Mơ̆ng boh sĭt, mkŏ dăp alŭ, ƀuôn ba ưĭt lu boh tŭ dưn klă sĭt. Tơdah bi hrŏ ênoh alŭ, ƀuôn, anôk bruă srăng khuăt hĭn, bruă kriê dlăng mŏng anôk bruă Đảng, bruă knŭk kna gưl să srăng pral hĭn. Mbĭt anăn, ngăn prăk kơ êpul knuă druh thơ̆ng kơ lu bruă ăt dưi mkiêt mkriêm čiăng mđing kơ dŭm hdră đru, hdră mtrŭn kơ phung knuă druh leh mkŏ dăp. Kơiăng nai prŏng, nai prĭn Ngô Thành Can, Nai mtô ti Sang hră ksiêm hriăm bruă ngă hră mơar lehanăn kriê dlăng bruă knŭk kna, hlak mblang:

 Mkŏ dăp alŭ, ƀuôn, êlâo hĭn brei mkăp djŏ hŏng klei čiăng kluôm mơ̆ng gru hmô ngă bruă mơ̆ng anôk bruă knŭk kna alŭ wăl dua gưl leh mkŏ dăp. Tal dua jing bi mklă jing hdră dăp čiăng bi khuăt anôk bruă, bi hrŏ anôk bruă dôk krah wah. Mta mkăn brei drei mđing jing, anei jing klei kơ mnuih mă bruă, đru kơ drei bi khuăt mnuih mă bruă djŏ hŏng klei čiăng đĭ kyar kluôm”.

Hluê si Nguyễn Thị Tú Thanh, Kơiăng khua knơ̆ng ksiêm dlăng bruă knŭk kna alŭ wăl, Phŭn bruă ksiêm dlăng bruă knuă, anei jing mta phŭn yuôm bhăn, hmăi truh kơ bruă mkŏ mjing, hdră mă bruă gưl nah gŭ. Kyua anăn, bruă čih mkra hdră mtrŭn kơ hdră ngă bruă mơ̆ng alŭ, ƀuôn lehanăn dŭm hdră mtrŭn hŏng mnuih amâo mă thơ̆ng kơ bruă ti alŭ, ƀuôn mao ksiêm dlăng klă klơ̆ng lehanăn dưi bi mklă kluôm hlăm klei čiăng bi khuăt anôk bruă, ba yua tŭ dưn djăp klei găl mâo, djŏ guôp hŏng klei bi knar mơ̆ng ngăn prăk alŭ wăl.

Hluê ngă hdră êlan mtrŭn mơ̆ng Đảng kơ bruă mkŏ dăp alŭ, ƀuôn, Phŭn bruă ksiêm dlăng bruă knuă mâo KNŭk kna jao čih mkra Hdră mtrŭn kơ bruă mkŏ mjing lehanăn hdră ngă bruă mơ̆ng alŭ, ƀuôn lehanăn hdră mtrŭn hŏng mnuih amâo thơ̆ng kơ bruă čiăng mjing tur knơ̆ng kơ dŭm alŭ wăl mkŏ mjing, hluê ngă hlăm wưng ti anăp. Hdră êlan kluôm hlăm bruă mkŏ dăp, alŭ, ƀuôn jing hluê hdră bi khuăt anôk bruă, bi hrŏ ênoh alŭ, ƀuôn lehanăn rơ̆ng djŏ guôp hŏng boh sĭt, hŏng grăp krĭng lehanăn mđĭ boh tŭ hdră mă bruă ti gưl nah gŭ, mjing klei găl kơ bruă mkŏ mjing, hluê ngă dŭm bruă klam lehanăn bi hrŏ klei kpĭ hlăm hdră kriê dlăng klă anăp mơ̆ng anôk bruă knŭk kna gưl să.

Hdră mđing phŭn hlăm bruă mkŏ dăp alŭ, ƀuôn dưi bi êdah hlăm 3 mta klei phŭn: Tal sa, jing bi khuăt êpul knuă druh mnuih mă bruă amâo thơ̆ng kơ bruă; Tal dua, jing mđing kơ djăp klei găl mâo duh lehanăn mđing kơ klei bhiăn hlăm bruă dhar kreh; Tal tlâo, mđĭ klei thâo čŏng kriê dlăng mơ̆ng êpul êya. Khă snăn, grăp klei bi mlih hlăm bruă ngă hră mơar, anôk bruă, knhal tuič čiăng mding truh kơ sa mta kñăm phŭn: Jing mkăp hdră ngă bruă kơ mnuih ƀuôn sang jăk hĭn. Leh hdră mkŏ dăp, ênoh mnuih đĭ, bruă ruah mnuih kiă kriê alŭ, ƀuôn dưi ruah kjăp hĭn mơh. Anei jing mnuih klă sĭt mâo kơhưm, mâo klei thâo, giăm mnuih ƀuôn sang, jĕ giăm hŏng mnuih ƀuôn sang. Nguyễn Tiến Dĩnh, Kơiăng khua phŭn bruă ksiêm dlăng bruă knuă ala čar hđăp, brei thâo:

Brei bi mklă kjăp klei đua klam, ngă bruă kjăp hĭn, brei drei čih mkra hdră kčah klă klơ̆ng. leh hdră mkŏ dăp alŭ ƀuôn mâo hnơ̆ng prŏng snăn ênoh bruă mă srăng lu hĭn mơh. Kyua anăn dôk čiăng hŏng phung khua kiă kriê alŭ, ƀuôn jing prŏng, brei mđĭ hnơ̆ng ngă bruă mơh. Tal dua jing bi mklă bruă klam mơ̆ng khua alŭ, ƀuôn hluê djŏ hdră mtrŭn mơ̆ng gưl dlông.

Bruă bi leh hdră mkŏ dăp alŭ, ƀuôn hlăm 3 mlan gưl 2 thŭn anei jing bruă klam kđi čar yuôm bhăn, dôk čiăng klei sa ai mơ̆ng klei mĭn Đảng truh kơ ai tiê mnuih ƀuôn sang. djăp klei bi mlih amâo tlaih đuê̆ ôh klei dleh dlan tal êlâo, ƀiădah, hŏng klei gĭt gai kjăp mơ̆ng Gưl dlông, klei mprăp, klei pral mơ̆ng bruă knŭk kna nah gŭ mbĭt hŏng klei thâo săng mơ̆ng mnuih ƀuôn sang, klă sĭt leh hdră mkŏ dăp alŭ, ƀuôn srăng ngă bruă jăk hĭn, mbĭt hŏng bruă knŭk kna alŭ wăl dua gưl, mơ̆ng anăn mjing klei găl kơ hdră mđĭ kyar anôk bruă nah gŭ, kriê dlăng ala ƀuôn ti alŭ wăl./.