Tui si phung bi ala lač, mâo êa hlao mhao lu mta sĭk, jing pô ba klei ruă đĭ êmŏng êgao hnơ̆ng, anei jing mta mnơ̆ng yua dleh dưi ksiêm dlăng kơ hnơ̆ng mta mmih. Pô bi ala Nguyễn Kim Thúy, êpul mơ̆ng Đà Nẵng; pô bi ala Nguyễn Thị Lệ Thủy, êpul mơ̆ng Bến Tre mblang:

 “Klei mnăm lu đei êa mmih, jing pô ênưih snăk ba hriê klei ruă amâo mâo jăk msĕ si: Klei ruă kboh, klei ruă mâo mta mmih lu hlăm êrah… Kyua đĭ hnơ̆ng mta mmih mŭt hlăm asei mlei, kdlưn hĭn kơ hnơ̆ng asei mlei čiăng. Kyuanăn, êpul bruă mdrao mgŭn tar rŏng lăn, lehanăn dŭm êpul bruă răng mgang klei suaih pral, mâo leh klei čang hmăng kơ knŭk kna dŭm ala čar ba yua hdră rĭng jia prŏng hŏng dŭm mta mnơ̆ng mnăm mâo lu mta mmih, čiăng ƀư̆ kra mnuih rañ mnăm đei êa mmih”.

Phung bi ala mâo leh klei bi tŭ ư kơ bruă mđĭ klei rĭng jia hŏng kpiê, beer, kñăm čiăng bi hrŏ klei ba yua lu đei kpiê beer. Siămdah, kñăm čiăng gang mkhư̆ anak mnuih mnăm kpiê êsei, amâo mâo djŏ knŏng hjan klei rĭng jia ktrŏ đuič ôh, ƀiădah lŏ ba yua lu hdră êlan mkăn msĕ si đŭ bi kmhal ktang, mbĭt hŏng klei mtô bi hriăm mtă mtăn mbĭt anăn. Phung bi ala bi tŭ ư hŏng hdră êlan rĭng jiă ktrŏ hŏng kpiê, beer, mbĭt anăn bi mkă tĭng ti wưng srăng ba yua. Pô bi ala Hoàng Văn Cường, êpul ɃP Hà Nội lač:

 "Brei drei lŏ ksiêm dlăng wĭtjih jang hdră rĭgn jia hŏng kpiê beer. Tui si kâo mĭn năng lŏ mđĭ hĭn ênoh jia, boh nik jing mđĭ hĭn hŏng kpiê ktang, leh kơ anăn tui hlue si hnơ̆ng boh ktang kpiê kgŭ 20 độ lehanăn ti gŭ hĭn kơ hnơ̆ng beer. Snăn kơh jing djŏ”.

Kơ klei lŏ čoh ênoh rĭng jia bi ktrŏ hŏng dŭm mta mnơ̆ng msĕ si hăt, snăn phung bi ala lač năng yơh ngă klei anei, bi rĭng jiă ktrŏ hŏng hăt. Kyuadah mơ̆ng hăt ba hriê truh 28 mta klei ruă. Knŏng tĭng ti Việt Nam mâo leh êbeh 84.500 čô mnuih djiê kyua djŭp hăt, lehanăn truh 18.800 čô mnuih djiê kyua hrip săp hăt mơ̆ng mnuih riêng gah djŭp. Siămdah, brei ksiêm bi nik klei anei, boh nik djŏ tuôm klei hmăi amâo mâo jăk hlăm klei mnia mblei lehanăn hŏng phung duh mkra, huĭdah mjing klei găl bi tlĕ čhĭ mnia, lehanăn blei ba soh hŏng klei bhiăn hăt mơ̆ng ala tač êngao. Pô bi ala Trịnh Xuân An, êpul mơ̆ng Đồng Nai lač:

