Êbeh 70 thŭn, khua mduôn Ayun Y Hmoan ăt gĭr hgŭm hlăm bruă mặt trận ti ƀuôn

Tri Gha, să Ea Drăng, čar Dak Lak. Grăp hruê, ñu ăt nao ti grăp gŏ sang čiăng thâo kơ boh klei hdĭp mda hlăm ƀuôn, mơ̆ng klei yan boh mnga truh kơ bruă duh ƀơ̆ng phung êdam êra.

Ktuê dlăng Klei bi kƀĭn phung bi ala bruă mặt trận čar kwar Việt Nam tal XI  hlăm dŭm kdrăp hâo hưn, mduôn Y Hmoan čang hmăng, bruă mặt trận dŭm gưl mrâo srăng kƀĭn hlăm klei mlih mrâo hdră bruă, mđĭ hnơ̆ng jăk ktuê dlăng, răng mgang ala ƀuôn. Hŏng alŭ wăl krĭng čư̆ čhiăng, krĭng mnuih djuê ƀiă, brei mâo thiăm klei blŭ răng mgang mơ̆ng bruă mặt trận čiăng kơ dŭm hdră bruă, hdră êlan pŏk ngă tŭ dưn, klă sĭt hĭn. Hlue si Khua mduôn Y Hmoan, bruă brei mđing uêñ ară anei jing đru kơ hdră  duh ƀơ̆ng, mjing bruă mă kơ phung êdam êra krĭng ƀuôn sang.

 “Kâo mơak snăk kyua mnuih ƀuôn sang hlue ngă jăk hdră bruă, hdră êlan mơ̆ng Đảng leh anăn Knŭk kna, kyua anăn ƀuôn sang êđăp ênang. Mnuih ƀuôn sang ară anei čiăng hĭn jing ƀuôn sang hơĭt kjăp, mâo hdră duh ƀơ̆ng, anak čô mâo bruă mă, ngă bruă đĭ kyar.”

Jing alŭ wăl mâo bruă duh mkra knang kơ lŏ hma, mnuih ƀuôn sang čar Dak Lak ăt čang hmăng bruă mặt trận čar kwar dŭm gưl mâo bruă klam bi ala kơ asăp blŭ mnuih ƀuôn sang, srăng mâo klei akâo djŏ klă hŏng Bruă kƀĭn ala, Knŭk kna čiăng dưi bi klă klơ̆ng hdră êlan kơ bruă lŏ hma, ƀĭng lŏ hma leh anăn krĭng ƀuôn sang.

Hŏng alŭ wăl msĕ si Dak Lak, mkra mjing lŏ hma ăt tŭ lu klei amâo myun kyua klei bi mlih anôk ba čhĭ leh anăn yan adiê amâo găl jăk, ƀiădah bruă kơ klei ba čhĭ mnơ̆ng dhơ̆ng lŏ hma, bruă kơ hră ênua bruă lŏ hma ăt ka mâo mđing dlăng djŏ klă. H Wơn Kmăn, Khua ƀuôn Knach, să Đắk Liêng, čar Dak Lak mâo klei akâo:

“Tinei klei hdĭp mnuih ƀuôn sang ăt adôk lu klei dleh dlan, hmei ăt čang hmăng bruă mặt trận mđing hmư̆ klei blŭ mnuih ƀuôn sang čiăng akâo, mâo hdră êlan djŏ guôp hŏng phung knŭk kna dlăng ba, phung êdu awăt, đru lăm lui sang dôk êjai, mkăo ana mjeh, êđai mjeh čiăng mkra mjing, mđĭ kyar bruă duh mkra, hơĭt klei hdĭp mda”.

Mbĭt hŏng bruă kơ klei duh mkra, mkra mjing, klei hdĭp mda, ktuê dlăng Klei bi kƀĭn phung bi ala bruă mặt trận čar kwar Việt Nam tal XI, dŭm gưl mnuih ƀuôn sang čar Dak Lak ăt čang hmăng, klei mĭn, klei čiăng mơ̆ng nah gŭ dưi mđing hmư̆ djăp ênŭm, lač djŏ klă leh anăn bi mlih jing hdră êlan boh sĭt.

