Êpul bi ala bruă kƀĭn ala čar Daklak mkŏ mjing leh klei bi kƀĭn mă klei blŭ kơ klei čih mkra hdră bhiăn mâo bruă kƀĭn ala bi trông ti anôk bi kƀĭn tal anei. Ti anôk bi kƀĭn, mnuih ƀuôn sang čar Daklak đru mguôp leh klei blŭ pô hŏng dŭm klei čih mkra msĕ si hdră bhiăn Dăng kông êlan kbưi lŏ mlih mrâo, hdră bhiăn êa jua lŏ mlih mrâo, hdră bhiăn mkŏ mjing klei brei čan prăk lŏ mlih mrâo; hdră bhiăn kiă kriê răng mgang wăl anôk lĭng kahan; klei bhiăn mnia mblei sang lăn lŏ mlih mrâo, hdră bhiăn sang dôk lŏ mlih mrâo.

        Đru mguôp kơ klei bhiăn mnia mblei sang lăn lŏ mlih mrâo, lu phung bi ala lač: Hŏng dŭm mta mtrŭn mrâo, srăng mkŏ mjing bi djăp klei bhiăn, jih jang bi ngă bruă mđrăm, msĕ čiăng kơ bruă kiă kriê bi djŏ, đru ba wĭt klei tŭ dưn sĭt êmĭt bruă sang lăn. Rơ̆ng kơ jih jang bruă anei rơ̆ng mâo klei đĭ kyar hơĭt, ngă bruă hŏng klei klă mngač. Siămdah čiăng mđĭ hĭn bruă đua klam, klei thâo hlăm bruă mơ̆ng dŭm anôk bruă knŭk kna kiă kriê kơ jih jang bruă sang lăn, snăn hlăm klei bhiăn anei năng lŏ mbŏ đa đa mta, kăp ksiêm tui si klei bhiăn kơ bruă mnia mblei sang lăn.    Hoàng Trọng Hùng, k'iăng khua knơ̆ng bruă hlue ngă klei bhiăn čar Daklak mâo klei blŭ:

“Kdrêč 6 mta 87 lač klă kơ boh phŭn bruă knŭk kna kiă kriê klei mnia mblei sang lăn, snăn kâo mâo klei akâo lŏ mbŏ kơ bruă kăp ksiêm tui si klei bhiăn djŏ hŏng bruă mnia mblei sang lăn. Kyuadah anei jing bruă yuôm kơ knŭk kna kiă kriê. Lehanăn ti mta 89 ăt lač mơh kơ klei jao kơ phŭn bruă rŭ mdơ̆ng kčĕ kơ knŭk kna kăp ksiêm tui si klei bhiăn kơ bruă bi mnia mblei sang lăn, kyuanăn kâo mĭng năng lŏ thiăm kơ bruă anei”.

        Blŭ hrăm klah čŭn ti anôk bi kƀĭn, K’iăng khua êpul klam kơ bruă truăn mơ̆ng êpul phung bi ala bruă kƀĭn ala čar Daklak Lê Thị Thanh Xuân mâo čih pioh, lehanăn bi myuôm jih jang klei blŭ mơ̆ng phung bi ala đru mguôp klei blŭ hŏng klei čih mkra hdră bhiăn. Lehanăn čang hmăng kơ phung bi ala lŏ dơ̆ng ksiêm duah, mâo dŭm klei blŭ čih hlăm hră mơar mơĭt kơ êpul bruă kƀĭn ala čar lŏ dơ̆ng tŭ mă, bi klin ba mdah ti anôk bi kƀĭn tal 5.

Ăt hlăm hrue kăm êgao, êpul phung bi ala bruă kƀĭn ala čar Kon Tum bi mguôp leh hŏng anôk bruă mặt trận čar, lehanăn hgŭm kiă kriê mnuih ngă bruă čar mkŏ mjing leh klei bi kƀĭn bi tuôm phung bi ala mâo giăm 100 čô phung bi ala kơ mnuih ngă bruă ti alŭ wăl.

