Ti ƀuôn prŏng Quảng Ngãi, Thượng tướng Trần Quang Phương, K’iăng khua bruă kƀĭn ala mbĭt hŏng êpul bi ala bruă kƀĭn ala čar Quảng Ngãi mâo leh mmông mă bruă hŏng phung knuă druh lehanăn phung nai hlăm dhar bruă sang hră mơar čar Quảng Ngãi.  Ti anôk bi tuôm, êpul bi ala bruă kƀĭn ala čar Quảng Ngãi hâo mdah leh boh tŭ dưn klei bi kƀĭn tal 6, bruă kƀĭn ala gưl 15, lehanăn dŭm bruă mơ̆ng êpul bi ala bruă kƀĭn ala čar.

Tinei, k’iăng khua bruă kƀĭn ala Trần Quang Phương mâo leh klei lač jăk truh hŏng jih jang phung knuă druh kiă kriê bruă sang hră mơar, lehanăn phung nai mtô čar Quảng Ngãi kyua mâo leh dŭm klei đru mguôp prŏng prĭn hlăm bruă sang hră mơar. K’iăng khua bruă kƀĭn ala Trần Quang Phương ăt mñă kơ klei soh matuĭ, kơ klei bi čăm hlăm sang hră mơar... hlăk dôk hlăm hlăm dŭm boh sang hră, snăn bruă sang hră mơar lehanăn bruă sang čư̆ êa alŭ ưăl bi mâo hdră hâo hưn mtă mtăn, gang mkhư̆ kñăm mjing sang hră mơar jing anôk êđăp ênang:

 “Ară anei phung hđeh mĭn kơ klei hriăm bruă knuă hĭn. Ƀiădah amao mâo djŏ ôh jih jang dưi jing hĕ nai mtô, ăt kăn rei hlăm yang ƀuôn lu đei nai ƀiădah kƀah mnuih ngă bruă. Mta nai bri jing năng nai mtô, nai mtô klă sĭt brei mâo klei thâo sĭt, anăn yơh jing klei năng amâo mâo dưi kƀah ôh hlăm sa êpul phung nai mtô kñăm čiăng dưi mjuăt bi hriăm sa êpul phung hđeh hriăm hră thâo”.

Ti anôk bi tuôm phung bi ala jing phung nai mtô čar Quảng Ngãi mâo leh lu klei akâo čiăng lŏ mbŏ thiăm klei đru ba kơ phung nai hlue si hdră mtrŭn mrô 105 mơ̆ng knŭk kna kơ hdră êlan mđĭ kyar nai mtô ti sang hră hđeh điêt, klei huă ƀơ̆ng kơ hđeh sang rông mơ̆ng 1 truh 2 thŭn; klei đru ba kơ phung nai mtô hđeh adŭ điêt, mtô adŭ bi mguôp mdua, lŏ mđĭ hĭn bruă mtô bi hriăm klei yuăn kơ hđeh mnuih djuê ƀiă... Phung nai mâo lu klei akâo pral mđĭ prăk mlan kơ phung nai mtô, rơ̆ng bi djăp ênoh prăk mlan năng hdĭp hŏng bruă ngă nai mtô, čih pioh jih jang bruă knuă mơ̆ng phung nai mtô.

Mâo lu klei blŭ ăt akâo kơ gưl dlông lŏ dơ̆ng bi liê rŭ mkra dŭm boh sang hră hđeh điêt, sang hră gưl 1;2 boh nik ti dŭm kdriêk čư̆ čhiăng, mă mơ̆ng prăk lăn čar kñăm lehanăn mơ̆ng dŭm ênoh ngăn prăk mkăn pioh rŭ mdơ̆ng sang hră mơar bi jăk kơ bruă mtô bi hriăm. K'iăng khua bruă kƀĭn ala čih pioh jih klei akâo anăn, lehanăn lač, jih klei anei srăng ba kơ anôk bruă kƀĭn ala, lehanăn dŭm phŭn dhar bruă gưl dlông ksiêm dlăng lehanăn ruh mgaih.

