Mâo bruă Đảng să tiŏ nao ngă bruă ti atŭ Đăk Rô Gia, A Don mkŏ mjing leh êpul bi mguôp pla mjing kbâo Y Du leh anăn blŭ hrăm, siñê hŏng knơ̆ng bruă mkra mjing sĭk Kon Tum mkŏ mjing dŭm kdrăn kbâo prŏng.

Ơ A Don, dưi thâo mơ̆ng dŭm gŏ êsei mâo đang pla mjing điêt phŭn tal êlâo, leh êbeh 2 thŭn mkŏ mjing Êpul hgŭm pla kbâo Y Du mâo A Don ngă khua êpul mâo leh truh êbeh 150 gŏ êsei mŭt hgŭm pla kbâo hŏng boh prŏng truh leh êbeh 35ha ti să Đăk Trăm. Hŏng bruă klam jing k’iăng khua să Đăk Trăm, bi hgŭm hlăm êpul bruă Đảng ti alŭ Đăk Rô Gia, ya mta bruă mtrŭt ih nao hâo hưn mtô mblang mtă mtăn kơ mnuih ƀuôn sang nao mŭt hlăm êpul hgŭm pla kbâo?

-Êlâo hĭn, asei mlei kâo pô ƀuh klei hdĭp mnuih ƀuôn sang hlăm să tuôm hŏng lu klei dleh dlan, lu gŏ sang ka thâo duah ƀơ̆ng ôh, ƀuh pap snăk snăn kâo mâo bruă klam jing đru mnuih ƀuôn sang drei, mkŏ mjing êpul hgŭm, kâo jing pô ngă hră mơar kuôl kă hŏng dŭm knơ̆ng bruă čiăng mâo anôk kăp hrui blei kbâo mnuih ƀuôn sang. Kyua mâo klei đru mơ̆ng knơ̆ng bruă, kâo lehanăn mnuih ƀuôn sang mkŏ mjing êpul hgŭm bruă, mtrŭt jih jang mnuih ƀuôn sang bi hgŭm pla kbâo, kyua duah pla knŏng hbei ƀlang lehanăn mdiê amâo mâo ƀơ̆ng lu ôh, pla kbâo jing mnơ̆ng mâo čhĭ tŭ dưn hĭn. Knơ̆ng bruă mkŏ mjing lu klei găl mơh đru mnuih ƀuôn sang mjeh, hbâo pruê, truh yan koh mnuih ƀuôn sang tla jih nư čan êlâo kơ knơ̆ng briă.

-Gưl tal êlâo mtrŭt mjhar mnuih ƀuôn sang pla kbâo tuôm hŏng klei dleh dlan mơ̆, lehanăn si ih ngă čiăng mnuih ƀuôn sang hmư̆ lehanăn tui hlue?

Phŭn tal êlâo kâo mtrŭt mjhar mnuih ƀuôn sang tuôm hŏng lu klei dleh dlan snăk, tal êlâo jing, dah mtô mblang mnuih ƀuôn sang pla kbâo snăn mnuih ƀuôn sang dôk ngĭ ngư̆ amâo mâo jhŏng ôh, ƀiădah leh djă ti kngan ktrâo ti bruă mâo knuă druh bruă lŏ hma kyâo atăt. Lehanăn kâo nao truh hlăm grăp boh sang ktrâo atăt lehanăn mđĭ ai mnuih ƀuôn sang, snăn ƀrư̆ ƀrư̆ mnuih ƀuôn sang thâo săng lehanăn tui hlue, lehanăn mơ̆ng bruă pla mjing kbâo anei mơh gŏ sang hmei mâo sa ênoh hrui wĭt lu mơh, mâo prăl blei êdeh, mdơ̆ng sang. Mnuih ƀuôn sang ƀuh snăn bi mđing hmư̆ lehanăn tyui hriăm, ngă bruă tui si pô. Êpul hgŭm hmei ară anei mâo leh truh 153 čô hgŭm, hŏng ênhă mâo jih jang jing 35 ha.

-Yan koh kbâo leh êgao si klei tŭ dưn kbâo mâo ba wĭt mơ̆ng êpul hgŭm?