Hlue si Lương Triều Dương, ƀuôn hgŭm Tuy Hòa, čar Dak Lak, klei yuôm bhăn hĭn ăt jing êpul knuă druh mặt trận, knuă druh nah gŭ klă sĭt giăm mnuih ƀuôn sang, thâo săng mnuih ƀuôn sang leh anăn thâo mđing hmư̆ klei blŭ mơ̆ng yang ƀuôn.

“Kâo knŏng čang hmăng sa klei diñu dưi lač snăn brei dưi ngă, brei giăm mnuih ƀuôn sang, jĕ mnuih ƀuôn sang, thâo săng mnuih ƀuôn sang, mđing hmư̆ klei blŭ mnuih ƀuôn sang, brei bi kdơ̆ng hŏng klei amâo jăk ƀơ̆ng ngăn, amâo jăk.”

 Hlăm boh klei bi mlih mrô mkŏ mjing ktang, ti lu alŭ wăl krĭng taih kbưi čar Dak Lak, dŭm êpul Zalo êpul êya dôk jing kban mkŏ plah wah mnuih ƀuôn sang hŏng bruă sang čư̆ êa leh anăn bruă mặt trận nah gŭ. Êngao kơ klei bi tuôm tlă anăp, lu klei blŭ mnuih ƀuôn sang dưi hmư̆ hlăm đĭng blŭ, êpul mnuih ƀuôn sang amâodah dŭm êpul yua kdrăp mrô. Mơ̆ng klei kơ êlan klông jhat rai, kƀah êa yua grăp hruê truh kơ klei ngă hră mơar, lu klei blŭ akâo dưi mơĭt pral hĭn kơ bruă sang čư̆ êa alŭ wăl.

Hlue si Phạm Văn Bảy, K’iăng Khua Knơ̆ng bruă mặt trận čar Dak Lak, klei čiăng mlih mrâo hdră bi kƀĭn, mtrŭt mjhar mnuih ƀuôn sang dôk kčah klă hĭn hŏng jih bruă mặt trận dŭm gưl, boh nik ti krĭng taih kbưi, krĭng mnuih djuê ƀiă. Hlăm anăn, bruă mđing hmư̆ klei blŭ mơ̆ng nah gŭ leh anăn yua kdrăp mrô jing klei čiăng êdi čiăng mđĭ boh tŭ dưn ngă bruă.

“Čiăng dưi ngă snăn brei drei yua kdrăp mrâo hâo hưn, hdră mrô čiăng hlăm dŭm klei hâo hưn, pŏk ngă dŭm bruă ngă pral hmao; mđing hmư̆ klei blŭ mnuih ƀuôn sang, mbĭt anăn dưi hâo hưn kơ bruă ngă phŭn truh hŏng mnuih ƀuôn sang čiăng kơ digơ̆ dưi hrăm mbĭt ngă bruă tŭ dưn hĭn.”

Mlih mrâo boh phŭn, hdră ngă bruă hlue si hdră giăm mnuih ƀuôn, jĕ mnuih ƀuôn sang, mđing kơ anôk bruă nah gŭ leh anăn mđĭ ktang mlih mrô dôk jing klei kčah hŏng bruă mặt trận čar kwar hlăm wưng mrâo. Mơ̆ng klei tŭ jing Klei bi kƀĭn phung bi ala bruă mặt trận Việt Nam tal XI, mnuih ƀuôn sang Dak Lak čang hmăng klei bkŭ mơ̆ng nah gŭ srăng lŏ dơ̆ng mđing hmư̆ djăp ênŭm hĭn, dŭm klei dleh dlan hlăm klei hdĭp srăng dưi hmao lač hĭn leh anăn dŭm hdră êlan ƀrư̆ hruê djŏ hŏng boh sĭt hĭn./.