Mđing truh kơ mta kñăm anei, dŭm gưl bruă bruă Đảng mơ̆ng ƀuôn prŏng truh kơ ƀuôn hgŭm leh anăn ƀuôn Plei Ôp mâo leh klei gĭt gai, ktrâo lač bruă sang čư êa leh anăn mnuih ƀuôn sang ti ƀuôn Plei Ôp hluê ngă dŭm mta bruă klă klơ̆ng. Čiăng thâo săng klă hĭn kơ klei gĭr anei, hlăm kdrêč Mkŏ mjing Đảng hruê anei, hmei mâo klei blŭ hrăm hŏng Rơ Châm Thót – khua bruă đảng nah gŭ ƀuôn Plei Ôp, ƀuôn hgŭm Hoa Lư, ƀuôn prŏng Pleiku kơ mta phŭn anei.

- Ơ Rơ Châm Thót- Khua bruă Đảng ƀuôn Ốp- ƀuôn hgŭm Hoa Lư, Ƀuôn prŏng Pleiku, ară anei, Plei Ốp si klei găl mâo čiăng mkŏ mkra krĭng ƀuôn sang mrâo lehanăn mđĭ kyar bruă hiu čhưn ênguê dhar kreh jiă knhuah gru djuê ana Jrai?

Ară anei Plei Ốp adôk mâo lu klei găl snăk , lehanan mđĭ kyar. Tal êlâo jing, ƀuôn mâo dua boh sang roong, kơ klei duh ƀơ̆ng mâo klei mđĭ kyar jăk mơh, mbĭt hŏng anăn jing giăm hŏng krah ƀuôn prŏng, giăm hŏng sang êa drao, sang hră mơar, êlan klông găl ênưih mâo pui kmlă mtrang mngač jăk, snăn klei hdĭp jing jăk hĭn sơăi. Plei Ốp ară anei mâo truh 125 gŏ êsei lehanăn êbeh 600 čô mnuih, hlăm anăn mnuih djuê ana Jrai jing êbeh 80 gŏ êsei lehanăn mnuih Bahnar 20 gŏ êsei dŭm adôk jing mnuih djuê lar. Kyua mâo klei thâo bi mguôp mơ̆ng jih jang mnuih, snăn klei hdĭp mda mâo klei đĭ kyar lehanăn dưi bi leh mta kñăm mkŏ mkra krĭng ƀuôn sang mrâo. Hmei kreh mkŏ mjing nanao klei bi kƀĭn mtô mblang čiăng kơ mnuih ƀuôn sang mâo klei thâo bi mguôp, mđrăm mbĭt bi leh mta kñăm mkŏ mkra krĭng ƀuôn sang mrâo, khădah adôk kƀah lu mta mnơ̆ng, boh nik klei kơ prăk kăk čiăng lŏ mkra êlan klông pioh êrô êbat jăk hĭn.

-Hŏng klei bruă Đảng kiă kriê, mâo bruă sang čư̆ êa, snăn wưng leh êgao ya dŏ Plei Ốp mâo leh jing êdah hĭn êdi?

Ară anei Plei Ốp mâo lu klei bi mlih. Yap mơ̆ng thŭn 2017 - 2020, klei duh mkra dơ̆ng mâo klei bi mlih, mâo lu sang dơ̆ng dưi mdơ̆ng kjăp siam, tal dua jing tloh blei êdeh kang pioh dŭ mdiăng boh mnga bruă lŏ hma, lehanăn duh kơ bruă knuă hlăm pưk hma, tal 3, jing jih jang gŏ êsei hlăm ƀuôn mâo leh sơăi pui kmlă, lehanăn 80% êlan klông mâo mkra hŏng gudrŏng lehanăn betong, lehanăn rĭng čing mâo mprăp leh mơh, ăt adôk djă pioh hlăm sang roong. Tal 4, hlăm ƀuôn mâo sang roong prŏng pioh kơ mnuih ƀuôn sang bi kƀĭn, tal 5, ăt adôk djă pioh pin êa kơ mnuih ƀuôn sang nao djăt yua hlăm grăp hrue, lehanăn dưi dôk djă pioh kjăp jing phŭn êa doh kơ ƀuôn. Plei Ốp ară anei dôk čoh čuăn čiăng bi mâo lu phung hđeh dưi mŭt hriăm gưl prŏng, ară anei knŏng adôk mă 1,2 boh sang ƀun ƀin, mnuih ƀuôn sang dah dju djuăm duam ruă bi băng kơ sang êa drao, blei leh sơăi hră ênua bruă mdrao mgŭn, đa đa mâo knŭk kna mkăp hră ênua anăn, snăn lu ênoh čuăn Plei Ôp dưi bi leh 100%.

