Mơ̆ng thŭn 2022 truh kơ jih mlan 6 thŭn anei, Bruă Kƀĭn Ala ngă leh bruă bi hrŏ 2% jia ênoh đĭ hŏng dŭm êpul mnơ̆ng dhơ̆ng, mta bruă dôk yua ênoh jia ênoh đĭ 10% ( adôk 8%). Čiăng mtrŭt mđĭ klei mkra mjing, mnia mblei, mtrŭt mđĭ klei blei ba yua, ngă mta kñăm đĭ kyar 8% kơ dlông, knŭk kna lŏ dơ̆ng hưn mdah hŏng Bruă Kƀĭn Ala  hdră mtrŭn mơ̆ng Bruă Kƀĭn Ala kơ bruă bi hrŏ jia ênoh đĭ kơ 6 mlan knhal jih thŭn 2025 leh ană jih thŭn 2026. Klă klơ̆ng pŏk mlar dŭm mta dưi bi hrŏ 2% jia ênoh đĭ hŏng mnơ̆ng dhơ̆ng mta bruă đru kơ klei mkra mjing, mnia mblei, hiu čhưn ênguê, blei ba yua msĕ si: mnơ̆ng dhơ̆ng, klei hưn mthâo mrâo mrang, dŭm mta msei hjei tuh tia, êa pui, mnơ̆ng dhơ̆ng êa drao, hdăng blei mơ̆ng ala tač êngao leh anăn ba čhĭ, êa săng, êa pui. Amâo mâo bi hrŏ prăk jia ênoh đĭ hŏng dŭm êpul mnơ̆ng dhơ̆ng msĕ si Dăng kông, knơ̆ng prăk chứng khoán, hră ênua, mnia mblei sang lăn, mnơ̆ng dhơ̆ng mơ̆ng msei, mnơ̆ng gŭ lăn (knŏng hdăng), dŭm mta mnơ̆ng dhơ̆ng leh anăn bruă tŭ prăk jia ba čhĭ ( knŏng lui mă êa săng).

Sa ai hŏng klei kčĕ anei, phung khua hlăm dhar Bruă Kƀĭn Ala mnă čiăng bi klă hĭn klei hmăi mơ̆ng hdră êlan. Khua dhar bruă duh mkra leh anăn ngăn prăk Phan Văn Mãi mñă:

Mơ̆ng klei mkiêt mkriêm mkŏ dăp bruă knŭk kna pô leh anăn srăng ngă dŭm bruă klam. Hluê ngă dŭm hdră êlan srăng mñă kơ knŭk kna bi klă bruă hrui wĭt, bi liê čiăng tĭng mkă bi kna ngăn prăk.

Lŏ hlăk mblang thiăm, k’iăng Khua knŭk kna Hồ Đức Phơc brei thâo:

Hŏng hdră mtrŭn anei srăng bi hrŏ prăk jia êbeh 232 êbâo êklai prăk hlăm thŭn anei. Knŭk kna srăng mtrŭt mjhar, mâo hdră êlan hrui čiăng bi kna ngăn prăk. Thŭn anei kdrêč tla prăk brei mdei bruă leh mă leh hlăm keh prăk mlan mbĭt anăn bi liê mơ̆ng ngăn prăk knŭk kna.

Hluê si hdră mkăp, mmông dưn yua hdră mtrŭn mơ̆ng hruê 1/7/2025 truh kơ jih hruê 31/12/2026.

Ăt hlăm klei kƀĭn 44, dhar Bruă Kƀĭn Ala brei leh klei blŭ mguôp kơ bruă mrka mlih, bi mbŏ klei čuăn kơ hdră bhiăn klei kƀĭn Bruă Kƀĭn Ala. Bruă anei čiăng rơ̆ng klei hrăm mbĭt klei ngă bruă mơ̆ng dŭm anôk Bruă Kƀĭn Ala leh ngă klei mkŏ dăp, tŭ ư hŏng dŭm klei čuăn hlăm dŭm hdră bhiăn, lŏ dơ̆ng mđĭ hĭn hnơ̆ng jăk klei ngă bruă mơ̆ng Bruă Kƀĭn Ala hlăm wưng mrâo. Hluê anăn, dŭm hdră mtrŭn, klei hưn mdah hlăk mblang, mđing hmư̆, mkra mlih hdră bhiăn hưn mdah hŏng Bruă Kƀĭn Ala ksiêm duah leh anăn ba mdah đa đa boh klei dôk mâo klei blŭ mdê mdê srăng mơĭt kơ phung bi ala Bruă Kƀĭn Ala ksiêm duah hnui hĭn jing 48 mmông êlâo kơ bi klă, mđĭ dua blư̆ hdră bhiăn ară anei. Hdră bhiăn ăt bi klă mnĭt mmông phung bi ala blŭ mdah gưl tal 1 jing amâo êgao 5 mnĭt, gưl ta l2 amâo êgao 2 mnĭt. Hdră bhiăn bi klă mmông grăp blư̆ hlăk mblang mơ̆ng anôk bruă, epeul bruă, pô mâo klei dưi jing amâo êgao 15 mnĭt.

Hlăm klei kƀĭn, Khua bruă kƀĭn ala Trần Thanh Mẫn mnă ktang:

Mđĭ hĭn klei klă mngač. Tal 2, kâo ƀuh srăng mđĭ hnơ̆ng jăk klei bi trông, čuăl mkă mnĭt mmông, nĕ kơ klei khă bi mâo, rơ̆ng kơ grăp klei blŭ mâo mta kñăm. Kyuanăn mtrŭt mjhar phung bi ala bi êdah ƀiădah srăng mprăp klă, đa đa dưi mơĭt kơ epul khua kiă kriê êlâo kơ mâo klei găl bi kƀĭn. Tal 3 jing Bruă Kƀĭn Ala si srăng ngă čiăng kơ anăp anei mđĭ hĭn klei bi trông hŏng phung bi ala. Hlăm Bruă Kƀĭn Ala mrô drei srăng mâo klei mkă kơ bruă anei.