Ti anôk bi tuôm hŏng mnuih ƀuôn sang să Đưng K’Nớ, kdriêk Lạc Dương, čar Lâm Đồng, mnuih ƀuôn sang akâo kơ knŭk kna bi leh bruă mkra êlan Ngŏ Duôr čư̆ prŏng, êlan dơ̆ng čar mrô 722 găn alŭ wăl kñăm mâo êlan mkŏ hlăm bruă mnia mblei, duh bi liê bruă nah gŭ, boh nik dhiang ba pui kmlă 3 pioh kơ mnuih ƀuôn sang duh mkra lehanăn hdĭp mda, mđĭ bruă knuă hlăm krĭng… Mnuih ƀuôn sang kơ anei mđing êdi kơ bruă răng mgang dliê, lehanăn dưi dưn jih jang hdră êlan mơ̆ng bruă răng mgang dliê, kñăm bi hơĭt klei hdĭp mda. Mnuih ƀuôn sang bi lač hdră êlan mơ̆ng klei răng mgang dliê mâo ngă mơ̆ng lu thŭn leh, ƀiădah kyua alŭ wăl amâo mâo knơ̆ng mbông êa ôh, snăn mnuih ƀuôn sang dưi dưn mơ̆ng hdră êlan anei amâo mâo lu ôh mkă hŏng dŭm anôk mkăn. Mnuih ƀuôn sang ti bon Niêng Oanh, ti alŭ mrô 1, să Đưng K’Nớ lač, knŭk kna bi ksiêm dlăng čiăng bi mâo klei mtăp mđơr, djŏ guôp hĭn hlăm bruă bi tĭng tla bruă tŭ mă phăn jao răng mgang dliê, mâo msĕ snăn kơh mnuih ƀuôn sang srăng siă suôr hŏng bruă răng mgang dliê, hơĭt klei hdĭp hŏng bruă dliê.

 “Klei tĭng tlă bruă răng mgang dliê snăn să hmei mâo dưn jing ƀiă snăk, tŭ lu klei luič kyua bruă anei. Êjai anăn, lu mnuih ƀuôn sang hdĭp hlăm bruă răng mgang dliê yơh, mơ̆ng anăn klei hdĭp lĕ nanao hlăm klei dleh dlan. Hmei čang hmăng mâo klei bi mlih tĭng wĭt kơ bruă bi tĭng tla bruă răng mgang dliê”.

 Blŭ hrăm ti anôk bi tuôm, Phan Đình Trạc, Khua kiă kriê bruă knuă gưl dlông lač, jih jang klei blŭ mơ̆ng mnuih ƀuôn sang jing djŏ. Êpul bi ala bruă kƀĭn ala čar Lâm Đồng srăng akâo kơ dŭm anôk bruă, êpul êya djŏ tuôm ksiêm dlăng mgahih msir hŏng klei djŏ, čiăng rơ̆ng klei hdĭp mda mnuih ƀuôn sang hdĭp hŏng bruă dliê.

           “Ti anôk mâo răng kriê kjăp dliê, ƀiădah hlăm alŭ wăl anăn amâo mâo phŭn pui ôh, snăn bruă bi tĭng tla hŏng ênoh êlưih, snăn mnuih ƀuôn sang lĕ hlăm klei bi rai dliê, srăng ba klei jhat hĭn kơ klei amâo mâo tĭng tla brei kơ mnuih ƀuôn sang bruă răng mgang dliê? Klei anei hmei bi tĭng leh čiăng truh kơ anôk kñăm jing dưi răng mgang kjăp dliê. Boh nik, bi mâo klei ktrâo atăt si srăng ngă čiăng kơ dŭm mta ana êa drao yuôm gŭ êyui dliê, bi mâo hdră êlan răng mgang, lehanăn lŏ dơ̆ng pla mjing êjai, hrui mă ana êa drao anăn jing mnơ̆ng pioh duh kơ klei hdĭp mda mnuih ƀuôn sang. Kâo mĭn hdră anei jing găl djŏ hlăm bruă dôk bi răng mgang dliê, lehanăn mđi ênoh mâo ba wĭt kơ mnuih ƀuôn sang mơh”.

