Bi klă klei ruah Trần Thanh Mẫn păn ngă khua bruă kƀĭn ala gưl 15, mâo leh phung bi ala bruă kƀĭn ala tŭ ư 475/475 phung bi ala tŭ ư jing truh 97,54% ênoh jih jang phung bi ala bruă kƀĭn ala. Khua bruă kƀĭn ala Trần Thanh Mẫn ƀuăn rơ̆ng:

“Ti gŭ hla čhiăm gru hrah yuôm bhăn mơ̆ng lăn čar, ti anăp bruă kƀĭn ala lehanăn jih jang mnuih ƀuôn sang, kâo – Khua bruă kƀĭn ala ala čar yang ƀuôn ngă phŭn Việt Nam mâo klei ƀuăn snei: Kut kat sĭt suôr hŏng lăn čar, hŏng mnuih ƀuôn sang, hŏng hdră bhiăn phŭn ala čar yang ƀuôn ngă phŭn Việt Nam; gĭr ktưn bi leh jih jang bruă mơ̆ng Đảng, Knŭk kna, lehanăn mnuih ƀuôn sang jao”.

Blŭ hrăm leh klei đĭ păn bruă, Khua bruă kƀĭn ala Trần Thanh Mẫn bi êdah klei hdơr knga kơ khua gĭt gai Hồ Chí Minh; hdơr knga kơ phung khua kiă kriê nao leh êlâo, phung khua thŭn cách mạng, Amĭ Việt Nam jhŏng ktang, lĭng kahan yang ƀuôn jhŏng ktang, mnuih mă bruă hing ang, dŭm găp djuê phung săn asei, phung kahan êka êkeh, kahan ruă duam, gŏ sang mnuih mâo bruă tŭ dưn hŏng lăn čar, mđing mâo klei lač jăk kơ phung khua kiă kriê hlăm êpul gĭt gai bruă Đảng gưl dlông, Phŭn bruă kđi čar, êpul khua kiă kriê Đảng, lehanăn khua gĭt gai Đảng Nguyễn Phú Trọng.

  Bi klă kơ bruă ruah Tô Lâm păn ngă khua lăn čar yang ƀuôn ngă phŭn Việt Nam mâo leh phung bi ala bruă kƀĭn ala bi mklă hŏng ênoh 472/473 phung bi ala ti anôk mplĕ hră. Blŭ hrăm leh mmông đĭ păn bruă, Khua lăn čar Tô Lâm ƀuăn ngă ênŭm jih, djăp ênŭm bruă čuăn, klei dưi mơ̆ng khua lăn čar mâo leh hdră bhiăn phŭn čoh čuăn, jih ai tiê ngă bruă hlăm ala čar lehanăn bruă hŏng ala tač êngao, bruă răng mgang lăn čar.

“Ƀuh klă bruă klam prŏng prĭn ti anăp Đảng, Knŭk kna, mnuih ƀuôn sang, Kâo mâo klei ƀuăn hlue ngă jăk, djăp ênŭm, bruă čuăn, klei dưi mơ̆ng khua lăn čar djŏ tui si hdră bhiăn phŭn, jih ai tiê ngă bruă hlăm ala čar lehanăn bruă hŏng ala tač êngao, bruă răng mgang klei êđăp ênang lăn čar, mbĭt hŏng kluôm Đảng, jih jang mnuih ƀuôn sang, lehanăn djăp êpul êya bruă, jih jang bruă kđi čar dưn yua jih ai tiê “Čŏng gĭr, mâo klei đăo knang, pưng myưng kơ djuê ana “gĭr bi leh jih jang hdră êlan mơ̆ng Đảng, êlâo hĭn jing hdră mtrŭn mơ̆ng klei bi kƀĭn prŏng Đảng 13”.

Boh tŭ dưn mơ̆ng klei ruah khua lăn čar, khua bruă kƀĭn ala hŏng ênoh hră mplĕ tŭ ư prŏng brei ƀuh mâo klei phung bi ala đăo knang, lehanăn hlăm anăn bi êdah ai tiê mnuih ƀuôn sang. Khua lăn čar Tô Lâm lehanăn khua bruă kƀĭn ala Trần Thanh Mẫn rơ̆ng ƀuăn ngă djăp ênoh čuăn jing pô bi ala phŭn bruă kđi čar, dôk hlăm êpul khua kiă kriê bruă Đảng gưl dlông, mâo k’hưm prŏng hŏng kluôm Đảng lehanăn jih jang mnuih ƀuôn sang. Pô bi ala Phạm Văn Hòa, êpul mơ̆ng Đồng Tháp čang hmăng:

“Dua klei blŭ hrăm mơ̆ng khua lăn čar, lehanăn khua bruă kƀĭn ala, jing dŭm klei blŭ bi êdah klă tui si klei kâo lehanăn mnuih ƀuôn sang čiăng, lehanăn dôk čang hmăng hŏng khua lăn čar, lehanăn khua bruă kƀĭn ala gĭr hgao jih klei dleh dlan, klei gun kpăk kñăm čiăng bi leh jăk bruă čuăn mơ̆ng Đảng, knŭk kna lehanăn mnuih ƀuôn sang jao”.

            Êjai hŏng klei duh mkra ala ƀuôn, hlăm ala čar lehanăn mơ̆ng ala tač êngao dôk găn djăp mta klei dleh dlan, snăn bruă lŏ bi kjăp phung khua kiă kriê, jing kñăm bi kjăp klei đăo knang, mjing ai ktuh êyuh mơ̆ng jih bruă kđi čar, mđing bi leh mghaih msir ênŭm klei dleh dlan lăn čar dôk găn. Pô bi ala Tạ Văn Hạ, êpul mơ̆ng Quảng Nam lač, Khua lăn čar Tô Lâm lehanăn khua buă kƀĭn ala Trần Thanh Mẫn  jing phung mâo leh klei hriăm mjuăt kjăp, mâo ngă leh lu mta bruă yuôm bhăn, mâo klei thâo hlăm bruă knuă.

“Klei bi kƀĭn tal anei jing sa klei yuôm bhăn hĭn, lehanăn mâo leh mnuih ƀuôn sang mđing êdi, boh nik hŏng klei dăp mnuih ngă bruă. Bruă kƀĭn ala ruah leh khua lăn čar, khua bruă kƀĭn ala hŏng boh tŭ dưn dưi bi êdah bruă đua klam mơ̆ng phung bi ala bruă kƀĭn ala, amâo mâo knŏng hŏng phung khua kiă kriê mâo ruah hrue anei đuič ôh, ƀiădah lŏ jing bruă klam djŏ hŏng klei mĭn mơ̆ng Đảng, ai tiê mnuih ƀuôn sang hlăm klei kiă kriê lăn čar”./.