Bŏ 20 thŭn êlâo, aduôn Đặng Thị Dẩn jing sa hlăm dŭm gŏ sang tal êlâo nao ti krĭng lăn Nậm Sò hluê si hdră êlan ba mnuih ƀuôn sang nao ti knông lăn. Hruê anăn, anôk anei jing lăn êruh, êlan klông dlel dlan, amâo mâo lăn mă bruă. Klei bhiăn, klei ngă bruă msĕ hŏng đưm ngă kơ klei ư̆ êpa, ƀun ƀin amâo mâo thâo ruê̆ hlăm grăp gŏ sang mnuih Mông, mnuih Dao. Amâo mâo uêñ kơ klei suăi êmă, dleh dlan, hŏng bruă klam jing khua ƀuôn, aduôn Dẩn gĭr ngă klei mlih mrâo kñăm bi mlih klei mĭn mơ̆ng grăp čô mnuih ƀuôn sang. Aduôn Dẩn lŏ hdơr:

“Êlâo dih mnuih ƀuôn sang tinei čiăng k’kiêng lu anak, ti gŏ sang lu anak čô kơh jăk. Leh mâo klei hâo hưn leh anăn ƀuh amâo mâo lăn anăn, kyuanăn êjai knŭk kna mkăp brei lăn mă bruă, mâo leh klei hơĭt mnuih ƀuôn sang knŏng k’kiêng mă 1 -2 čô anak đuč. Bi kơ klei bi kuôl ung mô̆, ară anei mnuih ƀuôn sang amâo mâo lŏ čoh lu ôh, bi kluôl ung mô̆ kơ anak ênum 18 thŭn leh anăn hluê ngă djŏ klei bhiăn ala čar”.

Êjai mnuih ƀuôn sang ƀrư̆ ƀrư̆ lăm lui leh klei bhiăn hđăp, kčưm bi hơĭt klei hdĭp, aduôn Dẩn nao jăp anôk, ba dŭm klei bi hmô jăk, mjeh ana pla mjing mâo ênoh kơ Nậm Sò. Mniê Đảng viên anei mtrŭt mjhar leh mnuih ƀuôn sang pla ana tei nan, ana quế, ana mtei, leh anăn pŏk phai bruă rông ŭn mnŭ, kan hdang. Kah mbha kơ boh tŭ leh 10 thŭn dôk kjăp hŏng krĭng knông lăn mđĭ kyar bruă duh mkra hŏng klei đru mơ̆ng mniê khua alŭ Đặng Thị Dẩn, aduôn Tẩn Thị Tích, mnuih ƀuôn sang alŭ Nậm Sò, să Bản Phiệt, kdriêk Bảo Thắng, čar Lào Cai brei thâo:

“Dleh dlan mâo amai Dẩn mtô kơ pô hdră duah ƀơ̆ng. Brei pla ana kyâo, ana quế, ana tei nan leh anăn ba čhĭ, ƀrư̆ ƀrư̆ gŏ sang mâo klei mlih. Phŭn dô dih dleh dlan êdi, amâo mâo sa mta mnơ̆ng dhơ̆ng ôh”.

   Leh 20 thŭn jah ênăh ngă hma, Nậm Sò ară anei dôk mlih hlăm grăp hruê. Dŭm boh sang lu tal ti tluôn dliê mta mdah, dŭm bĭt êlan bê tong doh, sa knhuang hdĭp mrâo mâo leh ti alŭ krĭng knông lăn anei, mâo klei đru mguôp prŏng mơ̆ng phung đảng viên nao êlâo msĕ si aduôn Dẩn.

64 thŭn, 23 thŭn jing đảng viên, dŭm klei đru mguôp mơ̆ng mniê đảng viên mnuih Dao Đặng Thị Dẩn lŏ bi mbŏ thiăm ai ktang, klei đăo knang kơ mnuih ƀuôn sang krĭng knong lăn. Đăo knang leh anăn hluê Đảng, Awa Hồ, grăp čô mnuih ƀuôn sang Nậm Sò dôk gĭr ktưn mkŏ mjing êlan knông lăn êđăp ênang, hơĭt kjăp leh anăn đĭ kyar. Đảng viên Đặng Thị Dẩn brei thâo:

“Djăp mta pô nao êlâo, pô blŭ leh anăn mă. Sĭt amâo mâo dưi ngă amâo mâo lač ôh. Lač djŏ kơh hmư̆. Mnuih ƀuôn sang hluê ngă djŏ jing boh kdrŭt kơ pô mă amâo thâo êmăn. Dôk ti dlông ti dlăng kơ nei msĕ si sa ƀuôn prŏng điêt. Mnuih ƀuôn sang bi mguôp, kâo gĭr ktưn hưn”.

Klei gĭr ktưn jing gru mngač hlăm klei mđĭ kyar bruă duh mkra mơ̆ng Nậm Sò hruê anei jing boh tŭ dưn mơ̆ng klei gĭr amâo mâo mdei, amâo mâo êmăn, ngă djăp bruă kyua mnuih ƀuôn sang mơ̆ng mniê đang viên mnuih Dao Đặng Thị Dẩn.