Yan tal êlâo mnuih ƀuôn sang mâo koh mơ̆ng 60 - 80 tôn/ha kbâo mda, hŏng đang kbâo mâo thŭn tal 2, tal 3 snăn mâo mơ̆ng 80 - 100 tôn/1ha, mâo ba wĭt hlăm brô mơ̆ng 70 - 90 êklăk prăk, kah hĕ jih kơ ênoh bi liê mnuih ƀuôn sang adôk mnga mơ̆ng 50 - 70 êklăk prăk. Kâo ƀuh mnuih ƀuôn sang pla kbâo mâo lu klei găl, knơ̆ng bruă hrui blei jih kbâo mnuih ƀuôn sang, lehanăn mâo wăt hră ênua kla mngač jing 850 êbâo kyuanăn mnuih ƀuôn sang amâo mâo klei hyưt ôh, kơ klei jăk êa hlĭm hjan, luič ênoh, thâodah mâo ênoh ƀiădah amâo mâo klei tŭ dưn. Siămdah, mnuih ƀuôn sang bi gĭr ktir hriăm êmuh, kreh kruiñ hlăm klei duh ƀơ̆ng. Tơdah dlăng kriê wiê ênăk djŏ hdră, snăn kbâo jing hĭn, mnuih ƀuôn srăng mâo êbeh prăk dưi tla nư.

- Boh sĭt mơ̆ng bruă pla kbâo mkă hŏng ana pla mkăn êlâo dih mnuih ƀuôn sang tuôm pla leh, si ih ƀuh klei tŭ dưn mơ̆ng kbâo?

Bruă pla kbâo tơdah mkă hŏng dŭm mta ana mkăn, snăn ƀuh jing mâo klei tŭ dưn hĭn. Msĕ si dưi pla sa yan kbâo, ƀiădah mâo koh mơ̆ng 4 - 5 thŭn êdi. Bi bruă pla hbei ƀlang, pla sa thŭn knŏng mâo buč dah lu êdi mil 2 blư̆ đuič, leh kơ ănăn drei lŏ wĭt pla mrâo. Tal êlâo, knơ̆ng bruă duh mĭn brei jih bruă kai, tal dua đru prăk bi mlih mnơ̆ng pla mjing, tyal 3 prăk dŭ kbâo mơ̆ng đang truh kơ sang mkra mjing mâo knơ̆ng bruă đru, tal 4 knơ̆ng bruă brei mơh kơ mnuih ƀuôn sang čan mjeh, hbâo prue, truh yan koh kbâo srăng lŏ bi wĭt nư klei kơ knơ̆ng bruă.

- Čiăng kơ mnuih ƀuôn sang tui hriăm, lehanăn hlue ngă si ih ƀuh bruă klam mơ̆ng sa čô đảng viên msĕ hŏng ih, lehanăn phung đảng viên mkăn hlăm êpul bruă Đảng alŭ Đăk Rô Gia anei?

Asei mlei kâo jing sa čô đảng viên, kâo nvgă klei bi hmô êlâo yơh. Dơ̆ng mơ̆ng klei duh ƀơ̆ng, hlŏng truh kơ klei dôk dơ̆ng ƀơ̆ng huă brei mâo klei thâo bi hmô jăk. Mơ̆ng mnuih ƀuôn sang ƀuih ya jing klei djŏ, klei jăk lehanăn tui hlue. Si drei blŭ snăn drei ngă msĕ snăn yơh, duh mkra pla mjing bi mâo klei tŭ dưn mơh, snăn kơh mnuih ƀuôn sang tui hlue.  

 -Jing klei bi hmô mkŏ mjing êpul hgŭm pla kbâo anei, si ih lŏ mâo klei mĭn hlăm bruă lŏ iêo jak mđĭ hĭn ƀĭng hgŭm mơ̆ng mnuih ƀuôn sang Đăk Rô Gia lehanăn dŭm boh ƀuôn mkăn nao bi pla kbâo jing sa klei pŏk phai?

-Asei mlei kâo ƀuh pap snăk ƀĭng hgŭm kyuadah mnuih ƀuôn sang pô ka thâo ôh hdră duh ƀơ̆ng. Kâo gĭr dôk mtrŭt mjhar mnuih ƀuôn sang čiăng kơ diñu hmư̆, thâo săng kyua klei tŭ dưn kơ pô hlăm bruă mŭt hlăm êpul hgŭm, grăp čô leh mâo klei gĭr čiăng bi mâo klei tŭ dưn bruă knuă, lehanăn mđĭ ênoh mâo ba wĭt, lehanăn anăp srăng lŏ bi lar lu hdră êlan mă bruă, srăng lŏ pla thiăm mơ̆ng 30 - 50 ha kbâo, čăng hmăng kơ ƀĭng hgŭm srăng dưi mđĭ hĭn ênoh mâo ba wĭt.  

-Lač jăk kơ ih, A Don mâo leh klei bi blŭ hrăm anei!