Êngao kơ đa đa klei hưn mdah mkăn, klei hưn kơ êlan dơ̆ng mrô 27 jhat rai, êa lêč êjai mâo hjan, kƀah mdhă hưn brei răng ngă truh klei arưp aram kơ mnuih leh anăn êdeh êdâo găn êrô, êlan klei pui hlăm alŭ wăl êgao hnơ̆ng, amâo mâo djăp pui kmlă kơ bruă mkra mjing leh anăn yua aguah tlam, hwiê djah djâo mplă mplia bi čhŏ djhan wăl hdĭp mda, klei mkăp brei mjeh hluăt mă mrai amâo mâo tŭ jăk, amâo mâo mrai ngă truh klei hmăi prŏng kơ bruă duh mkra. Phung bi ala să Bình Thạnh, kdriêk Đức Trọng uêñ mĭn kơ boh klei bi mŭt mƀĭt čar, să, bi khuăt phung mă bruă knŭk kna, lui gưl bruă ti krah.

Pô bi ala Đinh Công Hoán, ti alŭ Thanh Bình 3, să Bình Thạnh, kdriêk Đức Trọng, čar Lâm Đồng lač, hdră êlan bi mŭt să, čar, bi khuăt mnuih mă bruă mâo mnuih ƀuôn sang sa ai, čang hmăng. Ƀiădah hlăm klei mkŏ dăp, phung dôk mă bruă srăng jing phung thâo, mâo knhuah hdĭp jăk.

 “Hdră êlan bi mŭt mbĭt dŭm anôk bruă knŭk kna, bi hrŏ klei mtŭk mtŭl, ênoh bi liê kâo ƀuh mâo klei sa ai. Ƀiădah, čiăng kơ phung mă bruă ngă bruă tŭ dưn, bruă bi klă klei thâo knuă druh srăng bi djăp ênŭm leh anăn dăp djŏ čiăng rơ̆ng kơ bruă klam dưi ngă jăk. Boh klei mkăn jing bruă bi hriăm hlăm klei mĭn, klei mă bruă, knhuah hdĭp srăng dưi bi myuôm, čiăng năng hŏng bruă klam hluê si klei čuăn kđi čar čiăng mdưm”.

Phung bi ala să Bình Thạnh, kdriêk Đức Trọng, čar Lâm Đồng hmăng hmưi Bruă Kƀĭn Ala, knŭk kna hnưm bi leh bruă mkra mlih, mkŏ mjing hdră bhiăn phŭn, hdră bhiăn lăn čar…čiăng bi mâo djăp klei čuăn đĭ kyar mrâo mơ̆ng lăn čar, klă hŏng boh sĭt mơ̆ng alŭ wăl. Phung bi ala tŭ ư hŏng gưl dlông kơ bi khuăt mnuih mă bruă, mkŏ mjing bruă sang čư̆ êa dua gưl, ngă bruă bi mŭt mbĭt čar, lui gưl kdriêk…ƀiădah mnuih ƀuôn sang, phung bi ala dôk mđing uêñ kơ bruă mĭn tĭng srăng bi mŭt gưl să hlăm wưng kơ anăp si ngă, bi êdah klei uêñ mĭn kơ bruă bi mŭt čar jing prŏng đei, dleh ksiêm dlăng kơ klei êđăp ênang…

Bi ala êpul bi ala Bruă Kƀĭn Ala čar Lâm Đồng, Phan Đình Trạc bi myuôm dŭm klei blŭ mguôp klă mngač, đua klam mơ̆ng phung bi ala. Mbĭt anăn, čih yap dŭm klei phung bi ala bơ̆k bâo leh anăn mñă kơ bruă sang čư̆ êa alŭ wăl mgaih msir dŭm mta phŭn hlăm klei dưi. Bi hŏng bruă bi mŭt čar, să, Phan Đình Trạc mñă klă hdră êlan anei amâo djŏ knŏng bi khuăt bruă knŭk kna, ngă bruă tŭ dưn ƀiădah lŏ mkŏ mjing wăl anôk, boih kdrŭt mrâo čiăng mtrŭt mđĭ klei đĭ kyar lăn čar.

Bi kơ klei dôk mđing uêñ kơ klei thâo knuă druh čiăng mâo djăp hnơ̆ng čuăn bi mŭt mbĭt, Khua êpul kiă kriê bruă knuă Phan Đình Trạc bi mni ai tiê anei mơ̆ng mnuih ƀuôn sang leh anăn anei jing sa hlăm dŭm mta phŭn mâo Phŭn bruă kđi čar, Êpul khua bruă Đảng gưl dlông ueñ mĭn leh anăn tă hdră. Hluê si ai tiê Nao êjai, dăp êjai, ƀiădah rơ̆ng djŏ hdră bhiăn, hnơ̆ng tŭ jăk, boh nik čiăng mgaih msir dŭm klei dleh kpăk kơ klei kiă kriê, mbha gưl ktang kơ alŭ wăl, čŏng ngă čŏng đua klam, jhŏng mĭn, jhŏng ngă – jhŏng đua klam mơ̆ng pô ba anăp, mgaih msir klei duah bi mplĕ, ñĕ đuê̆. Phan Đình Trạc mñă klă:

 “Mkŏ dăp sơnăn gưl dlông srăng mbha klei dưi kơ čar leh anăn alŭ wăl, čiăng kơ alŭ wăl bi klă, alŭ wăl ngă leh anăn alŭ wăl đua klam. Gưl čar ngă dŭm hdră êlan mơ̆ng gưl dlông, leh anăn jing gưl ba mdah hdră êlan, klă anăp gĭt gai, kriê dlăng jih jang bruă gưl să hlăm alŭ wăl. Gưl să ngă hdră êlan mơ̆ng gưl dlông leh anăn mơ̆ng čar ba mdah, leh anăn dưi mđĭ klei mbha gưl, mbha klei dưi, mgaih msir dŭm boh klei hlăm klei dưi gưl să. Gưl să srăng jĕ giăm hŏng mnuih ƀuôn sang, hmao mgaih msir djăp boh klei kơ mnuih ƀuôn sang”.

Wưng anei, ƀri bi hdơr 50 thŭn hruê mtlaih êngiê kwar Dhŭng, hluh hlir lăn čar 30/4, Khua Êpul kiă kriê bruă knuă Gưl dlông Phan Đình Trạc bi ala êpul bi ala Bruă Kƀĭn Ala čar Lâm Đồng mđup brei 10 hnư mnơ̆ng, grăp hnư 1 êklăk prăk kơ dŭm gŏ sang knŭk kna dlăng ba, phung mâ bruă tŭ dưn, kahan êka ti să Bình Thạnh, kdriêk Đức Trọng. Hnư mnơ̆ng kñăm mđĭ ai, bi hdơr kơ klei asăn asei mơ̆ng phung jhŏng ktang djiê êngiê, kahan êka, gŏ sang phung mâo bruă tŭ dưn kơ klei hdĭp êngiê, trei mđao, yâo mơak hruê anei.