Mdê hŏng yăng đar, hlăm klei bi kƀĭn tal anei, Bruă kƀĭn ala ksiêm êmuh hluê si êpul mta bruă hrô kơ êpul boh klei. Hluê anăn, grăp čô phung khua êmua hlăm knŭk kna ăt mprăp wĭt lač dŭm mta phŭn djŏ tuôm hŏng bruă klam kriê dlăng, gĭt gai, ksiêm wĭt dŭm boh klei pô ƀuăn leh tăp dưi ngă leh. Pô bi ala, Êpul bi ala mơ̆ng Quảng Nam yap yuôm bhăn klei wĭt lač mơ̆ng phung Khua phŭn bruă leh anăn phung khua êmua hlăm knŭk kna, klei wĭt lač djăp ênŭm dŭm boh klei mơ̆ng phung bi ala bruă kƀĭn ala mdưm leh. Bruă mlih mrâo anei ngă kơ phung khua êmua knŭk kna, khua knơ̆ng kiă kriê dŭm dhar bruă srăng thâo klă, nao hŏng boh klei. Anei ăt jing sa klei čiăng kơ phung bi ala bruă kƀĭn ala ksiêm dlăng, ktuê dlăng phung Khua phŭn bruă leh anăn phung khua êmua knŭk kna hlăm bruă hluê ngă klei ƀuăn mơ̆ng pô hlăm klei êmuh.

 “Phung bi ala bruă kƀĭn ala mdưm leh dŭm boh klei, nao klă hŏng dŭm hdră mtrŭn, mâo klei ksiêm duah klă nik dŭm hdră mtrŭn ksiêm êmuh mơ̆ng Bruă kƀĭn ala. Phung khua phŭn bruă tŭ mă dŭm klei êmuh leh anăn wĭt lač klă kơ dŭm boh klei mâo phung bi ala uêñ mĭn. Phung bi ala ăt tui êmuh truh knhal tuč, tăng mgal truh kơ klei djŏ knhal tuč. Êngao kơ klei ksiêm êmuh ƀiădah ăt mâo dŭm klei blŭ mguôp, klei akâo kơ lu hdră êlan đru kơ knŭk kna, đru kơ khua Phŭn bruă, dhar bruă, dŭm mta bruă hlăm klei gĭt gai dưi jăk hĭn”.

Pô bi ala Tô Thị Bích Châu, Êpul bi ala ƀuôn prŏng Hồ Chí Minh lač, gưl ksiêm êmuh leh anăn wĭt lač klei êmuh dưi mkŏ mjing hŏng klei mbruă, klei êmuh mơ̆ng phung bi ala êmuh hlăm anôk bi kƀĭn jing dŭm mta phŭn mâo phung bi ala hmăng hmưi. Ƀiădah, hŏng đa đa mta bruă msĕ si bruă mdrao mgŭn, mtô bi hriăm, dhar kreh…mmông brei kơ phung bi ala ngă klei êmuh jing ƀiă, mmông brei kơ phung khua dhar bruă wĭt lač ka ênŭm dưi hlăk mblang jih dŭm boh klei phung bi ala uêñ mĭn.

 “Drei mkŏ mjing klei êmuh hŏng mta phŭn lu đei, jih jang dŭm boh klei hlăm bruă duh mkra ala ƀuôn, bruă kđi čar, klei êđăp ênang lăn čar hlăm 2 hruê mkrah amâo mâo dưi ênŭm ôh. Kyuanăn, dŭm klei wĭt lač mơ̆ng phung Khua phŭn bruă, khua dhar bruă ăt ka kluôm mơh, knŏng ti hnơ̆ng kah knar đuč. Kyuadah phung bi ala čiăng thâo săng êlam, thâo săng klă anăn yơh diñu ba boh klei bi tăng mgăl lu blư̆. Kyuanăn tơdah mâo klei êmuh hlăm gưl kơ anăp, kâo mĭn srăng ruah mă đa đa boh klei čiăng nao êlam hĭn”.

Ktuê dlăng gưl êmuh leh anăn wĭt lač klei êmuh hlăm klei kƀĭn tal 6, Bruă kƀĭn ala gưl 15, pô bi ala Lê Hữu Chỉnh, ti ƀuôn hgŭm Tân Lợi, ƀuôn prŏng Ƀuôn Ama Thuôt, čar Dak Lak lač, bruă ksiêm êmuh hlăm klei kƀĭn tal 6 dưi bi êdah klă mngač, djŏ hŏng hdră bhiăn. Pô êmuh leh anăn pô wĭt lač klei êmuh mâo klei mprăp klă, thâo klă dŭm boh klei.

Dua hruê mkrah ngă klei êmuh leh anăn wĭt lač klei êmuh, kâo lač phung khua kiă kriê dhar bruă wĭt lač jăk leh, knŭk kna leh anăn Khua bruă kƀĭn ala ăt msĕ mơh. Kâo lač klă mâo lu klei mlih. Mta kñăm prŏng hĭn dưi mâo mơ̆ng klei êđăp ênang bruă kđi čar truh kơ bruă duh mkra ala ƀuôn leh anăn boh nik Bruă kƀĭn ala leh anăn knŭk kna mđing leh kơ anak mnuih, sitôhmô lač kơ hdră mlih mrâo prăk mlan, sitôhmô bruă mtô mjuăt bi hriăm, bruă mdrao mgŭn, dhar kreh, hâo hưn dưi dlăng yuôm bhăn, mbĭt hŏng bruă êlan klông dŭ mdiăng, kdrŭn ksĭ, tač êdeh phiơr čiăng gĭr ktưn mâo truh kơ 3 êbâo km êlan dơ̆ng pral hlăm wưng păn bruă anei, kâo lač jing yuôm bhăn êdi. Jing sa čô bi ala kâo hơ̆k mơak leh anăn đăo knang bruă kƀĭn ala srăng bi leh jih jang bruă klam.

Bi klă klei wĭt lač mơ̆ng k’iăng Khua knŭk kna Trần Lưu Quang, pô bi ala Nguyễn Thị Sửu, êpul bi ala mơ̆ng čar Thừa Thiên Huế brei thâo:

 “Kâo ƀuh klei kpă ênô, klei jhŏng tŭ ư kơ klei êdu kƀah, jhŏng tŭ klei êdu kƀah srăng dưi mgaih msir leh anăn dưi duah êlan tlaih, êlan ruh mgaih dŭm klei dleh dlan, kpăk gun. Amâo djŏ phung bi ala čiăng êmuh kơ dŭm boh klei anăn ƀiădah kyua ƀuh dleh, čiăng dưi mgaih msir, čiăng mâo anôk knang, knŭk kna jing sa hlăm dŭm anôk knang dưi mgaih msir kơ dŭm hdră êlan hlăm klei uêñ mĭn, klei hmăng hmưi mơ̆ng phung bi ala”./.