Ti anôk bi kƀĭn, mnuih ngă bruă čar Kon Tum mâo leh klei akâo kơ êpul phung bi ala bruă kƀĭn ala čar truh 6 êpul boh klei, hŏng 38 mta bruă mâo: Êpul ngă bruă kiă kriê, hlue ngă hdră êlan; Êpul bruă lŏ hma dliê kyâo; Êpul duh mkra mnia mblei; Êpul bruă mdrao mgŭn; Êpul bruă sang hră mơar, lehanăn êpul kơ klei hdĭp mda ala ƀuôn.

 Hưn mthâo hŏng mnuih ƀuôn sang, Phạm Đình Thanh, K’iăng khua êpul klam truăn kơ bruă hlăm êpul bi ala bruă kƀĭn ala čar Kon Tum brei thâo, jih jang klei mnuih ngă bruă hlăm čar akâo kơ êpul phung ngă bruă kƀĭn ala čar jing djăp ênŭm ba mtruh hŏng knŭk kna, dŭm phŭn dhar bruă djŏ tuôm. Msĕ si kơ bruă đru mdul kơ phung knuă druh ngă bruă răng mgang dliê kmrơ̆ng, klei đru mdul kơ phung nai aê mdrao, boh nik hlăm wưng dôk găn klei ruă tưp... čiăng kơ jih jang klei akâo anăn mơ̆ng mnuih ngă bruă hlăm čar dưi mâo klei mđing hmư̆, lehanăn mghaih msir, Phạm Đình Thanh, lač:

“Êpul bi ala bruă kƀĭn ala čar čang hmăng kơ êpul bruă kiă kriê mnuih ngă bruă čar lŏ ksiêm wĭt bi nik hŏng jih jang djăp mta bruă, sitôhmô hlăm jih  38 mta bruă anei ksiêm dlăng hĕ bi nik amâo mâo duah ngă mă khă kơ leh ôh. Tơdah jih jang bruă amâo mâo nik srăng jing dleh kơ knŭk kna mghaih msir. Jih jang ya mta bruă bi klă kơ bruă klam klei wĭt lač mơ̆ng dŭm anôk bruă knŭk kna ti gưl dlông snăn drei srăng bi klin, mâo klei akâo jưh knang kơ dhar bruă gĭt gai bruă kƀĭn ala”.

Ti dŭm anôk bi tuôm hŏng phung bi ala, êpul bruă kƀĭn ala dŭm čar ti Lăn Dap Kngư mâo leh klei hâo mdah kơ hdră klei bi kƀĭn tal 5, bruă kƀĭn ala gưl XV; lehanăn tŭmă čih pioh jih jang klei blŭ, klei akâo mơ̆ng puhng bi ala pioh bi klin, hâo mdah kơ dŭm dhar bruă djŏ tuôm jih jang klei phung bi ala akâo tui si klei dưi mơ̆ng dŭm anôk bruă anăn srăng mghaih msir djŏ hŏng mta mtrŭn.

Khua knơ̆ng čih hră anôk bruă kƀĭn ala, khua adŭ bruă kƀĭn ala Bùi Văn Cường lač, Klei bi kƀĭn tal 5, bruă kƀĭn ala gưl 15 pŏk hlăm hrue 22/5; bi ruĕ ti hrue 20/6/2023 (dah êmưt jing ti hrue 21/6/2023). Tui si tĭng hrue mmông bruă kƀĭn ala mă bruă ti anôk bi kƀĭn tal anei jing 22 hrue. Bruă mprăp êmiêt jih jang klei kơ bruă bi kƀĭn mâo leh dŭm anôk bruă djŏ tuôm ngă hŏng klei pral lehanăn kjăp, djŏ hŏng klei kčah bi hmao kơ klei bi kƀĭn./.