Ti anôk bi tuôm hŏng phung bi ala ti kdriêk čar mrô 3 mơ̆ng êpul phung bi ala bruă kƀĭn ala ƀuôn prŏng Hồ Chí Minh, leh klei bi kƀĭn tal 6, bruă kƀĭn ala gưl 15, mnuih ƀuôn sang mđing kơ lu mta bruă kơ klei hluê ngă bruă sang čư̆ êa ƀuôn prŏng, bi kdơ̆ng hŏng klei ƀơ̆ng ngăn, hưn mdah ênoh ngăn drăp mâo mơ̆ng phung knuă druh... Nguyễn Văn Công, ƀuôn hgŭm mrô 9, kdriêk čar mrô 3 dôk rŭng răng kyua klei ƀơ̆ng ngăn đĭ lar. Msĕ hŏng boh klei Vạn Thịnh Phát hŏng ênoh prăk prŏng snăk sơưn, ngă bi kpăk klei lăn čar đĭ kyar. Êngao anăn ară anei klei ƀơ̆ng ngăn ăt dôk mâo hlăm lu anôk, “djăp mta bruă ngă bi sun ngăn sơăi yơh” "bi čih yap ngăn dleh sơăi".

 “Ară anei lăn čar dôk lĕ hlăm klei jŭ jhat anăn jing klei ƀơ̆ng ngăn prŏng. Klei ƀơ̆ng ngăn đĭ, lehanăn čăt jing leh hlăm ai tiê klei mĭn lu mnuih. Mnuih ƀuôn sang dôk ur kyua djăp mta bruă ngă bi sun ngăn sơăi, bi tĭng ngăn dleh sơăi, bi mâo hruh prăk sun, hlăk hlê ba knhuah hdĭp amâo mâo jăk ôh truh hŏng yang ƀuôn”.

         Êngao kơ anăn, mnuih ƀuôn sang ăt mâo klei akâo kơ dŭm anôk bruă djŏ tuôm, mghaih msir klei sim đĭng blŭ amâo mâo jăk, mrô đĭng blŭ duah ngă mgưt anôk bruă knŭk kna kñăm mplư mplêč, ngă luič klei êđăp ênang, klei duah kač plă plia, duah tak čhŏ, klei duah mƀlir hưn knăl bruă knuă mâo hlăm djăp anôk mơh...

Ti bi tuôm hŏng phung bi ala, K’iăng khua Êpul gơ̆ng bruă ƀuôn sang ƀuôn prŏng Hồ Chí Minh Phạm Thành Kiên lač: Klei bi kƀĭn êpul gơ̆ng bruă ƀuôn sang ƀuôn prŏng anăp anei, Êpul gơ̆ng bruă ƀuôn sang srăng trông čhai, lehanăn bi mklă lu mta bruă yuôm bhăn kơ klei duh mkra ala ƀuôn, kơ klei hlue ngă hdră mtrŭn mrô 98 kơ klei lông mkŏ mjing dŭm klei bhiăn mđĭ kyar ƀuôn prŏng Hồ Chí Minh. Djŏ tuôm hŏng bruă hlue ngă hdră mtrŭn mrô 98, pô bi ala bruă kƀĭn ala Trần Kim Yến, Khua anôk bruă mặt trận ƀuôn prŏng Hồ chí Minh brei thâo:

 Čiăng dưi hlue ngă hdră mtrŭn mrô 98 jing sa klei gĭr prŏng mơ̆ng êpul phung knuă druh, dŭm knơ̆ng dhar bruă hlăm ƀuôn prŏng, dŭm kdriêk čar, ƀuôn hgŭm lehanăn klei sa ai mơ̆ng dŭm phŭn dhar bruă gưl dlông dôk ti ƀuôn prŏng Hồ Chí minh. Jing amâo mâo djŏ klei ênưih ôh mâo mkŏ mjing sa hdră mă bruă mâo êpul kiă kriê ngă bruă hlăm anăn mâo khua knŭk kna jing khua êpul kiă kriê”.

        Êngao kơ klei wĭt lač tinăn mtam hŏng mnuih ƀuôn sang ti kdriêk čar mrô 3, êpul bi ala bruă kƀĭn ala ƀuôn prŏng Hồ Chí Minh, lehanăn êpul gơ̆ng bruă ƀuôn sang ăt čih pioh dŭm klei akâo, kñăm dưi ba mtruh hŏng dŭm anôk bruă mâo klei dưi mghaih msir./.