Thŭn 2024, hŏng bruă klam jing anôk bruă kăp kčĕ, mă bruă kơ anôk bruă kƀĭn ala, kơ dhar bruă ghĭt gai bruă kƀĭn ala, Êpul gơ̆ng bruă djuê ana, dŭm êpul bruă hlăm bruă kƀĭn ala, dŭm êpul bruă hlăm dhar bruă gĭt gai bruă kƀĭn ala, adŭ bruă kƀĭn ala mâo ngă lehanăn bi leh lu mta bruă, hlăm anăn mâo dŭm bruă mrâo, bruă mjêč bruă dleh. Adŭ bruă kbĭn ala hmao kăp kčĕ đru kơ klei mă bruă mâo klei tŭ jing hlăm 6 klei anôk bruă kƀĭn ala bi kƀĭn, hlăm anăn mâo 04 klei bi kƀĭn mjêč, lehanăn 2 klei bi kƀĭn dăp djŏ tui si hdră, 33 klei bi kƀĭn mơ̆ng dhar bruă gĭt gai bruă kƀĭn ala; 7 klei bi kƀĭn yuôm bhăn mơ̆ng dhar bruă gĭt gai bruă kƀĭn ala, mbĭt hŏng lu bruă ngă mkăn, mơ̆ng khua bruă kƀĭn ala, phung k’iăng khua bruă kƀĭn ala.

Hŏng dŭm klei gĭr prŏng prĭn, thŭn 2024, adŭ bruă kƀĭn ala mâo leh klei kăp kčĕ, ngă bruă kơ bruă kƀĭn ala mâo bi mklă leh truh 31 hdră bhiăn, 17 hdră mtrŭn djŏ tui si klei bhiăn, mă klei blŭ kơ 21 klei čih mkra hdră bhiăn… đru leh bi pral hlăm jih jang bruă mkŏ mjing hdră êlan mă bruă mơ̆ng Đảng, djŏ hŏng klei jing sĭt hlăm hlăm hdĭp, đru jăk kơ bruă bi leh klei bhiăn, ngă djŏ jih jang mta kñăm mkŏ mjing klei bhiăn mơ̆ng wưng păn bruă, lehanăn mđĭ hĭn bruă duh mkra ala ƀuôn hlăm lăn čar.

Blŭ hrăm gĭt gai ti anôk bi kƀĭn ksiêm wĭt bruă thŭn 2024, hlue ngă bruă kơ thŭn   2025 mơ̆ng adŭ bruă kƀĭn ala, Khua bruă kƀĭn ala Trần Thanh Mẫn čih pioh lehanăn mpŭ mni bruă ngă mơ̆ng adŭ bruă kƀĭn ala, dŭm anôk bruă êpul êya, mâo leh lu klei gĭr, mghaih msir jih jang bruă prŏng, hŏng boh tŭ dưn jăk. Mñă kơ thŭn 2025 jing thŭn mkŏ mjing klei bi kƀĭn prŏng bruă Đảng dŭm gưl, anăp truh kơ klei bi kƀĭn prŏng Đảng kluôm ala tal 14 mơ̆ng Đảng; mprăp kơ klei ruah phung bi ala bruă kƀĭn ala gưl 16 lehanăn ruah phung bi ala êpul gơ̆ng bruă ƀuôn sang dŭm gưl wưng păn bruă 2026 – 2031… kyuanăn, Khua bruă kƀĭn ala Trần Thanh Mẫn mtă kơ adŭ bruă kƀĭn ala, bruă Đảng dŭm anôk bruă, lehanăn bruă Công đoàn lŏ dơ̆ng mđĭ hĭn ai tiê đua klam, mâo klei thâo bi mguôp, hŏng klei mĭn mbruă bi leh jăk bruă kčah jao.

“Êlâo hĭn jing lŏ mlih mrâo hdră êlan mă bruă, bi kjăp dŭm anôk ngă bruă hlăm bruă kƀĭn ala, pral bi leh jih jang bruă hlăm klei dăp khuăt mnuih ngă bruă hlăm dŭm anôk bruă kƀĭn ala, dŭm anôk bruă mơ̆ng dhar bruă gĭt gai bruă kƀĭn ala hŏng klei khuăt kjăp djŏ tui si gưl dlông mtrŭn’.

Khua bruă kƀĭn ala Trần Thanh Mẫn mtă bi ksiêm wĭt jih jang klei mlih mrâo, thiăm mbŏ dŭm klei bhiăn, hdră mtrŭn djŏ tuôm hŏng klei dăp wĭt, bi khuăt êpul mă bruă, mlih mrâo thiăm mbŏ dŭm boh phŭn klei bi kƀĭn, klei bhiăn mă bruă mơ̆ng dhar bruă gĭt gai bruă kƀĭn ala. Lehanăn, lŏ dơ̆ng mđĭ mlih, bi kjăp klei mă bruă, kăp kčĕ ngă jăk bruă hlăm dŭm klei bi kƀĭn; knuă druh, đảng viên, mnuih mă bruă bi păn kjăp klei bhiăn anôk mă bruă, bi kdơ̆ng ktang hŏng klei ƀơ̆ng ngăn, klei ngă amâo mâo djŏ.

Lŏ mñă, phŭn bruă kđi čar mâo leh hdră mtrŭn mrô 57 kơ klei mđĭ kyar kreh knhâo, kdrăp mrâo, ngă bruă bi mlih mrô hlăm kluôm ala. Khua bruă kƀĭn ala mtă brei mđĭ hĭn klei thâo ba yua kdrăp mă bruă mrâo mrang, lehanăn klei bi mlih mrô hlăm klei mă bruă hlăm anôk bruă kbĭn ala, mđrĭng hŏng klei bi mlih hdră êlan mă bruă, mă bruă hŏng klei klă mngač, mkŏ jih jang bruă ngă hŏng klei pral, tŭ jing.

 Khua bruă kƀĭn ala đăo knang, hŏng klei thâo gĭr duh myơr amâo mâo mdei mơ̆ng phung knuă druh, mnuih mă bruă dŭm anôk bruă kƀĭn ala, boh nik êjai dôk ngă klei mlih mrâo ară anei, wăt hŏng jih bruă kđi čar hlăk dôk ngă hdră mtrŭn mrô 18, čiăng snăk mơ̆ng grăp čô knuă druh, đảng viên mơ̆ng anôk bruă Đảng, công đoàn bi păn kjăp ai tiê klei mĭn, đăo knang kơ klei Đảng kiă kriê, hlue ngă tŭ jing jih jang mta kñăm.

Khua bruă kƀĭn ala ăt mtă, kơ phung knuă druh, mnuih mă bruă hlue ngă kjăp asăp mtrŭn mơ̆ng êpul khua kiă kriê bruă Đảng kơ bruă mprăp drông Tết Ất Tỵ thŭn 2025, rơ̆ng mâo ngă hŏng klei jăk, djăp ênŭm, djŏ mta mtrŭn, êđăp enang lehanănb mghaih msir bi jăk ya mta klei amâo mâo djŏ, boh nik hlăm wưng Tết Nguyên đán; čiăng kơ adŭ bruă kƀĭn ala mâo klei mđing, dlăng kriê djăp ênŭm Tết kơ knuă druh, mnuih mă bruă, mâo sa yan Tết h’uh mđao, mơak mñai, jăk yâo, êđăp ênang lehanăn mkiêt mkriêm./.