- Čiăng kơ Plei Ốp mđĭ kyar jing ƀuôn dhar kreh hiu čhưn ênguê kdlưn hĭng ti ƀuôn prŏng Pleiku, snăn ya dŏ bruă Đảng mâo ngă leh čiăng đru kơ mnuih ƀuôn sang thâo săng bi kriê pioh knhuah gru dhar kreh jăk siam mnuih djuê ana Jrai bi mđrĭng hŏng bruă lăm lui ƀrư̆ djăp mta klei bhiăn yap jing amâo lŏ djŏ ôh, lehanăn đru bi răng mgang wăl hdĭp mda?

Êpul bruă Đảng, khua ƀuôn, phung khua mduôn dôk mđĭ ai mtrŭt mjhar mnuih ƀuôn sang mtă mtăn kơ anak čô pô bi kreh kriăng hriăm hră mơar. Grăp mlan hmei mâo klei bi mguôp čiăng kiă kriê gĭr gai phung đảng viên đru mnuih ƀuôn sang kă ăngpul pui dua nah êlan, bi mdoh êlan klông, tal 3, jing mđĭ ai phung hđeh gĭr hriăm hră mơar. Hmei ăt mâo mơh klei bhiăn kơ ƀuôn jing čiăng kơ jih jang mnuih ƀuôn sang thâo piăt êmiêt hdĭp mda doh, kăp drông tue hriê mơ̆ng kbưi ƀri čiăng hriê dlăng ƀuôn dhar kreh pô. Bi klei djiê brŭ hlăm ƀuôn ăt adôk djă pioh bhiăn đưm dôk luič liê lu, khădah jing gŏ êsei knap mñai, ƀiădah ăt adôk djă pioh nanao klei bhiăn hđăp. Kyuananăn khua ƀuôn, khua bruă Đảng, bruă mặt trận lehanăn jih jang êpul êya mâo leh klei bi kƀĭn čiăng kơ mnuih ƀuôn sang pô thâo săng, lehanăn dơ̆ng bi lui ƀrư̆ ƀrư̆ ya mta jing amâo lŏ djŏ ôh, mâo klei bhiăn ƀuôn čiăng kơ mnuih ƀuôn sang bi tui hlue 2, 3 mta čuăn, lehanăn lĕ amuôn adei anak čô hlăm ƀuôn nao sang hră adôk ƀiă, ƀiă snăk mâo hđeh hriăm truh kơ Gưl prŏng, klei ăt mtă mtăn mơh čiăng kơ jih jang mnuih tui gưt, hlue ngă djŏ hŏng klei knuă druh ƀuôn kiă kriê.

- Hlăm wưng tinăp, lŏ dơ̆ng mkŏ mjing ƀuôn jing anôk jăk kơ tue hiu čhưn ênguê, jiă knhuah gru dhar kreh djuê ana Jrai, snăn si gưl bruă Đảng, bruă sang čư̆ êa, lehanăn mnuih ƀuôn sang Plei Ốp mâo leh?

Tal êlâo hĭn jing kriê pioh knhuah gru dhar kreh, mtô bi hriăm phung hđeh thâo tông čing lehanăn mkŏ mjing dŭm êpul tông čing, êpul kdŏ hlăm ƀuôn, leh kơ anăn jing kriê pioh bruă mkra rup krah hŏng kyâo, bruă pơ̆k mñam, bi năng hŏng anăn jing ƀuôn dhar kreh. Mbĭt hŏng anăn, mtô mblang mtă mtăn kơ mnuih ƀuôn sang tui ngă djŏ hŏng hdră mtrŭn mơ̆ng bruă Đảng, djŏ tui si hdră êlan mơ̆ng Đảng knŭk kna jing mđĭ ai mnuih ƀuôn sang ngă bruă hiu čhưn ênguê, snăn êpul bruă Đảng hmei jĕ giăm hĭn hŏng mnuih ƀuôn sang čiăng kơ mnuih ƀuôn sang thâo ƀuh dŭm klei tŭ dưn mơ̆ng bruă hiu čhưn ênguê, khădah ară dôk găn lu klei dleh dlan dưn mơh, ƀiădah anăp anei hmei srăng gĭr hĭn mghaih msir msir jih.

  Mrâo anei Plei Ốp mâo tŭ mă leh klei duh bi liê mơ̆ng nah dlông kơ bruă rŭ mdơ̆ng sang Roong hŏng betong, ƀiădah ăt tăm hlang, tơdah phung tuê hriê čhưn diñu čiăng dlăng snăk mnuih ƀuôn sang Jrai tông čing, kdŏ suang, hlăm ƀuôn ară anei mâo leh lu klei mdê snăk hŏng ƀuôn mkăn, kyuanăn yơh hmei čiăng bi kriê pioh, msĕ si sang roong bi mâo rĭng čing, bi mâo hgơr, mâo bung bai mâo kpur pui, hlăm dŭm hrue mkŏ mjing knăm mơak, bi tông čing čhar čiăng kơ tue hrăm mbĭt hlăp mơak, hlăm Plei Ốp ară anei mâo 2 êpul tông čing, sa êpul mduôn, sa êpul mniê, êpul anei srăng mdah hŏng tue hiu čhưn ênguê, kâo čang hmăng srăng dưi djă pioh nanao.