Ti anôk bi tuôm hŏng mnuih ƀuôn sang ti să Ka Đơn, kdriêk Đơn Dương, mnuih ƀuôn sang bi êdah klei sa ai, klei đăo knang, lehanăn bi myuôm boh tŭ dưn bruă bi kdơ̆ng hŏng klei ƀơ̆ng ngăn, boh nik klei knŭk kna lŏ mkŏ wĭt khuăt êpul ngă bruă êpul ngă bruă hlăm Đảng, Knŭk kna. Lehanăn mnuih ƀuôn sang akâo kơ êpul bi ala bruă kƀĭn ala čar Lâm Đồng mghaih msir bri kơ lu klei adôk ka djŏ hlăm bruă lăn ala, hlue ngă klei bhiăn lăn ala, klei bhiăn êpul hgŭm bruă, klei brei mưn lăn, klei čhĭ lăn, klei kơ ênoh ênil lăn ala hlăm dŭm anôk bruă duh mkra. Mnuih ƀuôn sang mâo klei akâo brei mđing hĭn duh bi liê kơ êlan klông nao kơ hma, knơ̆ng mbông êa, kban kdrông, lehanăn ngă bi ênưih djăp mta bruă ngă hră mơar hŏng mnuih ƀuôn sang, đru rŭ mdơ̆ng mkra wĭt sang hlang mtih kđuh, duh bi liê ngă prăk kơ bruă duh mkra pla mjing… Năng mđing hĭn jing mâo lu klei mnuih ƀuôn sang hưn lu phung knuă druh ngă bruă knŭk kna ngă bi dleh mnuih ƀuôn sang, ngă hră mơar dleh dlan mtŭk mtŭl, bi ktrŏ kơ mnuih ƀuôn sang, ngă kơ mnuih ƀuôn sang êrô nao lu blư̆.

 Tui si Phan Đình Trạc, Khua kiă kriê bruă knuă gưl dlông lač, anei jing dŭm mta boh klei klă mngač, hmăi djŏ hŏng klei duh mkra lehanăn klei hdĭp mda mnuih ƀuôn sang, čiăng bi mâo dŭm knơ̆ng dhar bruă mđing uêñ mghaih msir. Hlăm anăn, dŭm klei dôk đing kơ klei adôk ka djŏ hlăm hdră mă bruă hŏng mnuih ƀuôn sang, ngă bi rŭng, bi dleh kơ mnuih ƀuôn sang, brei mâo klei ksiêm dlăng ruh mgaih bi jih:

“Hdră mă bruă sa ƀăng bhă, ƀiădah bi wĭt nanao hlăm lu blư̆, lehanăn ngă êdah jih klei hgăm hră mơar mnuih mơĭt, lĕ hlăm kngan phung duah ƀơ̆ng ngăn dleh dôk krah wah. bi êdah bruă klăm hŏng mnuih ƀuôn sang, amâodah nah tluôn ya mta klei amâo mâo jăk mơ̆ amâodah hơăi? Ară anei, Khua gĭt gai Đảng Tô Lâm lu blư̆ leh mñă, lehanăn drei bi kut kat mâo klei bi mlih prŏng kơ êpul khua kiă kriê hlăm kluôm ala, bi hrŏ ênoh mnuih mă bruă, mđĭ hnơ̆ng kjăp klei thâo hlăm bruă mơ̆ng mnuih mă bruă, ƀiădah drei lui msĕ snei, jing sa mta klei amâo lŏ djŏ ôh. Kâo mâo klei mtă brei drei ngă bi mngač mtam, tơdah ƀuh ya mta klei amâo mâo djŏ, snăn bi mghaih msir bi jih, lehanăn lŏ wĭt hưn hŏng mnuih ƀuôn sang thâo tinăn"./.