Thŭn 2018, Y- Vui Ayŭn ba anăp nao mŭt ngă kahan ƀuôn ti să Ea Kao, ƀuôn prŏng Buôn Ma Thuột. Êbeh 6 thŭn mŭt hlăm êpul anei, ñu mâo nanao klei hur har, amâo mâo mđing kơ klei dleh dlan, jih ai tiê nao hlăm klei mjuăt bi hriăm, mprăp ai tiê kơ klei bi blah, ngă jăk bruă đru čung ba mnuih ƀuôn sang, rơ̆ng kơ bruă răng mgang klei êđăp ênang hlăm ƀuôn sang, đru hlăm bruă mdrơ̆ng hŏng klei yan adiê ngă. Boh nik, hlăm gưl mâo klei ruă tưp hlăk thŭn 2020 lehanăn 2021, ñu ba akŏ hlăm krĭng mâo klei ruă tưp đru jih jang mnuih nao hlăm bruă mdrơ̆ng hŏng klei ruă tưp.

Mbĭt hŏng anăn, ñu jih ai tiê nao ngă hma mđĭ kyar klei hdĭp gŏ sang pô. Hŏng 1 ha kphê pla mbĭt pluă mâo boh durian, ară anei hlăm grăp thŭn đang hma ñu mâo ba wĭt prăk mnga truh 300 êklăk prăk. Ñu yăl dliê, kyua ngă jăk bruă mâo jao, lehanăn duh ƀơ̆ng thâo, thŭn 2022, ñu jing leh mnuih kdlưn hĭn hlăm mnuih ƀuôn sang, mâo leh êpul bruă Đảng ƀuôn Huê, să Ea Kao brei nao hriăm klei bhiăn Đảng lehanăn mâo mŭt hlăm Đảng êdei sa thŭn kơ anăn.  Đảng viên Y -Vui lač:

“Leh mâo mŭt hlăm Đảng, kâo bŏ hŏng klei mơak snăk. Kâo gĭr nanao čiăng bi leh jih jang bruă mâo jao, lehanăn ba akŏ hlăm klei duh ƀơ̆ng čiăng bi hrŏ ƀun. Leh jing đảng viên, kâo ăt gĭr nanao, hriăm mjuăt čiăng bi leh bruă čuăn”.

Hlăm thŭn 2023, knŏng hjăn anôk bruă kiă kriê kahan să Ea Kao, mâo leh 3 čô kahan ƀuôn mâo mŭt hlăm Đảng. Jih jang jing phung tŭ kdlưn mâo leh êpul bruă kiă kriê bruă lĭng kahan să Ea Kao mâo bi mŭt hlăm thŭn 2023, đảng viên Nguyễn Thanh Tùng, bŏ hŏng klei mơak lač:   

“Hŏng bruă klam jing đảng viên, kâo ngă jăk jih bruă pô hlăm sang lehanăn wăt hlăm anôk bruă. Asei mlei kâo pô hlue gưt jăk bruă klam mơ̆ng kahan ƀuôn, mjuăt bi hriăm bruă kahan, bi leh bruă jao mơ̆ng êpul bruă Đảng, mơ̆ng êpul khua kiă kriê bruă kahan să, nao hlăm bruă răng mgang klei êđăp ênang ti să lehanăn ƀuôn”.

Să Ea Kao mâo 14 boh alŭ ƀuôn, hŏng êbeh 20.000 čô mnuih, hlăm anăn mâo hlăm brô 45 % jing mnuih djuê ƀiă. Bruă Đảng să mâo giăm 350 čô đảng viên, bi mguôp ti 23 êpul bruă Đảng nah gŭ. Y-Mnông Hđơ̆k- Khua bruă Đảng să brei thâo, ngă jăk bruă bi mŭt Đảng, boh nik hlăm êpul kahan ƀuôn, dŭm êpul bruă Đảng, snăn êpul bruă Đảng mâo leh klei kăp đru kčĕ kơ bruă Đảng să, mbha bruă kơ phung đảng viên kăp tui ksiêm klei hriăm mjuăt, lehanăn atăt kơ klei bi mŭt hlăm Đảng. Y- Mnông lač: 

“Thŭn 2024 mâo bi mŭt leh 2 čô đảng viên mơ̆ng êpul kahan ƀuôn. Ară anei êpul kiă kriê bruă kahan să, mâo ktrâo atăt leh dua čô jing mnuih tŭ kdlưn   ngă hră mơar mprăp kơ klei bi mŭt hlăm đảng, lehanăn năng ai ti 3 mlan gưl tal III srăng bi mŭt yơh.”

Ƀuôn prŏng Ƀuôn Ama Thuôt mâo 13 boh ƀuôn hgŭm lehanăn 8 să, hŏng giăm 400 êbâo čô mnuih, hlăm anăn mâo hlăm brô 1.900 jing kahan ƀuôn, jing leh đảng viên truh 25%. Tui si Thượng tá Mai Văn Khuê, K’iăng khua bruă Đảng anôk bruă lĭng kahan ƀuôn prŏng Ƀuôn Ama Thuôt - Pô ngă bruă kđi čar anôk bruă kahan ƀuôn prŏng lač, čiăng mkŏ mjing êpul kahan ƀuôn kjăp mâo klei thâo hlăm bruă kđi čar, lehanăn kjăp ai tiê kơ bruă mprăp kơ klei bi blah, snăn bruă hrŏng ruah, mjing êpul pioh kơ bruă bi mŭt hlăm  đảng mơ̆ng êpul anei, leh mâo bruă Đảng ƀuôn prŏng lehanăn dŭm êpul bruă đảng nah gŭ  mđing kơ bruă bi mŭt đảng viên mrâo.

Thượng tá Mai Văn Khuê brei thâo, čiăng kơ phung đảng viên hlăm êpul kahan ƀuôn mâo bi mŭt kjăp, snăn êpul bruă Đảng, êpul khua kiă kriê bruă kahan ƀuôn prŏng, mâo leh klei kăp kčĕ kơ êpul khua kiă kriê bruă Đảng ƀuôn prŏng mâo dŭm asăp mtrŭn hyuă kjăp hĭn kơ bruă răng mgang klei êđăp ênang, bi klă ênoh čuăn mta kñăm, hnơ̆ng ênoh čiăng mâo bi mŭt hlăm đảng mơ̆ng êpul anei bi djŏ hŏng hdră kčah.

“Hmei bi mguôp leh hŏng êpul bruă Đảng ƀuôn prŏng jao ênoh čuăn kơ dŭm êpul bruă Đảng dŭm boh să, ƀuôn hgŭm grăp thŭn djăp alŭ wăl mâo ênoh čuăn bi mŭt ƀiă êdi mơ̆ng 2 čô đảng viên kơ dlông. Siămdah boh sĭt ară anei, mâo leh lu êpul êya mâo bi mŭt mơ̆ng 3 - 4 čô 4 đảng viên.”

Hŏng bruă mđing rŭ mdơ̆ng lehanăn bi mŭt đảng viên hlăm êpul kahan ƀuôn ti ƀuôn prŏng Ƀuôn Ama Thuôt, phung knuă druh nah gŭ kreh lŏ bi kjăp nanao lehanăn amâo mâo mdei mđĭ bi lar. Klei thâo hlăm bruă kiă kriê, ai ktang hlăm klei bi blah mơ̆ng dŭm êpul bruă Đảng lehanăn jih jang phung đảng viên hlăm lĭng kahan amâo mâo mdei dưi mđĭ kyar, đru ngă leh jăk bruă răng mgang klei êđăp ênang hlăm alŭ wăl./.