Hruê kăm êgao, Êpul bi ala Bruă Kƀĭn Ala čar Dak Lak mâo mmông bi tuôm hŏng mnuih ƀuôn sang ti dŭm kdriêk Krông Pač, Čư̆ Mgar, Ea Sup leh anăn Ƀuôn Đon. Êlâo kơ klei kƀĭn tal 9, Bruă Kƀĭn Ala gưl 15 leh anăn mjêč mkŏ dăp phung mă bruă knŭk kna, sa hlăm dŭm klei čang guôn hĭn mâo phung bi ala bi êdah jing ruah djŏ pô hlăm dŭm bruă mrâo.

Hlăm dŭm anôk bi tuôm, phung bi ala bi êdah klei sa ai hŏng hdră êlan mkŏ dăp, bi khuăt mnuih mă bruă, ăt msĕ mơh mkŏ dăp mnuih mă bruă čiăng kñăm kơ klei thâo, knhuah hdĭp leh anăn ai tiê hŏng mnuih ƀuôn sang. Nguyễn Duy Thành, pô bi ala alŭ 14 să Ea Kly, kdriêk Krông Pač lač:

“Bi khuăt mnuih mă bruă mơ̆ng gưl dlông truh kơ alŭ wăl hmei hơ̆k mơak leh anăn sa ai. Kyuanăn gưl anei kâo mñă hŏng Bruă Kƀĭn Ala, mñă hŏng Đảng srăng ngă ktang phĭt, srăng ba mnuih mâo ai tiê, mâo klei thâo, mâo knuih jăk ngă bruă kơ mnuih ƀuôn sang. Hŭi dah pô  amâo mâo djăp hnơ̆ng, djăp kơhưm dôk mă bruă, bi phung thâo, phung jăk lŏ wĭt ti alŭ wăl”.

K’iăng khua Bruă Kƀĭn Ala Nguyễn Đức Hải mă bruă hŏng čar Lâm Đồng.

Djŏ tuôm hŏng boh klei yang ƀuôn, pô bi ala hưn adôk mâo lu gŏ sang ƀun, gŏ sang dleh dlan hdĭp sang sang tĭ ƀrôč ƀiădah ka mâo ôh hdră êlan đru mơ̆ng knŭk kna. Pô bi ala Thân Ngọc Duyến,, ti alŭ Phước Hoà 1, să Ea Quăng, kdriêk Krông Pač brei thâo:

“Ti să hmei mâo sa čô lĭng kahan hđăp ară anei ruă êbuh, dua čô anak khŏ, amâo mâo sang dôk. Hmei jing lĭng kahan hđăp mñă kơ bruă sang čư̆ êa jing brei kơ kdriêk Ea Quang jing 9 boh sang, amâo lŏ dưi mbŏ ôh. Ară anei, lĭng kahan hđăp hmei bi mkrum mguôp mkra tur leh. Ară anei hưn mdah hŏng phung bi ala Bruă Kƀĭn Ala gŏ sang anei dưi rŭ mdơ̆ng sang mơ̆?

Dŭm klei blŭ mguôp mơ̆ng phung bi ala mâo êpul bi ala Bruă Kƀĭn Ala leh anăn khua gĭt gai dŭm knơ̆ng, dhar bruă leh anăn khua bruă sang čư̆ êa dŭm kdriêk klă anăp wĭt lač. Bi hŏng dŭm klei êngao klei dưi mgaih msir, êpul bi ala Bruă Kƀĭn Ala čar Dak Lak ƀuăn srăng hưn hŏng dŭm anôk bruă djŏ tuôm ksiêm dlăng, lŏ dơ̆ng ktuê dlăng bruă mgaih msir čiăng rơ̆ng kơ boh tŭ dưn mnuih ƀuôn sang.

Pô bi ala Nguyễn Duy Thành ti Dak Lak blŭ mguôp kơ klei bi khuăt phung mă bruă knŭk kna.

Êjai anăn, ti čar Lâm Đồng, k’iăng khua Bruă Kƀĭn Ala Nguyễn Đức Hải mă bruă hŏng čar leh anăn anôk bruă ksiêm duah hạt nhân Đà Lạt kơ bruă hluê ngă hdră mtrŭn mrô 57 mơ̆ng Phŭn bruă kđi čar leh anăn hdră mtrŭn mrô 193 mơ̆ng Bruă Kƀĭn Ala, čiăng mkŏ mjing klei dlưn hưn hlăm klei mđĭ kyar klei kreh knhâo mrâo mrang leh anăn mlih mrô.

K’iăng khua Bruă Kƀĭn Ala mñă ktang, bruă lông ngă dŭm hdră êlan phŭn čiăng klă hŏng boh sĭt, rơ̆ng kơ klei hăm mbĭt, tŭ dưn, nĕ kơ klei msĕ leh anăn khă bi mâo. Lâm Đồng ăt dưi mtrŭt mjhar hnưm mkŏ  mjing anôk bruă mlih mrâo mbruă, bi jơr ai dưi, mkŏ mjing tur knơ̆ng mđĭ kyar klei kreh knhâo alŭ wăl. K’iăng khua Bruă Kƀĭn Ala Nguyễn Đức Hải brei thâo:

“Giăm anei, êpul gĭt gai mtô leh klă klơ̆ng kơ dŭm alŭ wăl, ai tiê mbĭt jing gĭt gai gưl dlông hĭn ti čar srăng gĭt gai klă anăp. Hdră srăng klă klơ̆ng, mâo mta kñăm, mbha bruă klam klă nik. Drei srăng ngă čiăng kčĕ kơ phung kreh knhâo, hdră bi jơr dŭm ai dưi čiăng ngă bruă, leh anăn kơ klei duh bi liê srăng mđing mrô 1. Sơnăn čar Lâm Đồng čiăng mâo anôk bruă mlih mrâo mbruă kơ bruă anei amâodah hơăi! Bruă klam hmei srăng ksiêm duah, bi mklin čiăng hưn mdah”.

          Lŏ dơ̆ng hluê ngă tŭ dưn dŭm hdră mtrŭn anei, k’iăng khua Bruă Kƀĭn Ala Nguyễn Đức Hải mñă kơ čar Lâm Đồng čiăng nao klă hŏng mta phŭn gĭt gai mơ̆ng gưl dlông, rơ̆ng kơ hdră êlan, klei kluôm dhuôm, hrăm mbĭt leh anăn mâo knhuah boh sĭt djŏ guôp hŏng alŭ wăl. Nĕ kơ klei lŏ msĕ hŏng hdră mtrŭn ngă truh hdră êlan ngă bi mâo. Mbĭt anăn, srăng bi myuôm bruă klam, boh nik jing phung ba anăp hlăm klei gĭt gai, ktrâo lač, ksiêm dlăng hluê ngă bruă klam, rơ̆ng kơ klei klă mngač, tŭ dưn leh anăn dưi ngă. Amâo mâo mjhua hŏng hdră êlan, bi luč liê mang.

          Wưng anei, k’iăng khua Bruă Kƀĭn Ala Nguyễn Đức Hải leh anăn êpul ngă bruă nao čuă, mđup brei hnư mnơ̆ng dua gŏ sang knŭk kna dlăng ba ti kdriêk Đức Trọng, čar Lâm Đồng, mñă kơ bruă sang čư̆ êa alŭ wăl, dŭm gưl bruă, dhar bruă, lŏ dơ̆ng uêñ mĭn kơ klei hdĭp dŭm gŏ sang knŭk kna dlăng ba, phung mâo bruă tŭ dưn ti alŭ wăl čar.