Hŏng dŭm hdră bruă mă mnơ̆ng hlăm gŭ lăn mâo klei mdê hjăn, pô bi ala Đặng Đức Hiệp, K'iăng khua êpul bi ala bruă kƀĭn ala thơ̆ng kơ bruă čar Lâm Đồng, akâo ksiêm dlăng hdră êlan hrui mă lăn mâo wưng kčah amâodah Knŭk kna mưn lăn mơ̆ng mnuih ƀuôn sang. Hluê si pô bi ala, bruă mă mnơ̆ng hlăm gŭ lăn hlăm ênhă prŏng ti Lâm Đồng djŏ tuôm hŏng lu gŏ sang, hlăk klei mă bruă lu jing hlăm gưl lăn nah dlông hlăm wưng kčah leh anăn dưi lŏ ba wĭt anôk ala. Tơdah hrui mă lăn sui, ênoh prăk bi liê, ruh mgaih anôk ala leh anăn lŏ mkŏ anôk dôk srăng mjing klei kpĭ prŏng hŏng ngăn prăk. Pô bi ala Đặng Đức Hiệp akâo:

"Drei ăt ksiêm duah bruă hrui mă lăn mâo wưng kčah amâodah jing Knŭk kna mưn lăn mơ̆ng mnuih ƀuôn sang čiăng rơ̆ng kơ bruă mă mnơ̆ng hlăm gŭ lăn. Msĕ snăn mhrŏ klei kpĭ kơ ngăn prăk, mhrŏ klei kpĭ tla hnô, msir mghaih anôk ala, lŏ mkŏ anôk dôk, lŏ mkŏ anôk pla mjing; mhrŏ ênoh bi liê mă mnơ̆ng hlăm gŭ lăn čiăng rơ̆ng klei bi ktưn kơ dŭm mta mnơ̆ng mkra mjing êdei anei. Klei anei brei ksiêm duah thiăm mbŏ hlăm hdră bhiăn čiăng mjing klei găl hĭn kơ bruă mă mnơ̆ng hlăm gŭ lăn leh anăn klă klơ̆ng jing mă bô xít ti Lâm Đồng".

Pô bi ala Bùi Xuân Thống, k’iăng khua êpul bi ala bruă kƀĭn ala thơ̆ng kơ bruă čar Đồng Nai, akâo bi klă klei bhiăn kơ lăn dliê, msir mghaih klei bi kpleh ênoh ksiêm yap plah wah dhar bruă lăn ala leh anăn dhar bruă dliê kmrơ̆ng. Pô bi ala mbĭt anăn akâo răng mgang klei tŭ dưn mơ̆ng mnuih tŭ mă klei brei mưn, tŭ mă klei đru mguôp hŏng klei dưi djă yua lăn leh anăn ngăn drăp mguôp hŏng lăn, rơ̆ng dưi lŏ dơ̆ng ba yua djŏ mta kñăm hlăm wưng adôk. Mơ̆ng boh sĭt Đồng Nai, pô bi ala akâo:

"Mơ̆ng boh sĭt mơ̆ng Đồng Nai, dŭm alŭ wăl mâo klei čiăng mă mnơ̆ng hlăm gŭ lăn ngă mnơ̆ng rŭ mdơ̆ng pioh kơ dŭm hdră bruă phŭn, hlăk êjai boh sĭt yua lăn mâo wăt lăn pla ana sui thŭn, lăn pla ana grăp thŭn mkăn. Kyua anăn, akâo amâo guôn knŏng kơ dliê pla mjing jing dliê pla ôh ƀiădah ksiêm duah klei bhiăn hluê hdră kluôm dhuôm dŭm mta lăn djŏ guôp, hlăm anăn mâo lăn pla ana sui thŭn, lăn pla ana grăp thŭn mkăn čiăng mjing tur knơ̆ng hdră bhiăn yua dŭm boh klei sĭt mâo".

Kơ hdră êlan mkra mlih klei bhiăn, Khua knŭk kna Lê Minh Hưng brei thâo hră čih Hdră bhiăn lăn ala lŏ mlih mrâo mkra mlih klă klơ̆ng hdră kah mbha lăn, mđing kơ tlâo êpul phŭn mâo lăn lŏ hma, lăn amâo lŏ ngă bruă lŏ hma leh anăn lăn pioh kơ bruă mđĭ kyar. Hdră kah mbha anei mkăp kơ bruă čuăl mkă leh anăn kriê dlăng knŭk kna, mơ̆ng hrui mă, jao, brei mưn lăn truh kơ mlih mta kñăm yua, tĭng prăk yua lăn, prăk mưn lăn leh anăn mkăp hră dưi yua lăn. Kơ klei čiu hnô, đru leh anăn lŏ mkŏ mjing anôk dôk mrâo, Khua knŭk kna mtă brei mlih mơ̆ng klei mĭn čiu hnô ngăn drăp mâo hrui mă jing mkŏ wĭt klei hdĭp kơ mnuih ƀuôn sang.

