Lu anôk mkŏ mra, wăl krah dưi rŭ mdơ̆ng lu thŭn leh ƀiădah amâo mâo mnuih dôk. Lu anôk bruă êbeh, dŭm hdră bruă knŭk kna, rŭ mdơ̆ng hŏng ngăn prăk knŭk kna lui êruh…Boh klei anei amâo djŏ knŏng bi luč liê ngăn prăk ƀiădah lŏ bi hrŏ klei đăo knang mơ̆ng mnuih ƀuôn sang hŏng klei gĭt gai mơ̆ng Đảng, klei kriê dlăng knŭk kna.

Sa hlăm dŭm phŭn agha ngă kơ bruă ngă klei mkiêt mkiêm, mkhư̆ klei luč liê adôk êdu kƀah jing klei kiă kriê ka dưi mâo djăp hŏng klei čiăng. Hdră bhiăn ngă klei mkiêt mkiêm, mkhư̆ klei luč mang ka klă sĭt nao hlăm klei hdĭp kyua dŭm klei čuăn knŏng mâo knhuah hdră bhiăn, kƀah dŭm hdră êlan brei ngă, bruă klam klă klơ̆ng ngă truh hŏng klei ka dưi ngă, lu jing adôk knang kơ klei mĭn, bruă klam khua anôk bruă, êpul bruă leh anăn mơ̆ng grăp čô knuă druh, phung mă bruă knŭk kna, grăp čô, grăp gŏ sang. Hoàng Văn Cường, Khua hlăm dhar bruă duh mkra leh anăn ngăn prăk mơ̆ng Bruă Kƀĭn Ala brei thâo:

 “Klă sĭt êjai drei ngă hdră bhiăn mkiêt mkriêm, mkhư̆ klei luč liê mang adôk mâo knhuah khă bi mâo, knŏng jing hră mơar, mâo knhuah knŏng jing klei hưn mdah djŏ hdră bhiăn. Ti alŭ wăl, anôk bruă grăp krĭng mâo dŭm mta jing klei luč mang, dŭm klei dôk mâo bruă thŭn êdei dưi kñăm leh kơ bruă anăn ka mâo ôh.

Ti anăp klei anei, dhar Bruă Kƀĭn Ala boi klă hưn mdah hŏng Bruă Kƀĭn Ala ksiêm dlăng, mkra mlih kluôm hdră bhiăn ngă klei mkiêt mkriêm, mkhư̆ klei luč mang hlăm klei kƀĭn tal 10 anăp anei. Mta kñăm jing srăng mkŏ mjing tur knơ̆ng hdră bhiăn kluôm dhuôm, hơĭt kjăp kơ klei mkiêt mkriêm hlăm djăp mta bruă, grăp čô knuă druh leh anăn mnuih ƀuôn sang, mkŏ mjing klei mlih hlăm klei mkiêt mkriêm, mkhư̆ klei luč mang. Hluê si pô bi ala Bùi Hoài Sơn, êpul bi ala ƀuôn prŏng Hà Nội, čiăng kơ dŭm klei čuăn hdră bhiăn amâo djŏ knŏng dôk hlăm hră mơar čiăng mâo hdră ksiêm dlăng, ktuê dlăng kjăp:

 “Čiăng mâo dŭm hdră êlan nao mbĭt hŏng bruă klam, ăt msĕ mơh klei ksiêm dlăng klă klơ̆ng. Mơ̆ng anăn, ngă mbĭt klei pah mni hŏng klei ƀuah mkra hŏng klei djŏ guôp, klă pô, klă bruă. Jih jang dŭm klei anăn čiăng dưi ngă hŏng klei kluôm dhuôm čiăng mkŏ mjing klei sa ai kơ klei mkiêt mkriêm, mkŏ mjing dhar kreh mkiêt mkriêm, tinăn bi klă knhuah hdĭp, bruă klam amâodah dŭm mta mkăn nao klă klơ̆ng hĭn.

Hdră bhiăn mkiêt mkriêm, mkhư̆ klei luč mang mkra mlih anăp anei dưi hmăng hmưi srăng mkŏ mjing hdră bhiăn klă mngač, tŭ dưn, mđĭ hĭn klei thâo săng leh anăn bruă klam mơ̆ng yang ƀuôn hlăm klei mkiêt mkriêm, khư̆ klei luč mang, čiăng ba lăn čar nao hlăm ênuk đĭ kyar hơĭt kjăp./.