Êpul bi ala bruă kƀĭn ala čar Gia Lai mkŏ mjing leh Klei bi tuôm hŏng mnuih ƀuôn sang leh Klei bi kƀĭn tal 1, anôk bruă kƀĭn ala gưl XVI hluê hdră klă anăp mguôp hŏng online truh ti dŭm să, ƀuôn hgŭm. Ti anôk bi kbĭn, mnuih ƀuôn sang dua 2 êpul ruah khua hưn lač kơ lu bruă djŏ tuôm kơ hdră êlan klông, hdră đru kơ mnuih ƀuôn sang, hdră đru kơ ala ƀuôn, msir mghaih klei ngă hră mơar, mkŏ dăp mnuih mă bruă amâo thơ̆ng kơ bruă, hdră đru kơ knuă druh êpul bruă Đảng wĭt kơ nah gŭ, hdră đru kơ phung mbruă lehanăn êpul ksŏ mmuñ djuê ana đưm. Lu mnuih ƀuôn sang bi êdah klei mđing kơ klei thâo kiă kriê mơ̆ng bruă knŭk kna gưl să leh bi mŭt mbĭt dưi kah mbha lu klei dưi. Mnuih ƀuôn sang lač, bruă msir mghaih klei ngă hră mơar ti dŭm anôk adôk êmưt, amâo pral, kyua anăn gưl să brei mlih mrâo hdră kriê dlăng, mđĭ klei đua klam mkăp ngă bruă kơ mnuih ƀuôn sang, amâo lui mnuih ƀuôn sang nao ngă hră mơar lu blư̆ msĕ ară anei.

Blŭ hrăm ti knăm anei, Kơiăng khua anôk bruă kƀĭn ala Nguyễn Hồng Diên čih pioh dŭm klei blŭ mơ̆ng mnuih ƀuôn sang lehanăn brei thâo, êpul bruă kƀĭn ala čar Gia Lai srăng bi mklin ênŭm ba mơĭt kơ anôk bruă mâo klei dưi ksiêm dlăng, bi mklă, msir mghaih ênŭm.

“Mơ̆ng hdră bi mklin klei blŭ, hmei dưi bi mklă mâo 2 bruă phŭn: hdră duh mkra – duh bi liê lehanăn mkŏ mjing anôk bruă – hdră đru. Mâo dŭm klei blŭ djŏ hŏng klei dưi msir mghaih mơ̆ng čar lehanăn să, mtă kơ phung khua să, ƀuôn hgŭm mđing msir mghaih, kyua klei dưi mơ̆ng gưl să, ƀuôn hgŭm ară anei gơ̆ lu leh mơh. Boh nik, Knŭk kna dôk bi trông kơ bruă lŏ dơ̆ng bi hrŏ klei ngă hră mơar mơ̆ng gưl dlông čiăng jao kơ alŭ wăl. Kyua anăn, bruă klam lehanăn klei dưi mơ̆ng gưl să hlăm wưng ti anăp srăng dưi mkra mđĭ hĭn. Să, ƀuôn hgŭm jing anôk bi tuôm klă anăp lehanăn mă bruă hŏng mnuih ƀuôn sang, kyua anăn, brei mao klei gĭr, pral msỉ rmghaih jih klei djŏ tuôm kơ klei hdĭp mnuih ƀuôn sang”.

Ti să Phúc Thọ Lâm Hà, Lâm Văn Đoan – Kơiăng khua Dhar bruă dhar kreh – ala ƀuôn mơ̆ng anôk bruă kƀĭn ala hlăm bruă kƀĭn ala čar Lâm Đồng bi tuôm leh hŏng mnuih ƀuôn sang leh Klei bi kƀĭn tal sa, anôk bruă kƀĭn ala gưl XVI. Hlăm ai êwa ngă phŭn mil pô, klă mngač, mnuih ƀuôn sang bi êdah klei sa ai hŏng boh tŭ klei bi kƀĭn mbĭt anăn hưn mdah klei dleh dlan, gun kpăk ti alŭ wăl.

Mâo lu klei blŭ bơ̆k bâo kơ wưng hluê ngă bruă adôk êmưt hlăk hdră msir mghaih anôk ala ngă pral, ba lu klei mđing uêñ hlăm mnuih ƀuôn sang. Mnuih ƀuôn sang ăt hưn lač bruă msir mghaih klei ngă hră mơar adôk mŭtk mtŭl, ngă kơ mnuih ƀuôn sang nao lu blư̆, mbĭt anăn mtă brei mđing duh bi liê, mkra mđĭ êlan klông krĭng ƀuôn sang, mjing klei găl găn êrô, dŭ mdiăng mnơ̆ng, dưn hdră mdrao mgŭn, mtô bi hriăm ti krĭng taih kbưi.

Blŭ hrăm ti knăm anei, Lâm Văn Đoan bi mni ai tiê đua klam, dŭm klei blŭ mơ̆ng mnuih ƀuôn sang, mñă êpul bi ala bruă kƀĭn ala čar srăng tŭ mă djăp ênŭm ba mơĭt kơ anôk bruă kƀĭn ala, knŭk kna lehanăn dŭm phŭn, dhar bruă. Mbĭt anăn, mtă kơ dŭm knơ̆ng, dhar bruă, alŭ wăl mđĭ klei bi hgŭm, mđing msir mghaih jih bruă djŏ hŏng klei dưi, amâo ngă hmăi truh kơ klei tŭ dưi mơ̆ng mnuih ƀuôn sang.

Ti Dak Lak, Ngô Trung Thành – Kơiăng khua anôk bruă hdră bhiăn lehanăn kriê dlăng hdră bhiăn mơ̆ng bruă kƀĭn ala mơ̆ng anôk bruă kƀĭn ala čar Dak Lak bi tuôm leh hŏng mnuih ƀuôn sang ti dŭm să Krông Bông, Čư̆ Pui lehanăn Hòa Sơn. Mnuih ƀuôn sang akâo kơ knŭk kna mđing duh kơ anôk bruă êlan klông krĭng ngă lŏ hma, mbông mnuôr wwa, anôk pom êa, guê gang ti dŭm alŭ wăl krah mâo klei êa lip lêč, mkra mđĭ êlan klông mlir să, mlir alŭ; mtrŭt mđĭ hdră mkra êlan klông, kban dôk ngă mơ̆ng sui ka leh. Mbĭt anăn, mnuih ƀuôn sang čiăng mâo hdră mtrŭn mđing hrŏng ruah phung nai mtô ti krĭng taih kbưi mâo klei jăk găl hĭn, hnưm ba mdah hnơ̆ng čuăn hŏng mdê bi bruă mă kơ phung knuă druh alŭ, ƀuôn, hnưm mkăp prăk duh bi liê knŭk kna lehanăn prăk duh kơ dŭm hdră ala čar kñăm čiăng hluê ngă tŭ dưn mta kñăm mđĭ kyar dua mrô, mđing kơ hdră luôm mtah lăn huâng, răng mgang dliê lehanăn msir mghaih djah djâo krĭng ƀuôn sang./.