Êlan dơ̆ng mơ̆ng să Đắk Tơ Ve nao ti să hà Tây, kdriêk Čư̆ Păh, dưi rŭ mjing mơ̆ng ênoh prăk hdră 1719, bi bi mlih kluôm dhuôm klei êrô êbat mơ̆ng mnuih ƀuôn sang tinei. Êlâo dih, êlan anei kreh klưh hroh hlăm yan hjan, ngă truh klei dleh dlan hlăm klei êrô êbat leh anăn dŭ mdiăng mnơ̆ng thơ̆ng. Ƀiădah hŏng klei duh bi liê mđĭ hnơ̆ng, êlan dơ̆ng taih 10km leh anăn prŏng 5,5m dưi bi leh, đru leh kơ mnuih ƀuôn sang să dleh dlan hlăm kdriêk dŭ mdiăng boh mnga mâo klei găl, mtrŭt mđĭ klei đĭ kyar bruă duh mkra.

Mbĭt hŏng anăn, Hdră 1719 hlăm 3 thŭn êgao dưi ba wĭt lu klei mlih klă sĭt kơ bruă duh mkra – ala ƀuôn kơ kdriêk Čư̆ Pah. Hnơ̆ng gŏ sang ƀun ƀin hlăm kdriêk hrŏ 3,82% mkă hŏng thŭn 2021 kyua mâo dŭm hdră êlan đru mơ̆ng dŭm hdră leh anăn hdră ala čar kñăm. Dŭm klei bi hmô mđĭ kyar bruă duh mkra msĕ si pla mjing, rông mnơ̆ng đru leh kơ lu gŏ sang mâo hnư hrui wĭt hơĭt. Luyện Ngọc Toàn, Khua Adŭ bruă djuê ana kdriêk Čư̆ Păh brei thâo:

"Hŏng ênoh duh bi liê mơ̆ng 143 êklai prăk hluê ngă dŭm hdră, mâo wăt dŭm mta bruă duh mkra – ala ƀuôn, klei êđăp ênang, bruă kđi čar. Hdră mâo leh klei hmăi klă kơ klei hdĭp leh anăn ai tiê mnuih djuê ƀiă, ba wĭt dŭm boh sang siam kơ mnuih ƀun ƀin, ba wĭt êa doh kơ mnuih ƀuôn sang, sang hră mơar, bruă mdrao mgŭn, mtô mjuăt bruă mă, bi hơĭt klei hdĭp yang ƀuôn dưi mđing uêñ lu hĭn.”

Ăt msĕ sơnăn, ti kdriêk Phú Thiện, hdră 1719 ba wĭt leh dŭm boh tŭ yuôm bhăn hlăm bruă bi hơĭt bruă mkŏ mkra leh anăn mđĭ hnơ̆ng klei hdĭp mnuih ƀuôn sang. Bruă sang čư̆ êa alŭ wăl mđing duh bi liê kơ dŭm bĭt êlan mlir să, knơ̆ng êa, mnuôr êa, mkŏ mjing klei găl kơ bruă lŏ hma leh anăn êlan klông. Boh nik dŭm klei bi hmô bruă duh mkra msĕ si pla ana ƀơ̆ng boh leh anăn rông mnơ̆ng hluê hdră hơĭt kjăp dưi đru kơ dŭm êtuh gŏ sang mâo hnư hrui wĭt hơĭt. Kyua mâo klei đru mơ̆ng dŭm hdră, hnơ̆ng gŏ sang ƀun hlăm kdriêk hrŏ mơ̆ng 13% adôk 7,5%. Nguyễn Anh Tuấn – khua bruă Đảng kdriêk, k’iăng khua bruă sang čư̆ êa kdriêk Phú Thiện brei thâo:

“Bruă sang čư̆ êa kdriêk Phú Thiện hưn mdah leh hŏng Êpul khua bruă Đảng kdriêk, mkŏ mjing hdră êlan klă klơ̆ng. Dŭm anôk bruă thơ̆ng kơ bruă leh anăn adŭ bruă bi klă leh dŭm hdră êlan čiăng hluê ngă. Leh 3 thŭn hluê ngă kdriêk brei čan leh mâo 45 êklai prăk, mâo giăm 50%.

Hlăm 3 thŭn ngă hdră 1719, čar Gia Lai dưi mâo lu boh tŭ dưn. Truh kơ ară anei, čar dưi bi leh 12/31 hnơ̆ng čuăn, êgao hdră kčah mâo leh. Boh nik, bruă dăp anôk dôk leh anăn dăp bi hơĭt gŏ sang đuê̆ dôk êngao čuăl mkă mâo 97%, êgao 2% hŏng hdră kčah. Hnơ̆ng ƀuôn êlan mâo êlan êdeh ôtô truh kơ wăl krah mâo 100%, đru mkŏ dŭm alŭ wăl dleh dlan. Êbeh 97% gŏ sang mnuih djuê ƀiă dưi yua êa doh. Êbeh 98% alŭ ƀuôn mâo sang bi kƀĭn ƀuôn, leh anăn 80% alŭ ƀuôn mkŏ mjing dŭm mta bruă dhar kreh, klei kdŏ mmuñ tŭ jăk. Hnơ̆ng gŏ êsei ƀun hrŏ adôk giăm 13%, hrŏ 4,3% mkă hŏng thŭn 2021. Trường Trung Tuyến- k’iăng khua êpul bruă djuê ana čar Gia Lai brei thâo, hlăm wưng kơ anăp, dŭm gưl bruă Đảng nah gŭ čiăng lŏ bi lar bruă klam gĭt gai, ktrâo lač čiăng kơ hdră lŏ dơ̆ng ba wĭt boh tŭ dưn klă sĭt, đru kơ mnuih ƀuôn sang đĭ kyar hơĭt kjăp.

“Wưng kơ anăp jing mmông yuôm bhăn, čiăng klei nao hgŭm mơ̆ng gưl bruă Đảng nah gŭ, bruă sang čư̆ êa dŭm gưl. Bi kơ dhar bruă djuê ana lŏ dơ̆ng đru kčĕ hŏng bruă sang čư̆ êa čar ksiêm dlăng dŭm mta phŭn hlăm wưng êgao čiăng ruh mgaih, gĭr iêo jak hŏng hdră knŭk kna leh anăn mnuih ƀuôn sang ngă mbĭt čiăng ai dưi mnuih ƀuôn sang mnuih djuê ƀiă dưi bi lar”.