Leh klei bi kƀĭn tal 5, bruă Đảng êpul bruă kƀĭn ala lehanăn êpul khua kiă kriê bruă Đảng knŭk kna kiă kriê, gĭt gai kjăp jih jang bruă mơ̆ng anôk bruă, êpul bruă djŏ tuôm pral bi leh jih jang bruă phŭn hŏng klei kjăp pioh ba mdah kơ bruă kƀĭn ala bi mklă, ksiêm dlăng.

Bi đa đa klei mơ̆ng dhar bruă gĭt gai bruă kƀĭn ala ƀuh jing ka djăp klei găl ba mdah kơ anôk bruă kƀĭn ala ksiêm ti anôk bi kƀĭn tal 6, Khua knơ̆ng čih hră, khua adŭ bruă kƀĭn ala Bùi Văn Cường mñă bruă Đảng anôk bruă kƀĭn ala, lehanăn êpul kiă kriê knuă druh Đảng hlăm knŭk kna ksiêm dlăng gĭt gai jih jang dŭm anôk bruă lŏ dơ̆ng ksiêm duah, mprăp ba mdah kơ anôk bruă kƀĭn ala ksiêm bi mklă ti anôk bi kƀĭn tal 7.

Blŭ hrăm ti anôk bi kƀĭn khua knŭk kna Phạm Minh Chính lač, leh ruĕ klei bi kƀĭn tal 5 mơ̆ng bruă kƀĭn ala sa hrue, knŭk kna mâo mtam klei bi kƀĭn jao bruă mprăp kơ jih jang klei dôk hlăm klei dưi pô pioh ba mdah kơ bruă kƀĭn ala ksiêm dlăng, bi mklă ti anôk bi kƀĭn tal 6. Khua knŭk kna mñă, wưng leh êgao dŭm anôk bruă hlăm êpul bruă kƀĭn ala mâo leh klei bi mguôp kjăp hŏng dŭm anôk bruă hlăm knŭk kna. “Klei bi mguôp anei amâo mâo djŏ knŏng kơ dŭm bruă čih mkra hdră bhiăn đuič ôh, ƀiădah lŏ mâo dŭm bruă mkăn dôk hlăm klei dưi mơ̆ng anôk bruă kƀĭn ala, anôk bruă mâo klei dưi prŏng hĭn, bi mklă djăp mta bruă yuôm bhăn kơ lăn čar, mâo klei dưi ksiêm prŏng hĭn, mkŏ mjing hdră bhiăn lehanăn jih jang bruă prŏng hlăm bruă kƀĭn ala, jing mâo klei bi mguôp kjăp nanao hŏng knŭk kna hlăm klei tŭ dưn. Kâo ƀuh klei bi đru klam bruă msĕ snei jing sa ai hŏng bruă ktrŏ bruă kƀĭn ala dôk ngă. Kyuanăn bruă mơ̆ng knŭk kna nao hlăm klei pral hĭn mơh, kjăp hĭn mơh hlăm dŭm klei hlue ngă hdră bhiăn, dŭm bruă djŏ tuôm hŏng klei duh mkra ala ƀuôn, bruă răng mgang klei êđăp ênang. Mrâo anei, klei bi kƀĭn gưl dlông ksiêm wĭt jih jang klei bi mguôp kjăp plah wah bruă kƀĭn ala lehanăn knŭk kna”.

 Bi kơ dŭm mta bruă dôk êmưt, ka hmao mprăp ôh čiăng ba mdah kơ bruă kƀĭn ala ksiêm, bi mklă ti anôk bi kƀĭn tal 6 tui si hdră, Khua knŭk kna čang hmăng kơ dŭm anôk bruă hlăm bruă kƀĭn ala, dhar bruă gĭt gai bruă kƀĭn ala bi đru hŏng dŭm anôk bruă hlăm knŭk kna, kyuadah anei jing bruă dleh. Hlăm wưng tinăp, Khua knŭk kna mtă kơ tĭng srăng bi mguôp kjăp pioh mprăp kơ jih jang bruă ba mdah hŏng bruă kƀĭn ala ksiêm, lehanăn bi mklă ti anôk bi kƀĭn giăm hĭn.

