Hlăm klei knŭk kna duh bi liê, phung bi ala bruă kƀĭn ala ăt mđing kơ bruă ngăn prăk adôk ka dưi bi leh ôh 3 bruă lăn čar kñăm, boh nik hŏng hdră mrâo kơ klei mđĭ kyar bruă duh mkra, lehanăn klei hdĭp mda krĭng mnuih djuê ƀiă lehanăn čư̆ čhiăng. Wăt hlăm hdră dôk ngă nanao, jing bruă mkŏ mkra krĭng ƀuôn sang mrâo lehanăn bruă bi hrŏ ƀun hŏng klei kjăp, ăt dôk gŭm kpăk lu bruă ngă dưi ngă mơh. Pô bi ala Đinh Ngọc Quý, khua hlăm êpul kiă kriê bruă yang ƀuôn mơ̆ng anôk bruă kƀĭn ala lač:

        "Dŭm mta hdră êlan mâo kñăm ngă mbĭt ăt dôk tuôm hŏng klei dleh dlan, lehanăn mâo khua knŭk kna lŏ bi klă sa hdră mtrŭn ruh mgaih kơ êbeh 400 klei gun kpăk, truh ti mmông anei, dŭm phŭn dhar bruă mâo leh klei wĭt lač. Siămdah, bruă bi mlih hdră mtrŭn djŏ tuôm hŏng bruă hlue ngă kơ jih jang mta čuăn jing ka hmao ôh, lehanăn knŭk kna hlăk lŏ dôk bi leh. Čang hmăng hlăm wưng kơ anăp, knŭk kna srăng pral ngă klei anei, jing amâo mâo djŏ knŏng đru kơ dŭm phŭn dhar bruă, ƀiădah lŏ đru kơ djăp alŭ wăl ruh mgaih, boh nik bruă ruh mgaih bi ngă hĕ mơ̆ng gưl kdriêk, gưl să”.

         Nguyễn Thị Hải, dôk ti alŭ Phú Vinh, să Ia Băng, kdriêk Čư̆ Prông, čar Gia Lai lač hlăm dŭm thŭn êgao, klei hlue ngă bruă lăn čar kñăm ti krĭng taih kbưi čar Gia Lai ka djŏ hŏng klei hmăng hmưi ôh. Hlăm anăn bruă kñăm tal êlâo hĭn jing kơ êlan klông, čiăng đru mdul kơ klei hdĭp mda ala ƀuôn mnuih ƀuôn sang, găl ênưih kơ klei bi mnia mblei hlăm krĭng dôk găn klei dleh dlan.

     “Kâo ƀuh ti krĭng taih kbưi brei mâo klei duh bi liê lu hĭn, yuôm bhăn hĭn jing kơ bruă rŭ mkra êlan klông, kyua mơ̆ng klei anei mơh lu phung hđeh amâo mâo dưi truh kơ sang hră, mnuih ƀuôn sang dleh dlan kơ klei êrô êbat, lu blư̆ boh mnga leh mâo ba wĭt klei čiăng čhĭ mnia mnơ̆ng pô mâo dleh dlăn snăk”.

          Phung bi ala ti Daklak dôk mđing êdi kơ klei đru dŭm hdră êlan hŏng phung duh mkra man dưn lehanăn điêt hlăk dôk găn hlăm klei toh hroh msĕ si ară anei. Daklak mâo hlăm brô 13.500 phung duh mkra dôk ngă bruă, hlăm anăn mâo dŭm anôk duh mkra man dưn lehanăn điêt, 97,5% ênoh jih jang phung duh mkra hlăm čar. Wưng leh êgao, mâo dŭm hdră êlan mâo ngă leh jăk đru mdul kơ phung duh mkra man dưn lehanăn điêt. Siămdah, lu phung bi ala ăt dôk lač, boh sĭt klei duh mkra hlăk dôk găn klei dleh dlan êdi, boh nik hlăm klei čan prăk pioh mđĭ kyar bruă knuă, ƀiădah mâo đa đa knơ̆ng dhar bruă ka jih ai tiê ôh đru ktrâo atăt phung duh mkra, snăn mâo lu bruă adôk mtŭk mtŭl, boh nik hlăm bruă mâo phung duh mkra ngă dŭm bruă lŏ hma. Nguyễn Thị Hường, mnuih dôk ti ƀuôn prŏng Ƀuôn Ama Thuôt, čar Daklak akâo:

“Čang hmăng knŭk kna bi mâo dŭm hdră êlan jăk hĭn hŏng phung duh mkra ngă hlăm dŭm bruă lŏ hma. Êlâo dih dŭm hdră êlan ba yua hŏng bruă lŏh ma jing kơ êpul hgŭm bruă, mâo ngă bruă jăk leh mơh, ară anei čiăng lŏ mâo hdră êlan jăk hĭn kơ phung duh mkra ngă dŭm bruă lŏ hma man dưn lehanăn điêt, msĕ si kơ klei čiăng čan prăk, bi mâo hĕ dŭm bruă đruh kơ klei mă bruă bi hdjul kơ bruă čan prăk hŏng êpul bruă anei. Snăn hlăm klei bi kƀĭn anei, akâo kơ bruă kƀĭn ala mđing hĭn bi trông kơ bruă anei”.

Klei yuôm bhăn tinei jing bi mâo klei tŭ dưn, mđĭ bruă duh mkra, amâo mâo djŏ ôh knŏng bi mâo hdră êlan mrâo. Ƀiădah bruă amâo mâo klei tŭ dưn. Anei yơh jing klei lu phung bi ala bruă kƀĭn ala bi êdah nah êngao kơ klei bi kƀĭn tal anei ti anôk bi kƀĭn bruă kƀĭn ala.

Phung bi ala bruă kƀĭn ala mñă, klei yuôm bhăn tinei jing bi mâo klei tŭ dưn ngă bruă bi năng hŏng prăk leh bi liê, đru kơ phung duh mkra dưi găn jih klei dleh dlan. Jing klei ba yua ngăn prăk bi tŭ jing kơrŭ wĭt bruă duh mkra mâo klei đĭ kyar hĭn. Snăn, tui si pô bi ala Phan Đức Hiếu, khua hlăm êpul bruă duh mkra hlăm bruă kƀĭn ala mâo klei čoh čuăn tui si klei knŭk kna bi êdah, kñăm lŏ dơ̆ng ngă dŭm bruă bi hrŏ truh 2% jia ênoh ênil đĭ – VAT:

"Hlue ngăh dră êlan klei kơ jia ênoh ênil đĭ mrâo hlăm wưng êgao, ƀuh lu mta klei adôk mtŭk mtŭl, hlăm anăn mâo wăt klei dleh dlan kơ dŭm anôk bruă kiă kriê, lehanăn kơ phung duh mkra hlue ngă, msĕ si bi mlih hdră êlan mkă tĭng amâodah dŭm klei dôk bi êmuh kơhdră êlan ngă bruă êlâo kơ hrue kčah, ƀiădah lĕ hră mơar bi leh jing êdei kơ hrue kčah si ngă klei anăn dưi mơ̆? Snăn tal anei čang hmăng mă klei hriăm mơ̆ng gưl êlâo, kñăm pioh đru lehanăn mâo klei ktrâo atăt bi jăk tơdah bruă kƀĭn ala bi klă kơ bruă jia ênoh ênil đĭ, kñăm si srăng ngă djŏ hŏng klei dôk jing đăm lĕ nanao hlăm klei dleh dlan, mtŭk mtŭl, jing amâo mâo klei tŭ dưn ôh dôk ngă dŭm hdră êlan ƀuh jing amâo mâo găl”./.