Hlăm ênoh giăm 40 klei blŭ mơ̆ng mnuih ƀuôn sang, ti anôk bi tuôm hŏng phung khua bi ala, lu jing klei mnuih ƀuôn sang lač kơ klei bi mmiă lăn ala plah wah dŭm knơ̆ng bruă, phung duh mkra mâo knŭk kna jao lăn hŏng mnuih ƀuôn sang. Tui si klei mnuih ƀuôn sang bi êdah, klei bi ksĭng mmiă lăn ala anei găn dŭm pluh thŭn leh, ƀiădah ka mâo klei mghaih msir bi leh ôh. Nguyễn Hữu Tân, pô bi ala brei kơ êbeh 60 gŏ êsei mnuih ƀuôn sang ti alŭ Hiệp Hòa, să Ninh Gia, lač:  

“Hrue 29/8/1988, Knơ̆ng bruă sang čư̆ êa čar jao leh kơ anôk bruă mjeh mjiêng dliê kyâo Lang Hanh truh 200ha ƀiădah hlăm anăn lăn mnuih ƀuôn sang hmei hlăk dôk pla mjing. Klei bi mklă ti mta 3 lač klă, hŏng ênoh lăn mnuih ƀuôn sang dôk pla mjing, snăn akâo kơ dŭm gưl mâo klei dưi, dŭm dhar bruă bi mghaih msir djŏ tui si klei bhiăn, ƀiădah dơ̆ng mơ̆ng hlăk anăn truh kơ ară anei. Mnuih ƀuôn sang mâo leh klei akâo dơ̆ng mơ̆ng gưl să, nao kơ kdriêk, lehanăn truh kơ čar, lehanăn lŏ trŭn kơ să”.

Ƀuh jih jang klei djŏ tuôm hlăm bruă kiă kriê, ba yua, lehanăn klei bi mmiă lăn ala ti să Ninh Gia bŏ hŏng klei dleh lehanăn sui, Phan Đình Trạc, Khua kiă kriê bruă knuă mơ̆ng gưl dlông mtă leh kơ phung khua kiă kriê čar Lâm Đồng ksiêm bi pral lehanăn mghaih msir bi leh hlăm grăp klei dôk bi kuan mmiă lăn ala anăn. Hŏng jih jang dŭm mta bruă dôk hlăm klei dưi pô kiă kriê mghaih msir, êpul bi ala bruă kƀĭn ala čar Lâm Đồng srăng mâo hră mơar mta kơ phŭn bruă lĭng kahan mghaih msir. Phan Đình Trạc, lač:

        “Lač kơ boh klei lăn ala, kâo mâo klei čiăng mtă kơ k’ĭng khua knơ̆ng bruă sang čư̆ êa čar Nguyễn Ngọc Phúc, Knơ̆ng bruă ngăn dŏ lehanăn wăl hdĭp mda mbĭt hŏng jih jang phung khua kiă kriê dôk tinei, kiă kriê, gĭt gai mtam bruă mghaih msir truh hŏng grăp mta bruă. Mnuih ƀuôn sang lač, leh êmuh kdriêk, snăn kdriêk lač êmuh čar, lehanăn amâo mâo ƀuh klei mghaih msir ôh, lehanăn čar lŏ lač anăn jing bruă mghaih msir ti kdriêk, bi lư bruă klam nanao msĕ snăn, snăn kơ hlei pô mnuih ƀuôn sang săng lŏ mbăng. Bi klei kơ lăn djŏ tuôm hŏng đang dliê kyâo mrô 78 snăn kâo mtă kơ adŭ bruă čih mkra hră mơar, mơ̆ng êpul khua bi ala bruă kƀĭn ala čar lač bi ênŭm jih jang bruă dôk găn ară anei mơ̆ng đang dliê kyâo čiăng mơĭt kơ phŭn bruă lĭng kahan, brei diñu hriê kơ anei, hgŭm hŏng čar, hŏng anôk bruă ksiêm hriăm kơ bruă lĭng kahan mghaih msir bi jih klei anei”.

Êlâo ăan, ti să Trạm Hành, ƀuôn prŏng Đà Lạt, Khua kiă kriê bruă knuă gưl dlông Phan Đình Trạc mbĭt hŏng êpul bi ala bruă kƀĭn ala čar Lâm Đồng mâo leh klei bi tuôm hŏng mnuih mă bruă, lehanăn phung knuă druh, đoàn viên công đoàn.

Ti anôk bi tuôm, mâo lu mnuih ƀuôn sang lač phung kiă kriê dliê yơh jing phŭn pô ngă hlăm dŭm bruă anăn, ƀiădah ară anei diñu amâo mâo klei dưi mđing uêñ kơ digơ̆ ka djăp ênŭm ôh, amâo mâo mđing ôh kơ klei suăi êmăn digơ̆ mă bruă, klei huĭ hyưt hlăm bruă răng mgang dliê. Phung bi ala akâo brei mâo klei lŏ wĭt dlăng klei anei, čiăng bi mâo dŭm hdră êlan rơ̆ng ba wĭt klei tŭ dưn kơ phung ngă bruă răng mgang dliê – jing hlăm anôk mâo hnơ̆ng luôm dliê prŏng hĭn hlăm kluôm čar.

Blŭ hrăm ti anôk bi tuôm hŏng phung bi ala kơ mnuih ƀuôn sang, Phan Đình Trạc, Khua kiă kriê bruă knuă gưl dlông lač, klei mnuih ƀuôn sang bi êdah anăn jing djŏ. Êpul bi ala bruă kƀĭn ala čar Lâm Đồng srăng čih pioh, bi klin, lehanăn mâo klei hâo mdah truh hŏng dŭm anôk bruă gưl dlông:

“Lač kơ êpul thơ̆ng kơ bruă răng mgang dliê, ka mâo yap jing êpul mă bruă hlăm anôk huĭ hyưt ôh, ƀiădah boh sĭt klei dôk găn hlăm bruă knuă jing hŏng phung gak răng dliê ăt dôk hlăm klei huĭ hyưt, sĭt nik klei anei srăng ba mtruh hŏng knŭk kna thâo. Êngao anăn, dŭm mta bruă hlăm bruă mdrao mgŭn, bruă sang hră mơar, bruă công đoàn, klei mă bruă knuă…hmei srăng čih pioh ba hâo hưn hŏng gưl dlông”.

Wưng anei, Êpul bi ala bruă kƀĭn ala čar Lâm Đồng mđup brei leh truh 20 hnư mnơ̆ng kơ dŭm gŏ êsei knŭk kna dlăng ba, mnuih mâo bruă tŭ dưn hŏng lăn čar, mnuih mâo klei hdĭp dleh dlan ti să Trạm Hành, ƀuôn prŏng Đà Lạt, 20 hnư mnơ̆ng mđung brei kơ dŭm gŏ êsei knŭk kna dlăng ba ti să Ninh Gia, kdriêk Đức Trọng, čar Lâm Đồng.