Blŭ hrăm klah čŭn klei bi kƀĭn, Khua bruă kƀĭn ala Vương Đình Huệ lač, čiăng mprăp kơ klei bi kƀĭn tal 6, bruă Đảng anôk bruă kƀĭn ala, lehanăn êpul khua kiă kriê bruă knuă druh đảng hlăm knŭk kna pral mâo klei bi trông klă mngač, ngă djŏ hŏng hdră kčah lehanăn klei čiăng.

Tŭ ư hŏng jih jang klei blŭ mơ̆ng phung bi ala ti anôk bi kƀĭn lehanăn khua knŭk kna Phạm Minh Chính, Khua bruă kƀĭn ala Vương Đình Huệ bi mni kơ jih jang bruă mprăp leh hŏng klei ƀhĭ klĭ klă ênŭm mơ̆ng dua anôk ngă bruă, mâo leh klei bi mguôp kjăp, jih jang klei blŭ mâo leh klei bi sa ai, djŏ hŏng hdră čua, lehanăn mñă, brei lŏ mâo klei ksiêm dlăng hĕ bi nik jih jang ênoh čuăn hlăm akŏ mlan 1/2024 srăng mghaih msir jih bruă adôk ka leh. “Klei bi kƀĭn tal 6, bruă kƀĭn ala gưl 15 mâo leh ênoh bruă prŏng wăt hlăm klei mkŏ mjing hdră bhiăn, bruă kăp ksiêm, bruă bi mklă lu klei yuôm bhăn kơ lăn čar, jing leh klei bi kƀĭn mkrah wưng păn bruă djŏ tuôm hŏng klei mplĕ hră đăo knang phung khua kiă kriê mâo bruă kƀĭn ala ruah mdưm. Lu bruă yuôm bhăn djŏ tuôm hŏng klei duh mkra ala ƀuôn, lehanăn klei hdĭp mda mnuih ƀuôn sang. Phung khua kiă kriê   Đảng, knŭk kna, phung khua thŭn hlăm cách mạng, mnuih ƀuôn sang hlăm kluôm ala ăt mâo klei čang hmăng lehanăn đăo knang kơ klei tŭ jing mơ̆ng klei bi kƀĭn tal anei msĕ si msĕ hŏng dŭm klei bi kƀĭn êlâo anăn”.

Khua bruă kƀĭn ala mtă kơ knŭk kna mđrăm mbĭt hŏng dŭm anôk bruă kƀĭn ala mâo klei bi mguôp kjăp lŏ dơ̆ng bi leh bruă mprăp kñăm mâo klei tŭ dưn hĭn kơ jih jang bruă čih mkra hdră bhiăn, anăp srăng ba mdah kơ bruă kƀĭn ala bi mklă ti anôk bi kƀĭn tal anei, boh nik hŏng dŭm bruă čih mkra hdră bhiăn dleh.

Bi kơ jih jang bruă prŏng yuôm bhăn dôk mâo lu klei blŭ mdê mdê, čiăng bi mâo hdră êlan mghaih msir mdê mdê, hŏng klei mprăp ƀhĭ klĭ hĭn, kjăp hĭn, mâo klei hlak mblang klă mngač, ti jing klei djŏ, ti jing klei ka djŏ tui si mdê bi hdră êlan pioh kơ phung bi ala bruă kƀĭn ala bi trông, mă klei blŭ, kñăm bi mâo klei kjăp hĭn bruă bruă čih mkra hdră bhiăn ti anôk bi kƀĭn.

Khua bruă kƀĭn ala ăt mtă brei mâo klei kăp bi hưn mthâo kơ jih jang klei bi kƀĭn, boh nik ti anôk trông čhai, mă klei blŭ, lehanăn kơ dŭm bruă mâo klei bi mgăl, boh nik hŏng jih jang bruă mâo mnuih ƀuôn sang mđing hĭn, msĕ si ti bruă ngă klei mplĕ hră đăo knang, bruă êmuh lehanăn wĭt lač klei êmuh hlăm anôk bi kƀĭn, amâo mâo lui klei kƀah klei hâo hưn ôh, tă êlan bi djŏ hlăm bruă hâo hưn mâo boh phŭn, djŏ mta kñăm, djŏ hŏng hdră êlan mơ̆ng Đảng, klei bhiăn knŭk kna, rơ̆ng bi klă mngač, kluôm ênŭm, pral ba mtrŭn hŏng klei hdĭp hlăm klei pral, djăp ênŭm hlăm grăp blư̆ mkŏ mjing klei bi tuôm hŏng mnuih ƀuôn sang kluôm ala./.