Ti să Đức Trọng, bruă mkŏ mkra êlan klông đru kơ bruă ngă lŏ hma jing bruă mâo lu mnuih ƀuôn sang mđing dlăng. Dŭm bĭt êlan hlăm krĭng ngă lŏ hma ti alŭ wăl Đà Lạt, Đơn Dương, Đức Trọng dưi mkra hŏng bêtông ƀiădah dôk điêt, kƀah mkŏ hŏng êlan phŭn, ngă kơ boh mnga bruă lŏ hma dưi dŭ mdiăng lu blư̆, ngă mđĭ ênoh bi liê leh anăn hmăi kơ hnơ̆ng tŭ jăk. Êlan klông krĭng ƀuôn sang alŭ Knai dưi mkra hŏng bêtông ƀiădah êlan phŭn ĐH6 lu thŭn amâo ngă bruă. Dŭm hdră êlan êran pral Tân Phú - Bảo Lộc, Bảo Lộc - Liên Khương dôk tuôm hŏng klei dleh dlan hlăm bruă ruh mgaih anôk ala. Pô bi ala kơ mnuih ƀuôn sang Lê Hữu Quế, Khua bruă Đảng alŭ Phú Lộc, să Đức Trọng, akâo:

“Mđing gĭt gai, mtrŭt mjhar mđĭ pral hnơ̆ng dŭm hdră bruă êlan klông krĭng kwar dôk pŏk ngă ti alŭ wăl čar; hmao ruh mgaih klei gun kpăk kơ klei čiu hnô, ruh mgaih anôk ala, ktang phĭt msir mghaih hluê si klei kuôl kă hŏng phung ngă bruă êmưt, klei thâo ƀiă”.

Phung bi ala kơ mnuih ƀuôn sang ăt akâo mđing tal êlâo prăk mkra mđĭ êlan klông ti dŭm krĭng thơ̆ng pla mjing, mđĭ kyar anôk bruă logistics giăm tač êdeh phiơr prŏng Liên Khương, mjing klei găl ba mnơ̆ng dhơ̆ng truh kơ dŭm anôk mnia mblei prŏng.

Ti anăp dŭm klei akâo anei, Khua hlăm Anôk bruă Đảng gưl dlông, Khua sang phat kđi yang ƀuôn gưl dlông Nguyễn Văn Quảng mtă brei mđĭ ktang ksiêm dlăng dŭm hdră bruă êlan klông phŭn, boh nik dŭm hdră bruă êmưt hluê ngă, mbĭt anăn hmao ruh mgaih klei kpăk kơ klei čiu hnô, ruh mgaih anôk ala.

Amâo djŏ knŏng êlan klông, mnuih ƀuôn sang să Đức Trọng lŏ hưn mdah dŭm boh klei djŏ tuôm kơ djah djâo, êa yua, lăn ala, sang dôk yang ƀuôn; akâo ruh mgaih hdră čuăl mkă nah dhŭng krông Dă Nhim. Djŏ tuôm kơ bruă sang čư̆ êa alŭ wăl 2 gưl, mnuih ƀuôn sang akâo thiăm mbŏ mnuih mă bruă, prăk bi liê ngă bruă, ksiêm dlăng hnơ̆ng đru kơ phung knuă druh dŭm êpul bruă, êpul hgŭm ti nah gŭ leh anăn hdră msir dŭm anôk bruă êbeh êbiêr leh mkŏ dăp.

