Wir phă klei bi kƀĭn prŏng 14 amâo mâo djŏ knŏng dôk guôn, ƀiădah hlăk đuĕ nao hŏng dŭm bruă ngă hlăm klei hdĭp pô. Ti lu alŭ wăl čar Daklak, bruă mkŏ mjing klei hdĭp dhar kreh, bi msiam ƀuôn prŏng, bi mdoh wăl hdĭp mda, mkŏ mjing klei thâo bi mguôp jih jang djuê ana hlăk lŏ mđĭ hĭn, dŭm mta bruă mơ̆ng mnuih ƀuôn sang pioh kkuh mơak klei bi kƀĭn prŏng. Ti alŭ wăl anôk dôk mrô 6A, ƀuôn hgŭm Thành Nhất, ai êwa kkuh mơak klei bi kƀĭn prŏng 14 mâo leh dŭm êpul bruă Đảng nah gŭ, mbĭt hŏng êpul kiă kriê ƀuôn sang mkŏ mjing. Nguyễn Ngọc Thu, Khua bruă Đảng, Khua kiă kriê alŭ wăl anôk dôk mrô 6A lač:

"Wir phă klei bi kƀĭn prŏng Đảng 14, êpul anôk dôk mrô 6A mâo leh klei mtrŭt mjhar mkŏ mjing klei hdĭp dhar kreh hlăm alŭ wăl anôk dôk. Hlăm êlan klông bi čŭt hla čhiăm gru, lehanăn mtrŭt mnuih ƀuôn sang bi mdoh pioh kkuh mơak klei bi kƀĭn prŏng. Mnuih ƀuôn sang mâo klei čang hmăng, lehanăn đăo knang kluôm kơ klei bi kƀĭn prŏng tal anei, lehanăn bŏ hŏng klei mơak. Čang hmăng kơ klei bi kƀĭn prŏng, srăng mâo klei tŭ dưn jăk hĭn, ba wĭt boh tŭ kơ mnuih ƀuôn sang.”

Ti dŭm boh ƀuôn mnuih djuê ƀiă, boh nik hlăm alŭ wăl knông lăn, mâo ai tiê wir phă klei bi kƀĭn prŏng hlăk hlê dôk mjhar ai tiê, boh nik hlăm phung êdam êra mâo klei êpa mhao kpưn đĭ, čŏng mkŏ mjing bruă knuă. Tĭ ƀuôn Drang Bhôk, ƀuôn hgŭm Buôn Đôn, phung mda asei ruah hdră êlan kkuh mơak klei bi kƀĭn prŏng hŏng dŭm mta bruă mkŏ mjing ƀuôn dhar kreh, mđĭ kyar kjăp. Amai H Ly A Knul, Khua bruă êdam êra ƀuôn Drang Bhôk, ƀuôn hgŭm Buôn Đôn, čar Daklak lač:

“Phung êdam êra ƀuôn Drang Bhôk ngă leh klei bi mdoh ƀuôn sang, mđĭ ai mnuih ƀuôn sang kkuh mơak klei bi kƀĭn prŏng Đảng 14. Hmei čang hmăng mơ̆ng ng anei, srăng mâo lu hdră êlan đru kơ phung mda asei krĭng knông lăn, mâo klei găl rŭ mjing bruă knuă, mđĭ kyar klei hdĭp gŏ sang lehanăn ƀuôn sang pô.”

Mơ̆ng dŭm bruă ngă hŏng jih ai tiê hŏng klei klă mngač brei ƀuh, Klei bi kƀĭn prŏng 14, jing anôk jưh knang, jing anôk mơĭt klei čang hmăng kơ dŭm hdră êlan jăk, nao djŏ hŏng klei sĭt, boh nik hŏng dŭm krĭng mnuih djuê ƀiă, krĭng taih kbưi krĭng knông lăn.

Mbĭt hŏng mnuih ƀuôn sang, phung knuă druh nah gŭ – phung hlue ngă dŭm hdră êlan mơ̆ng Đảng nao hlăm klei hdĭp – ăt dôk ktue ksiêm klei bi kƀĭn ăt dôk ktuê ksiêm klei bi kƀĭn prŏng, hŏng lu klei čang hmăng mrâo. Ti ƀuôn hgŭm Ea Kao, klei čang hmăng anăn nao mđrĭng hŏng klei mlih mrâo bruă kiă kriê, bi leh klei bhiăn, hdră êlan, mjing klei găl kơ phung knuă druh jhŏng mĭn, jhŏng mă bruă, jhŏng đua klam kyua kơ klei mđĭ kyar hlăm alŭ wăl. Đặng Gia Duẩn, Khua bruă Đảng ƀuôn hgŭm Ea Kao, čar Daklak lač:

"Klei bi kƀĭn prŏng srăng bi trông dŭm hdră êlan yuôm bhăn kơ lăn čar, hlăm anăn hmei čang hmăng srăng mâo lu hĭn klei mđing uêñ kơ kơ bruă knuă druh gưl ƀuôn hgŭm. Khădah knuă druh gưl să lehanăn kdriêk êlâo dih leh mâo bi mŭt mbĭt, snăk hlăm grăp čô knuă druh ăt mâo klei čiăng kơ alŭ wăl pô dưi đĭ kyar. Kyuanăn bruă kuič ai tiê klei čang hmăng si srăng ngă čiăng mjing boh kdrŭt, mâo klei bhiăn mă bruă djŏ, hŏng knuă druh jhŏng duh mĭn hdră êlan knhêč, bi djŏ hŏng gưl bruă kơ pô thâo mjing klei mă bruă mâo boh tŭ dưn.”

  Dơ̆ng mơ̆ng ƀuôn prŏng hlŏng truh kơ krĭng ƀuôn sang, mơ̆ng krĭng dap mnai hlŏng truh kơ krĭng knông lăn, jih jang klei čang hmăng anăn, hlăk bi klin jing sa hnoh êa đoh mbĭt: Klei jưh knang kơ Đảng, nao hlăm êlan mđĭ kyar lăn čar hlăm ênuk gưl mrâo. Hŏng Daklak – čar mâo lu djuê ana hdĭp mbĭt mbla, mâo lu klei găl, lehanăn ăt lu klei lông dlăng mơh – Klei bi kƀĭn prŏng 14 mâo leh mnuih ƀuôn sang mơĭt klei čang hmăng srăng pŏk hdră êlan jăk djŏ hdră pioh Daklak, lehanăn dŭm alŭ wăl hlăm kluôm ala đĭ kyar pral, lehanăn kjăp hlăm ênuk gưl mrâo./.