-"Kâo dôk mĭn tinei jing klei hmăi djŏ hŏng mnuih ƀuôn sang, lehanăn phung duh mkra mnia mblei hăt. Ară anei phung duh mkra hăt ăt mâo klei đru kơ ngăn prăk knŭk kna dôk tal 5, tal 6, tơdah ngă snăn srăng mâo klei bi kpleh prŏng, anăp mtrŭt klei bi tlĕ čhĭ mnia hăt soh hŏng klei bhiăn, hmăi amâo mâo jăk kơ bruă răng mgang klei êđăp ênang. Anei jing sa mta klei brei mâo klei mkă tĭng bi nik, čiăng kơ drei dưi mâo mơh ngăn prăk ba wĭt kơ knŭk kna, lehanăn rơ̆ng kơ phung duh mkra mâo bruă knuă mă, lehanăn kăn hmăi jhat rei hŏng mnuih ƀuôn sang hlăm bruă pla mjing, boh nik răng êdi jing pŏk êlan kơ phung tlĕ čhĭ mnia soh hŏng klei bhiăn”.

Bi mgăl ti a nôk bi kƀĭn, pô bi ala Trương Trọng Nghĩa, êpul ɃP Hồ Chí Minh lač:

Băng: "Ya ngă amâo mâo čoh čuăn ôh ti thŭn 2045, 100 thŭn hrue mkŏ mjing lăn čar mâo klei hnŭk êngiê, snăn Việt Nam srăng jing sa ala čar amâo mâo djŭp hăt ôh. Dŭm ala čar mkăn hlăk hlê dôk ngă msĕ snăn. Kâo ăt tŭ ư mơh hŏng bruă mkă tĭng hĕ bi nik hdră êlan srăng mă bruă, ƀiădah tui si kâo mĭn hlăm bruă anei brei drei mâo klei bhiăn ktang hĭn đăm ôh lŏ blŭ mgang lačdah huĭ kơ phung tlĕ čhĭ mnia hăt soh hŏng klei bhiăn, sitôhmô drei brei klei ênưih kơ bruă kăm klei djŭp hăt”.

Mblang ti anôk bi kƀĭn, k’iăng khua knŭk kna, Khua phŭn bruă ngăn prăk Hồ Đức Phớc ngă bi mngač jih jang mta mtrŭn rĭng jiă bi ktrŏ hŏng hăt:

 "Hăt ba klei jhat prŏng snăk, lehanăn drei luič liê prŏng măng ai mơh truh 1 êklai đô la kơ bruă mdrao mnuih ruă djŏ tuôm hŏng hăt. Hăt ti Việt Nam mâo ênoh êlưih êdi mơ̆ng 6.000 truh 20.000 prăk đuič, knŏng hlăm brô 7.000 prăk ênoh jia kơ sa hruh hăt, êjai anăn ti ala čar Singapore snăn truh kơ   200.000 prăk ênoh jia kơ sa hruh hăt. Kyuanăn, mơ̆ng klei rĭng jia prŏng snăn yơh hŏng hăt”.

Khua phŭn bruă mdrao mgŭn Đào Hồng Lan tŭ ư hŏng mta kñăm, hŏng klei čiăng mtrŭn klei čih mkra hdră bhiăn rĭng jia mnơ̆ng ba klei amâo mâo jăk (lŏ mlih mrâo), boh nik bi mđĭ yơưh ênoh rĭng jia hŏng dŭm mta mnơ̆ng ba klei amâo mâo jăk kơ klei suaih pral msĕ si: Hăt, kpiê, beer, lehanăn dŭm mta êa mmih mdưm hlăm ênoh tŭ klei rĭng jia ktrŏ. Khua phŭn bruă bi êdah ênoh bi mklă kơ klei yuôm năng mđĭ ênoh rĭng jia kơ hăt. Kyuadah hăt jing pô ba hriê truh 28 mta klei ruă. Tĭng mă snăn, ti Việt Nam mâo êbeh 100 êbâo čô mnuih djiê kyua djŭp hăt./.