"Hdră mtrŭn kčah mtrŭn, mnuih mâo lăn mâo klei hrui mă dưi đru mguôp hŏng lăn mâo mta kñăm yua msĕ hŏng mta kñăm hrui mă lăn mkăn, sang dôk amâodah đru mguôp hŏng prăk. Tal dua jing dưi mđing tal êlâo mkŏ mjing anôk dôk mrâo ti anôk dôk hđăp hŏng dŭm hdră bruă ƀuôn prŏng. Tal tlâo jing dưi bi mlih lăn dôk mâo klei hrui mă jing lăn adôk mơ̆ng kdrêč lăn amâodah jing lăn adôk mơ̆ng kdrêč lăn mkăn hlăm alŭ wăl gưl să anôk mâo lăn hrui mă. Êngao kơ bruă dăp anôk dôk, sang dôk, lŏ jing klei hdĭp, hdră duh ƀơ̆ng, anôk bruă nah gŭ msĕ si anôk bruă dhar kreh, sang hră mơar, mdrao mgŭn snăn kơh dưi rơ̆ng klei čiăng lŏ mkŏ wĭt klei hdĭp kơ mnuih ƀuôn sang tơdah Knŭk kna hrui mă lăn.

Mbĭt hŏng hdră êlan tla hnô, bi mklă ênoh lăn jing mta phŭn hmăi klă anăp kơ klei tŭ dưn mnuih ƀuôn sang, ênoh duh mơ̆ng anôk bruă duh mkra leh anăn hnư hrui wĭt knŭk kna. Bi mklă ênoh lăn brei rơ̆ng kơ klei sĭt, êngiê, klă mngač, klă sĭt, hluê hŏng klei čih pioh lăn ala leh anăn klei čih pioh thơ̆ng kơ bruă, mbĭt anăn bi knar klei tŭ dưn plah wah Knŭk kna, pô yua lăn leh anăn pô duh bi liê. Brei klei blŭ kơ bruă anei, Khua bruă kƀĭn ala Trần Thanh Mẫn mtă brei bi leh klei bhiăn ênoh ênil lăn ala hluê hdră djŏ guôp hŏng wăl anôk mnia mblei ƀiădah ăt rơ̆ng klei hơĭt, klă mngač, ñĕ kơ klei ênoh lăn đĭ pral ngă kơ ênoh prăk tla hnô leh anăn prăk yua lăn đĭ lu, hmăi truh kơ hdră ngă bruă dŭm hdră bruă.

“Thiăm mbŏ klei bhiăn bi kna klei tŭ dưn Knŭk kna, mnuih yua lăn, pô duh bi liê; mâo ênoh mkra mlih krĭng ênoh lăn čuăl mkă klă klơ̆ng. Hră ênoh lăn snăn wưng 5 thŭn amâodah mbruă hĭn jing hưn mthâo hnưm hdră êlan mkra mlih hlăm gưl êjai klei bi mlih prŏng. Mtă brei ksiêm dlăng jing brei mâo klei êngiê, hưn mdah hdră ngă leh anăn mrô phŭn. Bi klă ba yua hră ênoh, leh anăn ênoh mkăp brei, prăk yua, mưn lăn, ñĕ kơ ênoh mđĭ ênoh. Mkŏ mjing anôk bruă mrô ênoh lăn ala čar bi hgŭm, mkăp real-time. Mta kñăm sui thŭn jing bi hrŏ klei kčŭt hưn, luič prăk knŭk kna, klei ktrŏ kơ anôk bruă duh mkra, mnuih ƀuôn sang; mjing klei thâo săng kơ anôk mnia mblei.

Dŭm klei blŭ ti anôk bi kƀĭn brei ƀuh, mkra mlih Hdră bhiăn lăn ala čiăng mguôp kjăp hŏng boh sĭt, boh nik dŭm boh klei hmăi klă anăp kơ klei hdĭp leh anăn klei tŭ dưn mơ̆ng mnuih ƀuôn sang. Bi leh hdră êlan tla hnô, lŏ mkŏ anôk dôk mrâo, tĭng mkă ênoh lăn leh anăn hdră ba yua mnơ̆ng hlăm gŭ lăn amâo djŏ knŏng đru msir klei dleh dlan hlăm bruă kriê dlăng, ba yua lăn ƀiădah lŏ rơ̆ng klei djŏ guôp plah wah Knŭk kna, mnuih ƀuôn sang leh anăn anôk bruă duh mkra, mjing tur knơ̆ng kơ hdră mđĭ kyar bruă duh mkra - ala ƀuôn hơĭt kjăp.