Ti ƀuôn hgŭm Lâm Viên - Đà Lạt, dŭm klei akâo ăt mđing kơ dŭm bruă djŏ tuôm hŏng klei hdĭp msĕ si rơ̆ng êa drao, kdrăp mnơ̆ng mdrao mgŭn hlăm anăn hră ênua mdrao mgŭn; dăp mnuih mă bruă kơ Mặt trận čar kwar lehanăn dŭm êpul êya; msir mghaih djah djâo, răng mgang wăl hdĭp mda, mđĭ kyar bruă hiu čhưn ênguê mtah; ruh mtlaih klei dleh dlan hlăm bruă ngă hră mơar lăn ala. Sa klei mâo mnuih ƀuôn sang mđing êdi jing klei kƀah hdruôm hră mtô bi hriăm. Pô bi ala kơ mnuih ƀuôn sang Nguyễn Thị Phương Diệu, alŭ Đa Thiện, brei thâo phung amĭ ama bi photocopy dŭm hdruôm hră kơ anak čô hriăm hră, lŏ mâo thiăm prăk bi liê leh anăn klei huĭ hyưt djŏ tuôm kơ klei dưi yua.

“Phung amĭ ama suăi êmăn êdi c̆iăng blei hdruôm hră kơ phung hđeh. Dŭm hdruôm hră ară anei ăt kƀah mơh kyua anăn phung hđeh c̆ŏng pô nao phô tô c̆iăng mkăp kơ klei hriăm hră mơar. Dŭm hdruôm hră mâo êa mil kyua anăn c̆iăng bi nao mkra mđĭ hluê si êa mil luic̆ liê êdi ăt msĕ mơh hmăi kơ klei hriăm hră mơar mơ̆ng phung hđeh. Ăt lŏ mâo thiăm sa klei huĭ hyưt anăn jing ngă soh hŏng klei bhiăn klei dưi kiă kriê."

Ti dŭm anôk bi tuôm, Êpul bi ala bruă kƀĭn ala čar Lâm Đồng ăt hưn hŏng mnuih ƀuôn sang boh tŭ Klei bi kƀĭn mjêč tal sa, mĭn tĭng mta phŭn Klei bi kƀĭn tal dua, Bruă kƀĭn ala gưl XVI leh anăn hưn mthâo boh tŭ msir mghaih dŭm klei akâo mơ̆ng mnuih ƀuôn sang hlăm dŭm gưl bi tuôm êlâo. Blŭ hrăm hŏng mnuih ƀuôn sang ƀuôn hgŭm Lâm Viên - Đà Lạt, Khua hlăm Anôk bruă Đảng gưl dlông, Khua sang phat kđi yang ƀuôn gưl dlông Nguyễn Văn Quảng mñă klă dŭm klei blŭ, klei akâo srăng dưi bi mguôp, ba mơĭt kơ anôk bruă mâo klei dưi ksiêm dlăng, msir mghaih; dŭm boh klei dôk hlăm klei dưi mơ̆ng alŭ wăl brei mđing msir mghaih leh anăn wĭt lač kơ phung bi ala kơ mnuih ƀuôn sang.

"Êpul bi ala anôk bruă kƀĭn ala čih pioh dŭm klei blŭ mơ̆ng phung bi ala kơ mnuih ƀuôn sang. Hmei bi myuôm dŭm klei blŭ anei jih ai tiê, bruă klam kbiă hriê mơ̆ng bruă klam pô hŏng alŭ wăl, hŏng lăn čar. Bi dŭm klei blŭ mnuih ƀuôn sang mđing kâo akâo kơ phung khua kiă kriê čar boh nik jing phung khua kiă kriê Dhar bruă lŏ dơ̆ng mâo klei kiă kriê, gĭt gai čiăng mghaih msir jih hnơ̆ng leh anăn wĭt lač kơ mnuih ƀuôn sang hŏng hră mơar hŏng klei klă mngač".

Hŏng dŭm klei akâo adôk, Nguyễn Văn Quảng čih pioh, tŭ mă čiăng kơ Êpul bi ala bruă kƀĭn ala čar Lâm Đồng bi mguôp, ba mơĭt kơ anôk bruă mâo klei dưi ksiêm dlăng, msir mgaih leh anăn mkăp kơ Klei bi kƀĭn tal dua, Bruă kƀĭn ala gưl XVI.