Ti ƀuôn hgŭm Pà Co, čar Phú Thọ, Sùng A Chênh, khua dlăng bruă Đảng, khua Êpul gơ̆ng bruă ƀuôn sang ƀuôn hgŭm brei thâo: Bruă knuă druh mâo bruă Đảng ƀuôn hgŭm bi klă jing bruă klam phŭn. Leh bi mŭt dŭm anôk bruă knŭk kna, să ngă klei ksiêm dlăng kluôm, ksiêm wĭt êpul knuă druh leh anăn mâo hdră êlan dap brei găl guôp hŏng klei thâo dưi mtô leh anăn klei čuăn êjai ngă gru hmô Bruă sang čư̆ êa jĕ hŏng mnuih ƀuôn sang.

Čiăng bi mâo djăp hlăm wưng kơ anăn leh anăn rơ̆ng kơ Bruă sang čư̆ êa dua gưl ngă bruă jăk hŏng dŭm să taih kbưi, hmei đru kčĕ hŏng čar, gưl dlông mâo dŭm hdră êlan iêo jak knuă druh wĭt ti krĭng mnuih djuê ƀiă, krĭng taih kbưi, hŏng dŭm mta bruă jing klei hưn mthâo mrâo mrang, lăn ala, dhar kreh yang ƀuôn, anăn jing dŭm ai dưi alŭ wăl čiăng êdi.

Mđing kơ bruă mtô mjuăt knuă druh mnuih djuê ƀiă, bi mâo djăp klei čiăng mlih mrâo hnơ̆ng jăk knuă druh mơ̆ng nah gŭ jing tur knơ̆ng čiăng kơ krĭng čư̆ čhiăng, krĭng mnuih djuê ƀiă kpưn đĭ ktang hlăm wưng kơ anăp.

Lê Anh Đức, k’iăng khua knơ̆ng bruă kiă kriê bruă knuă čar Lào Cai brei thâo: Hŏng boh sĭt jing čar čư̆ čhiăng, krĭng knông lăn, lu djuê ana, čar bi klă čiăng đĭ kyar pral leh anăn hơĭt kjăp, sa hlăm dŭm bruă klam phŭn jing mkŏ mjing êpul knuă druh, boh nik jing knuă druh gĭt gai, kriê dlăng nah gŭ mâo knhuah kđi čar hơĭt kjăp, mâo klei mĭn mlih mrâo, mâo ai dưi kriê dlăng mrâo mrang, mâo klei thâo, jhŏng mĭn, jhŏng ngă, jhŏng đua klam leh anăn thâo klă kơ boh sĭt alŭ wăl.

Mrâo anei, Klei kƀĭn bruă Đảng čar Lào Cai gưl tal 1, wưng thŭn 2025 – 2030 bi klă leh hdră mtrŭn kơ dŭm mta kñăm, bruă klam hlăm wưng kơ anăp, hlăm anăn mâo klei mĭn gĭt gai kơ hdră mkŏ mjing bruă knŭk kna dŭm gưl leh anăn êpul phung knuă druh, đảng viên, anăn jing Mkŏ mjing bruă knŭk kna jĕ giăm hŏng mnuih ƀuôn sang, kpă ênô, ngă bruă tŭ dưn, êpul knuă druh, phung mă bruă thơ̆ng, mâo klei thâo, jih ai tiê, ngă bruă kyua mnuih ƀuôn sang”.

Mbĭt anăn bi klă 1 hlăm 5 bruă klam kñăm jing mkŏ mjing êpul knuă druh, boh nik jing khua kiă kriê dŭm gưl, pô ba anăp mâo djăp klei thâo, ai dưi, mâo klei mĭn đĭ kyar, klei čŏng pô leh anăn mâo klei gĭr ktưn, năng hŏng bruă klam, mbruă, mâo ai tiê duh myơr, kreh kriăng, mâo klei mĭn, jĕ giăm hŏng mnuih ƀuôn sang, mđing kơ knuă druh mda asei, knuă druh mniê, knuă druh mnuih djuê ƀiă. Lač hŏng bruă hluê ngă bruă klam anei, Lê Anh Đức brei thâo:

Jing anôk bruă thơ̆ng kơ bruă, hmei srăng kñăm hlăm dŭm hdră êlan phŭn: Tal 1 jing ksiêm dlăng, mkra mlih, bi mbŏ, bi klă, hrăm mbĭt dŭm klei čuăn, kjăp hlăm klei mă bruă. Tal 2 jing, mđĭ hnơ̆ng jăk klei čuăl mkă, hrŏng ruah leh anăn yua knuă druh, rơ̆ng kơ klei êngiê, klă mngač, tŭ dưn hlăm klei mă bruă knuă leh anăn ai dưi hlăm boh sĭt. Mbĭt anăn mtrŭt mjhar, mâo hdră iêo jak leh anăn krơ̆ng kơ knuă druh mda asei, phung mâo klei thâo.

Ênoh mnuih djuê ƀiă ti čar Lào Cài ară anei mâo hlăm brô 66,2% ênoh mnuih ƀuôn sang hlăm čar. Kyuanăn, bruă mđĭ kyar êpul knuă druh mnuih djuê ƀiă dưi bi klă jing bruă klam phŭn leh anăn sui, mâo boh tŭ dưn yuôm bhăn hlăm bruă bi kjăp bruă kđi čar nah gŭ, rơ̆ng kơ klei hơĭt hlăm mđĭ kyar krĭng tlaih kbưi, knông lăn.