mlih mrô.

Lu klei blŭ lač bruă mkra mlih, thiăm mbŏ dŭm klei čuăn hdră bhiăn jing klei čiăng êdi hlăm wưng bi mlih mrô, mkŏ dăp anôk bruă leh anăn hluê ngă gru hmô bruă sang čư̆ êa alŭ wăl dua gưl, mơ̆ng anăn mjing tur knơ̆ng hdră bhiăn hrăm mbĭt, mkăp djŏ hŏng klei čiăng rơ̆ng klei êđăp ênang leh anăn mđĭ kyar bruă duh mkra - ala ƀuôn.

Dŭm klei blŭ sĭt êmĭt, djŏ hŏng boh sĭt mâo leh Êpul bi ala bruă kƀĭn ala dŭm čar bi mguôp, ba truh kơ Bruă kƀĭn ala leh anăn dŭm anôk bruă čih mkra čiăng lŏ dơ̆ng ksiêm duah, bi leh dŭm hdră bhiăn êlâo kơ ba mdah kơ Bruă kƀĭn ala ksiêm dlăng. Mơ̆ng anăn, lŏ dơ̆ng bi mklă bruă klam mơ̆ng Êpul bi ala bruă kƀĭn ala hlăm bruă mđing hmư̆, tŭ mă klei blŭ mnuih ƀuôn sang leh anăn ba ai êwa mơ̆ng boh sĭt Lăn Dap Kngư truh kơ anôk bi kƀĭn./.