Brei klei blŭ hlăm êpul, Khua bruă kƀĭn ala Trần Thanh Mẫn lŏ mñă ktang kơ bruă brei klei blŭ mguôp hlăm Hdră mtrŭn mơ̆ng Bruă Kƀĭn Ala mkă mlih, bi mbŏ đa đa mta mơ̆ng Hdră bhiăn phŭn thŭn 2013 dưi ngă 8 hlăm 120 mta hŏng 2 êpul mta phŭn klei čuăn djŏ tuôm hŏng Mặt trận čar kwar Việt Nam, dŭm êpul bruă kđi čar – yang ƀuôn leh anăn dŭm klei čuăn hlăm kdrêč IX čiăng ngă klei bi hmô mkŏ mjing bruă sang čư̆ êa dua gưl, amâo mâo pŏk mlar truh kơ dŭm boh klei mkăn.

Khua Bruă Kƀĭn Ala lač, ară anei mnuih ƀuôn sang, phung bi ala čiăng guôn êdi bruă bi khuăt mnuih mă bruă, ngă bruă tŭ dưn. Kyuadah hlăm boh sĭt, hlăm wưng êgao, Đảng, knŭk kna ba mdah leh lu hdră mtrŭn čiăng bi khuăt, ƀiădah hlăm boh sĭt bruă bi hrŏ ka klă ôh, ngă truh klei ngă bruă amâo mâo jăk, mnuih mă bruă lu:

 Gưl anei drei ngă hdră bi khuăt hluê si hdră mtrŭn mrô 18. Anei jing hdră êlan djŏ ai mnuih ƀuôn sang, Klei mĭn mơ̆ng Đảng. Čiăng dưi ngă dŭm mta phŭn anei wưng tal 2 jing dleh sơnăk. Dleh jing srăng mkra mlih hdră bhiăn phŭn. Drei bi klă mkŏ mjing dhar bruă mkra mlih, bi mbŏ đa đa mta mơ̆ng hdră bhiăn phŭn thŭn 2013 mâo ba mdah leh, hdră êlan mkra mlih hdră bhiăn phŭn leh anăn klă mngač mă klei blŭ mguôp mnuih ƀuôn sang mơ̆ng hruê 6/5 – 5/6, hlăm wang sa mlan, bi kƀĭn 5 hruê, kluôm jing 35 hruê.

Khua Bruă Kƀĭn Ala ăt lač, bruă mkra mlih, bi mbŏ đa đa mta mơ̆ng hdră bhiăn phŭn 2013, dŭm mta bruă bi leh dŭm hră mơar mtô čiăng nkra mlih hdră bhiăn phŭn, bi kluôm klei bhiăn lăn čar leh anăn dŭm klei čuăn srăng nao êlâo sang knhuang, čiăng mkŏ mjing jar hdră bhiăn kjăp kơ dŭm êpul hluê ngă.

Phung bi ala Bruă Kƀĭn Ala ăt bi tŭ ư hŏng 8 mta mkra mlih hlăm hdră mtrŭn mkra mlih, bi mbŏ đa đa mta mơ̆ng hdră bhiăn phŭn thŭn 2013. Hlăm anăn, hdră mtrŭn bi klă bruă klam mơ̆ng dŭm Êpul bruă kđi čar – yang ƀuôn msĕ si: Công đoàn Việt Nam, Êpul ƀĭng ngă lŏ hma Việt Nam, Êpul bruă êdam êra cộng sản Hồ Chí Minh, Êpul bruă phung mniê Việt Nam, Êpul lŏng kahan hđăp Việt Nam jing dŭm êpul bruă kđi čar – yang ƀuôn hlăm dhar bruă mặt trận Việt Nam, rơ̆ng hluê si klei bi klă mrô 127 mơ̆ng Phŭn bruă kđi čar.

Hluê si pô bi ala Nguyễn Thị Thu Nguyệt, êpul mơ̆ng Dak Lak, êngao kơ dŭm êpul bruă kđi čar hlăm mặt trận čar kwar Việt Nam lŏ mâo dŭm êpul ƀuôn sang, dôk ngă dŭm bruă klam mơ̆ng Đảng leh anăn knŭk kna. Kyuanăn, phung bi ala mñă, Êpul čih mkra hdră mtrŭn mkra mlih, bi mbŏ đa đa mta mơ̆ng hdră bhiăn phŭn 2013 ksiêm dlăng, bi klă kơhưm hdră bhiăn mơ̆ng dŭm êpul anei:

Kơhưm djŏ hŏng hdră bhiăn mơ̆ng mnuih ƀuôn sang hlăm dhar bruă mặt trận hluê si klei bi klă mrô 127 hlăm hdră bhiăn phŭn si ngă, drei srăng bi klă. Drei amâo mâo dlăng klah čŭn jing hlăm êpul hgŭm dŭm êpul mrâo hŏng mặt trận ka djăp ôh, ka dưi mkŏ mjing jar hdră bhiăn kơ dŭm êpul anei ngă bruă hluê si hdră bhiăn phŭn, klei bhiăn lăn čar leh anăn mkra mlih hluê si Hdră mtrŭn mơ̆ng knŭk kna, leh hdră bhiăn phŭn dưi mkra mlih.

Đa đa phung bi ala ăt dôk mĭn, ti mta 110, mrô 3 bi klă, bruă bi klă dŭm anôk bruă knŭk kna tu gŭ čar, ƀuôn prŏng gưl dlông leh anăn hdră êlan, hră mơar mkŏ mjing, bi kruh, bi mŭt, mbha anôk bruă knŭk kna, mkra mlih anôk bruă knŭk kna mơ̆ng Bruă Kƀĭn Ala bi klă. Êjai anăn, hluê si hdră bhiăn phŭn thŭn 2013, bruă anei srăng mă klei blŭ mguôp mnuih ƀuôn sang. Pô bi ala Nguyễn Minh Hoàng, Êpul ƀuôn prŏng Hồ Chí Minh brei thâo:

Bruă mkŏ mjing, bi mŭt, mbha anôk bruă knŭk kna, mkra mlih ling alŭ wăl mơ̆ng Bruă Kƀĭn Ala bi klă. Bi klă bruă anei srăng mă klei blŭ mguôp mnuih ƀuôn sang alŭ wăl, djŏ hdră bhiăn, hră mơar. Anei jing klei kâo dôk mĭn kyua drei amâo mâo hlăk mblang ya ngă lui dŏ anei, êjai anăn bi lar klei êngiê nah gŭ, bi lar klei blŭ mguôp mơ̆ng mnuih ƀuôn sang alŭ wăl hŏng bruă yuôm bhăn leh anăn ăt bi êdah klei mĭn Đảng, ai tiê mnuih ƀuôn sang.

Pô bi ala Nguyễn Thành Trung, êpul Yên Bái lač:

 Hdră mtrŭn tal anei amâo djŏ knŏng mă klei blŭ mguôp mnuih ƀuôn sang alŭ wăl êjai bi kruh, bi mŭt amâodah mkra mlih êlan ling ƀiădah srăng mâo Bruă Kƀĭn Ala bi klă. Kâo lač hŏng hdră bhiăn, klei kriê dlăng mơ̆ng knŭk kna leh anăn ala ƀuôn, bruă mă klei blŭ mguôp mnuih ƀuôn sang êjai mkŏ mjing, bi kruh, bi mbha anôk bruă knŭk kna  jing klei čiăng êdi.