Anei jing klei kƀĭn trông phung bi ala Bruă Kƀĭn Ala thơ̆ng kơ bruă gưl tal 7 mơ̆ng wưng Bruă Kƀĭn Ala gưl 15, hlăm wưng bruă kđi čar dôk mjêč hluê ngă dŭm bruă klam mkŏ dăp phung mă bruă. Bi kơ bruă anei, Khua bruă kƀĭn ala Trần Thanh Mẫn brei thâo, wưng tal 1, dŭm phŭn, dhar bruă, anôk bruă mkŏ dăp bi khuăt mnuih mă bruă, wưng tal 2 mkra mlih hdră bhiăn phŭn, mkra mlih đa đa hdră bhiăn leh anăn mkŏ dăp 50% anôk bruă knŭk kna gưl čar. Klei kƀĭn tal 9 mĭn tĭng kƀĭn hlăm 2 mlan, hlăm wưng anei srăng mă klei blŭ mguôp mơ̆ng mnuih ƀuôn sang kơ bruă mkra mlih hdră bhiăn phŭn. Boh nik, mơ̆ng knhal jih mlan 4 truh kơ akŏ mlan 5, dhar Bruă Kƀĭn Ala srăng bi kƀĭn lu gưl čiăng mkŏ dăp anôk bruă knŭk kna gưl să. Khua bruă kƀĭn ala Trần Thanh Mẫn mñă ktang:

 “Dŭm bruă tŭ dưn jăk, kdlưn hĭn hlăm bruă čih mkra hdră bhiăn hlăm klei kƀĭn tal 7, tal 8 leh anăn klei kƀĭn êngao hdră tal 9 mrâo êngao mñă klă klei djŏ mơ̆ng hdră êlan mlih mrâo hlăm bruă mkŏ mjing hdră bhiăn ăt msĕ mơh boh tŭ dưn, klei yuôm bhăn mơ̆ng dŭm klei kƀĭn trông hlăm bruă rơ̆ng kơ hnơ̆ng tŭ jăk dŭm hdră bhiăn ba mdah hŏng Bruă Kƀĭn Ala. Kâo mñă klă, čiăng lŏ dơ̆ng hyuă kjăp leh anăn djŏ hŏng boh sĭt dŭm hdră êlan mlih mrâo mkŏ mjing hdră bhiăn, čiăng pral ba hdră êlan mơ̆ng Đảng hlăm klei hdĭp. Dŭm hdră bhiăn čiăng bi khuăt, klah čŭn, tŭ dưn, mtrŭt mđĭ klei mbha gưl, mbha klei dưi. Bi kơ bruă mkŏ mjing hdră bhiăn, anôk bruă dua klam truh knhal tuč hŏng hdră bhiăn truh kơ hbil Bruă Kƀĭn Ala bi klă.

Hlăm klei kƀĭn, phung bi ala Bruă Kƀĭn Ala bi trông kơ hdră bhiăn bruă tuh tia mrô. Pô bi ala Nguyễn Thị Thu Nguyệt, êpul bi ala Dak Lak tŭ ư hŏng hdră bhiăn, mâo mta phŭn mrâo bi êdah dŭm hdră êlan, sitôhmô ngăn drăp mrô, mkra mjing mnơ̆ng thơ̆ng mrô, bruă mrô…Đru mguôp klă hlăm hdră bhiăn, pô bi ala Nguyễn Thị Thu Nguyệt lač, hluê si mta phŭn mrô 10 mdưm mta kñăm klei êđăp ênang kơ bruă tuh tia mrô, ƀiădah hlăm klei čuăn kơ klei êđăp ênang mạng leh anăn răng mgang klei čih pioh ăt dôk kluôm, kƀah klei klă nik hdră mnêč leh anăn bruă kriê dlăng:

Hlăm klei mlih mrô knư̆ hruê knư̆ đĭ kyar, klei čih pioh grăp čô leh anăn knơ̆ng bruă ăt jing ngăn drăp yuôm bhanw, mbnĭt anăn jing mta kñăm ksŭng ngă mơ̆ng nah êngao. Bruă kƀah dŭm hnơ̆ng čuăn klă klơ̆ng, hdră ksiêm dlăng kjăp srăng ngă truh klei amâo mâo jăk, klei luč liê amâodah ksŭng ngă klei čih pioh. Kyuanăn, kâo mñă kơ Êpul čih mkra mâo dŭm hnơ̆ng čuăn klă nik kơ klei êđăp ênang mạng leh anăn dŭm klei čuăn hluê si dŭm hnơ̆ng čuăn lăn čar, ăt msĕ mơh dŭm hnơ̆ng čuăn mơ̆ng Phŭn bruă kahan ksiêm leh anăn Phŭn bruă kreh knhâo mrâo mrang ba mdah êlâo dih:

Bi pô bi ala Phạm Trọng Nghĩa, Êpul bi ala Bruă Kƀĭn Ala čar Lạng Sơn hưn:

Ksiêm dlăng bi mbŏ hdră êlan mđĭ kyar bruă tuh tia mrô kñăm rơ̆ng klei dưi kiă kriê lăn čar hlăm hlăm mạng, klei hgăm klei čih pioh, klei êđăp ênang klei hưn mơ̆ng dŭm êpul êya, grăp čô. Anei jing 1 hlăm 5 mta yuôm bhăn hlăm hdră mtrŭn mrô 57. Tal 2, mñă brei ksiêm dlăng hdră êlan čiăng bi hrŏ êwang pleh mrô čiăng kơ grăp čô mnuih ƀuôn sang , boh nik jing phung awăt êdu msĕ si mnuih djuê ƀiă, krĭng tlaih kbưi, krĭng dleh dlan dưi dưn klei đĭ kyar bruă tuh tia mrô, amâo mâo lui hlei pô kơ tluôn hlăm klei mđĭ kyar bruă tuh tia mrô ti ala čar drei”.

Mđĭng hmư̆ leh anăn hlăk mblang dŭm boh klei phung bi ala Bruă Kƀĭn Ala bi êdah, Khua phŭn bruă kreh knhâo l4eh anăn mrâo mrang Nguyễn Mạnh Hùng mñă klă, Đảng leh anăn knŭk kna bi klă bruă tuh tia mrô jing bruă tuh tia tur knơ̆ng, mâo hdră êlan leh anăn găl guôp hŏng klei găl mơ̆ng Việt Nam, mâo boh tŭ dưn bi klă čiăng mđĭ kyar bruă duh mkra mrô leh anăn yang ƀuôn mrô hlăm wưng mrâo.

Blŭ bi ruê̆ klei kƀĭn, k’iăng khua Bruă Kƀĭn Ala Trần Quang Phương čih yap, pah mni bi myuôm klei nao hgŭm, bruă klam mơ̆ng phung bi ala Bruă Kƀĭn Ala thơ̆ng kơ bruă, dŭm anôk bruă djŏ tuôm. Phung bi ala Bruă Kƀĭn Ala mâo leh klei mprăp klă nik, dŭm klei blŭ mâo knhuah khuăt, klah čŭn, hlăk mblang êlam.