Hlăm anăn kriê dlăng, êpul êdam êra să lač kdriêk Kỳ Sơn mâo êbeh 421 êpul êdam êra, ƀiădah boh sĭt, grăp blư̆ pŏk ngă dŭm bruă ngă phŭn snăn ênoh bi kƀĭn knŏng mâo mkrah wah, kyua anăn, êpul êdam êra să tuôm hŏng lu klei dleh dlan čiăng dưi mâo boh tŭ msĕ si klei kčah leh. Ayŏng Lương Văn Tạc, khua dlăng bruă êdam êra să Phà Đánh, kdriêk Kỳ Sơn, Nghệ An brei thâo: Nao ngă dŭm mta bruă êdam êra, bruă phung êdam êra grăp thŭn snăn kƀĭn ăt kăn mâo lu mơh kyua diñu nao mă bruă kbưi sơăi leh anăn truh Têt kơ wĭt lu.

Boh klei msĕ si să lač ară anei dôk mâo hlăm lu dŭm kdriêk kwar yŭ Nghệ An. Bruă anei amâo djŏ knŏng ngă kƀah mnuih mă bruă hlăm dŭm mta bruă êdam êra ôh, hlăm klei msir klei ư̆ êpa lăm lui klei ƀun knap hlăm krĭng taih kbưi ôh, ƀiădah lŏ hmăi lu kơ hdră mđĭ kyar đảng viên jing mnuih djuê ƀiă. Ayŏng Nguyễn Đình Thuận, Khua bruă êdam êra kdriêk Quỳ Hợp, Nghệ An brei thâo: Ênoh ti alŭ wăl ƀiă lu ñu hmăi kơ bruă bi kƀĭn hlăm êpul bruă ăt mseư mơh hlăm klei hlue ngă hdră bruă ti alŭ wăl.

Bi amai Lữ Thị Băng Châu, Khua dlăng bruă êdam êra kdriêk Con Cuông Nghệ An: Klei mĭn leh anăn klei thâo săng phung êdam êra hŏng klei thâo kơ klei mđĭ kyar bruă duh mkra snăn adôk kƀah, kyua anăn dŭm gru hmô êdam êra mđĭ kyar bruă duh mkra adôk điêt, hliê leh anăn ka đei tŭ dưn.

Mđing truh kơ hdră kñăm msir mgaih bruă mă phung êdam êra mnuih djuê ƀiă, gưl bruă Đảng, bruă sang čư̆ êa dŭm gưl leh anăn êpul bruă êdam êra ti Nghệ An mkŏ mjing leh lu hdră đru kơ phung êdam êra mnuih djuê ƀiă ti alŭ wăl amâodah êdam êra wĭt kơ ƀuôn sang mphŭn čô̆ kơ bruă, mă bruă mđĭ kyar bruă duh mkra, grăp knhuang kpưn đĭ kơ mdrŏng ti ƀuôn sang. Ayŏng Vi Thái Thuận, Khua bruă êdam êra kdriêk Kỳ Sơn, Nghệ An brei thâo: Anôk bruă êdam êra kdriêk mđĭ lar dŭm ai dưi čiăng đru kơ phung êdam êra hlăm hdră mphŭn čô̆ kơ bruă. Êngao anăn snăn anôk dlăng bruă êdam êra kdriêk srăng lŏ dơ̆ng mđing dlăng, bi hgŭm hŏng dŭm dhar bruă êpul bruă bi hriăm mtô mbruă ƀiă hruê mlan leh anăn sui, leh anăn pŏk dŭm adŭ hriăm mjuăt ba jao klei kreh knhâo hdră mnêč kơ phung êdam êra čiăng đru kơ phung êdam êra mphŭn čô̆ kơ bruă.

Thŭn 2016, Mong văn Sơn bi mklă wĭt ti ƀuôn Phà Khảo, čan prăk knŭk kna đru ba ala ƀuôn, knơ̆ng prăk lŏ hma, duh bi liê rông êmô, kbao. Mphŭn mơ̆ng 1 drei kbao leh anăn 3 drei êmô leh anăn mâo bruă sang čư̆ êa să Phà Đánh mjing klei găl mkŏ mjing wăl rông phưi 3 ha, truh ară anei, ñu mâo leh lu drei mnơ̆ng rông grăp thŭn mâo prăk hrui wĭt êbeh 100 êklăk. Hŏng klei kriăng, gĭr, Mong văn Sơn jing gru hmô êdam êra ngă bruă duh mkra mbruă mơ̆ng alŭ Phà Khảo ăt msĕ mơh mnuih ƀuôn sang Khơ Mú kdriêk Kỳ Sơn. Ayŏng Mong Văn Sơn mơak brei thâo: Kâo duh bi liê rông kbao, êmô, phung êdam êra ăt đru brei čan prăk leh anăn phung êdam êra mphŭn čô̆ kơ bruă ăt mkŏ mjing dŭm adŭ hriăm mjuăt kơ hdră rông mnơ̆ng leh anăn kriê dlăng. Kâo ăt tui hriăm hdră rông kbao, êmô anăn kâo ba yua.

Čiăng pŏk ngă dŭm mta bruă đru kơ phung êdam êra mnuih djuê ƀiă, mkŏ mjing bruă mă kơ phung êdam êra mđĭ kyar bruă duh mkra ăt msĕ mơh đru hlue ngă bruă msir klei ư̆ êpa bi hrŏ klei ƀun knap ti alŭ wăl lehanăn kơrŭ wĭt, mđĭ lar ai tiê ba anăp jhŏng mĭn, jhŏng ngă, jhŏng kơrŭ wĭt mơ̆ng êpul êdam êra jing yuôm bhăn snăk. Hŏng êpul êdam êra să Minh Hợp, kdriêk Quỳ Hợp, đru mkŏ, mâo mjing bruă mă kơ êdam êra mnuih djuê ƀiă dưi yap jing sa hlăm dŭm bruă yuôm bhăn hlăm phung êdam êra mphŭn čô̆ kơ bruă mơ̆ng êpul êdam êra. Êngao kơ bruă mkŏ mjing dŭm gru hmô êdam êra să Minh Hợp hlăk bi mlih hdră duh mkra pla mjing hlăm phung êdam êra, mơ̆ng anăn đru hlăm bruă hlue ngă hdră mtrŭn klei bi kƀĭn bruă đảng să wưng 2020-2025.

Tơdah mâo hdră êlan hmao đru, dưi mjing klei găl kơ bruă mkra mjing leh anăn klei thâo snăn phung êdam êra mnuih djuê ƀiă srăng gĭr ktưn amâo tlaih ƀun ba klei đĭ kyar kơ gŏ sang đuč ôh ƀiădah lŏ jing sa êpul kmeh gơ̆ng đru mguôp hlăm bruă hlue ngă dŭm hdră êlan mđĭ kyar bruă duh mkra ala ƀuôn ti alŭ wăl./.