Amai Hoàng Thị Tiếng ti ƀuôn hgŭm Đình Phong nao ti anôk ngă hră mơar knŭk kna ƀuôn hgŭm Trùng Khánh čar Cao Bằng čiăng jao klei dưi yua lăn. Mrâo truh ti ƀăng bhă, ñu ƀuh leh phung knuă druh hur har, mprăp dŭm hră mơar djŏ tuôm hŏng klei ngă hră online. Kyua mâo klei mtô klă, ênưih thâo săng leh anăn klei mhač mơ̆ng knuă druh, amai Tiếng dưi pral ngă leh hră mơar amâo mâo tuôm hŏng sa mta klei dleh dlan:

Knuă druh anôk ngă hră mơar diñu drông jăk êdi leh anăn ngă hră mơar khuăt, pral hŏn hŏng êlâo dih. Kyua mŭt tinei mâo leh knuă druh mtô hlei nao tuôm čiăng ngă hră mơar, djŏ hră pô ngă čiăng mgaih msir. Hlăk mblang leh anăn mtô klă, kyuanăn ngă pral êdi.

Yap kluôm hlăm lăn čar, hlăm 3 mlan ngă bruă sang čư̆ êa alŭ wăl dua gưl, hlăm brô 7 êklăk hră mơar online dưi tŭ mă, mgaih msir djŏ hdră kčah mâo êbeh 90%. Êbeh 3.100 anôk ngă hră mơar ƀuôn hgŭm dưi ba yua, mă bruă gru hmô sa ƀăng bhă mrâo mrang, lu anôk yua klei thâo mĭn anak mnuih mkra mjing leh anăn mkra hră online. Dŭm anôk bruă mphŭn ngă bruă hơĭt kjăp, mkŏ mjing klei găl kơ mnuih ƀuôn sang êjai ngă hră mơar. Dŭm êbâo čô knuă druh gưl ƀuôn hgŭm dưi mtô yua mrô, đru mđĭ hnơ̆ng kriê dlăng. Trịnh Ngọc Trâm, K’iăng khua bruă sang čư̆ êa ƀuôn hgŭm Cửa Nam, ƀuôn prŏng Hà Nội brei thâo:

Hmei bi klă klei yuôm bhăn hŏng sa anôk bruă knŭk kna nah gŭ jing giăm hŏng mnuih ƀuôn sang hĭn. Kyuanăn ngă hră mơar knŭk kna čiăng kơ mnuih ƀuôn sang mâo klei ư ai hĭn. Kyuanăn hmei jhŏng ba robot AI đru kơ bruă knŭk kna. Hmei hmăng hmưi bruă sang čư̆ êa nah tŭ jĕ giăm hŏng mnuih ƀuôn sang msĕ si sa wăl anôk jĕ giăm hŏng mnuih ƀuôn sang”.

Hlue si klei hưn mơ̆ng Phŭn bruă kiă kriê bruă knuă, leh 3 mlan ngă bruă, bruă sang čư̆ êa alŭ wăl dua gưl dưi nao djŏ hdră bhiăn. Phung mă bruă dưi bi khuăt, ênoh anôk bruă ti krah hrŏ lu, hluê anăn dưi mkiêt mkriêm ngăn prăk, bi hrŏ mmông ngă bruă…

Ƀiădah, hluê si khua Phŭn bruă kiă kriê bruă knuă Phạm Thị Thanh Trà, khădah mâo lu klei năng mơak, ƀiădah klei dleh dlan kăn ƀiă lei:

Bi kơ êpul knuă druh ƀuôn hgŭm lu anôk ka mâo djăp klei čuăn bruă klam mrâo, ka hmao mgaih msir klei êbeh, klei kƀah, boh nik jing mkŏ wĭt đa da mta bruă msĕ klei hưn mthâo mrâo mrang, ngăn prăk, bruă duh mkra, mdrao mgŭn, bruă sang hră mơar, lăn ala. Bi kơ hră mơar knŭk kna, kdrăp hưn mthâo mgaih msir hră mơar leh anăn dŭm phần mềm ka hơĭt kjăp kreh mâo klei jhat, bruă djă pioh klei hưn plah wah klei čih hưn ala čar kơ mnuih ƀuôn sang, mbah bruă knŭk kna ala čar leh anăn dŭm kdrăp hlăm alŭ wăl ka hrăm mbĭt ngă truh klei dleh dlan kơ alŭ wăl leh anăn mnuih ƀuôn sang, knơ̆ng bruă.

Hlăm klei kƀĭn knŭk kna akŏ mlan 10, Khua knŭk kna Phạm Minh Chính mñă klă, bruă sang čư̆ êa alŭ wăl 2 gưl amâo djŏ knŏng mlih mrâo klei mkŏ mjing, ƀiădah srăng mkŏ mjing klei mlih klă klơ̆ng hlăm klei đru kơ mnuih ƀuôn sang. Mnuih ƀuôn sang dôk ur, dôk ƀuah, bruă knŭk kna dôk suăi, čiăng mâo dŭm hdră êlan tŭ dưn, Khua knŭk kna Phạm Minh Chính mñă:

Ai dưi knuă druh ară anei ka mtăp mđơr hră êlan. Hdră êlan tal 1 jing čŏng phung knuă druh srăng gĭr ktưn čiăng bi mâo djăp klei čuăn, hdră êlan tal 2 jing srăng dưi bi hriăm, mtô kơ dĭgơ̆ brei digơ̆ thâo ngă bruă. Leh anăn hŏng klei mbha gưl drei srăng ksiêm wĭt, hlei ngă jăk srăng jap. Jao kơ alŭ wăl bi klă, alŭ wăl ngă, alŭ wăl đua klam, amâo ngă brei bruă, leh anăn mđĭ hĭn klei ksiêm dlăng. Dŭm phŭn, dhar bruă, dŭm alŭ wăl srăng kñăm ai dưi leh anăn srăng đua klam. Ti alŭ wăl dôk ngĭ ngơ̆ drei srăng lŏ mtô.

Dŭm boh tŭ dưn jăk hlăm bruă sang čư̆ êa alŭ wăl dua gưl brei ƀuh anei jing knhuang nao djŏ guôp hlăm mlih mrâo hră mơar knŭk kna, mđing truh bi khuăt, tŭ dưn. Boh tŭ dưn dưi mâo hlăm 3 mlan êngao knŏng hlăm wưng mrâo kčưm, ti anăp ăt adôk lu klei dleh dlan, klei lông dlăng srăng găn. Čiăng klă sĭt jing bruă knŭk kna đru bruă, čiăng êdi klei ktang phĭt mơ̆ng gưl dlông truh kơ alŭ wăl, mbha gưl, mbha klei dưi nao mbĭt hŏng bruă klam leh anăn ktuê dlăng kjăp. Leh anăn hĭn kơnăn, srăng mdưm klei nao ai mnuih ƀuôn sang jing mrô 1, dlăng anăn jing mnơ̆ng mkă yuôm hĭn kơ boh tŭ klei ngă bruă bruă sang čư̆ êa.