Êpul bi ala bruă kƀĭn ala čar Daknông mkŏ mjing leh truh 2 tlam klei bi tuôm hŏng phung bi ala mnuih ƀuôn sang ti dŭm să Trường Xuân (kdriêk Dak Song), să Dak Som, (kdriêk Dak Glong). Ti anôk bi kƀĭn leh êgao, Bruă kƀĭn ala mâo bi mklă leh dŭm hdră êlan kơ bruă mkra êlan dơ̆ng pral Gia Nghĩa- Chơn Thành hŏng boh taih hlăm brô 130km, ênoh bi liê jih jang truh 25.540 êklai prăk.

Lu phung bi ala kơ mnuih ƀuôn sang mâo klei mơak, ƀuh bruă klam mơ̆ng phung bi ala bruă kƀĭn ala čar Daknông ba hưn mdah leh ai tiê mơ̆ng mnuih ƀuôn sang truh kơ anôk bruă kƀĭn ala trông čhai, kơ bruă rŭ mkra êlan dơ̆ng pral. Mnuih ƀuôn sang čang hmăng bruă mkra anei pral mâo klei rŭ mkra, mâo klei găl ênưih kơ klei êrô êbat, đru kơ mnuih ƀuôn sang mâo klei jăk găl hlăm klei nao mdrao mgŭn ti gưl nah dlông.

        Hưn kơ klei anei, Ngô Thanh Danh, Khua bruă Đảng čar, jing khua êpul bi ala bruă kƀĭn ala čar Daknông lač, hŏng klei đua klam prŏng mơ̆ng dua boh čar Daknông lehanăn Bình Phước, leh lu blư̆ mâo klei akâo, klei bi êdah, knŭk kna lu blư̆ leh mâo klei bi mlih kơ hnơ̆ng rŭ mkra êlan dơ̆ng pral Gia Nghĩa (Đắk Nông) - Chơn Thành (Bình Phước) srăng dơ̆ng rŭ mkra mơ̆ng knhal jih thŭn 2024, tui si hdră ciăng bi leh hlăm thŭn 2026, dưi brei yua hlăm thŭn năm 2027. Čar hlăk lŏ dơ̆ng akâo bruă mkra êlan dơ̆ng pral Gia Nghĩa - Ƀuôn Ama Thuôt čiăng pŏk êlan prŏng đru kơ Lăn dap kngư mâo klei đĭ kyar:

“Mnuih ƀuôn sang akâo lŏ phai êlan dơ̆ng prŏng mrô 14 mơ̆ng Gia Nghĩa truh kơ kban mrô 20, snăn hŏng kdrêč êlan anei hmei mâo klei akâo leh mơh. Jing leh leh ruĕ mkra êlan dơ̆ng pral Nghĩa – Chơn Thành, snăn hmei srăng lŏ dơ̆ng akâo rŭ mkra êlan dơ̆ng pral mơ̆ng Gia Nghĩa – Ƀuôn Ama Thuôt, lehanăn sĭt nik klei anei jing kơ gưl păn bruă êdei. Lehanăn hŏng êlan anei, snăn drei dưi lač čiăng bi mâo sa klông êlan hluh lăn dap kngư mtam sĭt nik srăng jing găl ênưih yơh kơ bruă pioh mđĭ kyar. Ară anei hnơ̆ng êdeh găn hlăm čar Dak Nông jing prŏng, kah knar hlăm sa hrue mâo hlăm brô 2500 boh êdeh găn ti poih, bi hlăm dŭm hrue knăm mơak jing đĭ hĭn 2-3 blư̆ mtam”.

Hlăm klei bi tuôm hŏng mnuih ƀuôn sang, snăn phung bi ala djăp alŭ wăl, lŏ dơ̆ng hưn mdah hŏng phung bi ala bruă kƀĭn ala thâo dŭm bruă dôk ka djŏ, klei dôk dleh kpăk. Mnuih ƀuôn sang ti kdriêk Phú Thiện, čar Gia Lai lač kơ bruă lăn ala adôk mtŭk mtŭl. Hoàng Thanh Tùng, dôk ti êpul anôk dôk mrô 3, wăl krah Phú Thiện brei thâo.

“Mâo lu blư̆ mnuih ƀuôn sang ba ngă hră mơar, ti anôk bruă ngă hră mơar kdriêk pioh rŭ mdơ̆ng sang rông čĭm iăt. Adŭ bruă anei tŭ mă mơh hră mơar, ba jao djŏ hŏng klei kčah mtrŭn leh, ƀiădah knŏng ƀuh klei wĭt lač jing dôk guôn čar wĭt lač êlâo. Tơl truh ti wưng anei jing 5 mlan leh amâo mâo ƀuh điêt đuôt sa klei wĭt lač ôh. Ya ngă amâo mâo ngă ôh hră mơar kơ mnuih ƀuôn sang djŏ tui si klei bhiăn, ƀiădah lač dôk guôn nanao klei kčĕ yơh? Dah snăn si srăng ngă čiăng kơ adŭ bruă ngă hră mơar lăn ti kdriêk mă bruă djŏ hĭn?”

Mnuih ƀuôn sang ɃP Bảo Lộc, čar Lâm Đồng lĕ lač, klei čuăl mkă mnơ̆ng hlăm gŭ lăn adôk bi mđĭ mđăl hŏng lu bruă čuăl mkă mkăn mơ̆ng gưl dlông hlŏng kơ nah gŭ. Klei anei ngă lu klei dleh kpăk prŏng hlăm klei bhiăn mă bruă, jing leh mnơ̆ng kgang êjai ngă bruă, mâo lu bruă phŭn hlăm čar dôk kpăk đuôm. Phạm Thị Hường, ti ƀuôn hgŭm Lộc Tiến, TP Bảo Lộc brei thâo, kluôm čar mâo 2ha lăn mơ̆ng gŏ sang dôk gun hlăm klei čuăl mkă kyuanăn amâo mâo dưi tŭ ôh knơ̆ng prăk pioh čan prăk duh kơ bruă, kơ klei mkra wĭt pưk sang, kơ klei triêk lăn mbha kơ phung anak lehanăn lu mta bruă ngă mkăn djŏ tuôm hŏng gun kpăk sơăi. Klei hdĭp gŏ sang lĕ hlăm klei dleh dlan kyua klei anăn.

“Hŏng gŏ sang kâo, snăn klă sĭt jing bŏ hŏng klei dleh dlan. Kâo hdĭp kơ anei dŭm pluh thŭn leh, ară anei čiăng bi mlih hdră djă yua lăn amâo mâo dưi, čiăng mdơ̆ng sang kơ phung anak amâo mâo dưi, klei hdĭp mda lĕ hlăm klei dleh dlan. Gŏ sang hmei ăt msĕ hŏng lu gŏ sang mnuih ƀuôn sang mkăn hlăm alŭ wăl mâo klei akâo kơ bruă čuăl mkă duah mnơ̆ng hlăm gŭ lăn, tơdah mă bruă hlŏng mă bruă mtam yơh, bi tơdah hơăi bi kruh jih yơh bruă anei, ciăng kơ hmei hơĭt ai tiê duh ƀơ̆ng, đăm dôk nanao ôh hlăm klei kƀla amâo mâo klei hơĭt”.

Tŭ mă klei blŭ, klei akâo, phung bi ala bruă kƀĭn ala mâo leh klei mtă kơ dŭm knơ̆ng dharr bruă, lehanăn bruă sang čư̆ êa dŭm alŭ wăl mâo mtam klei wĭt lač. Hŏng ya mta bruă dôk hlăm klei dưi phŭn dhar bruă, lehanăn anôk bruă kƀĭn ala, snăn lŏ bi klin mơĭt truh kơ dŭm gưl mâo klei dưi mghaih msir./.