Êpul bi ala bruă kƀĭn ala čar Gialai mâo leh klei bi tuôm hŏng phung ƀuôn sang ti dŭm kdriêk Phú Thiện, Đức Cơ, Čư̆ Pah, Đăk Đoa, Kbang Čư̆ Proong, Đăk Pơ lehanăn Ia Grai. Ti dŭm anôk bi tuôm, phung ƀuôn sang čar Gialai bi êdah klei mơak ti anăp klei tŭ jing mơ̆ng klei bi kƀĭn tal 4, bruă kƀĭn ala gưl 15. Phung ƀuôn sang bi mni kơ ai tiê, bruă đua klam phung bi ala bruă kƀĭn ala čar Gialai mâo leh lu klei blŭ yuôm bhăn đru mguôp klei tŭ jing mơ̆ng klei bi kƀĭn.

Phung ƀuôn sang mâo klei blŭ lač kơ dŭm klei adôk kƀah ti alŭ wăl, msĕ si mđing kơ klei duh bi liê, mkra êlan klông hlăm krĭng ƀuôn sang. Bi kơ klei hđeh kreh djiê mngăt hlăm êa đĭ lu hlăm thŭn êgao, kƀah anôk hđeh hlăp hlăm krĭng ƀuôn sang, krĭng mnuih djuê ƀiă. Ti anôk bi tuôm lu phung ƀuôn sang, akâo kơ dŭm dhar bruă djŏ tuôm mâo hdră bi hơĭt ênoh čhĭ hbâo pruê, mnơ̆ng pioh kơ bruă lŏ hma čiăng kơ phung ngă lŏ hma hơĭt hlăm klei mă bruă. Lê Văn Trung, dôk ti alŭ mrô 3, să Ia Tô, kdriêk Ia Grai lač:

“Hŏng ênoh ênil amâo mâo hơĭt msĕ si ară anei, lehanăn ênoh hbâo pruê đĭ yuôm, phung ƀuôn sang dlăng kriê wiê ênăk kphê amâo mâo ƀơ̆ng mnga lu ôh, kyuadah blŭt leh pla kphê dŭm thŭn hŏng anei leh, dŭm mâo tuh kơ hbâo pruê jih. Hlăk êlâo 600 êbâo hlăm sa kdô, snăn ară anei giăm 1 êklăk mkrah sa kdô, lehanăn bi lŏ prăk mưn mnuih nao pĕ kphê lĕ... Snăn phung ƀuôn sang čang hmăng mâo bruă kƀĭn ala, knŭk kna ksiêm dlăng mâo hdră bi kna ênoh ênil boh mnga, lehanăn hbâo pruê”.

            Bi ti čar Daknông, Êpul bi ala bruă kƀĭn ala čar anei mâo mkŏ mjing leh dŭm klei bi tuôm hŏng phung ƀuôn sang ti dŭm kdriêk Dak Rlâp, Dakmil, Čư̆ Jŭt, lehanăn ƀuôn prŏng Gia Nghiã. Phung ƀuôn sang mâo leh klei bi mni kơ êpul bi ala bruă kƀĭn ala čar pô mâo leh dŭm klei bi trông, mâo klei blŭ, lehanăn mâo klei êmuh ti anôk bi kƀĭn bruă kƀĭn ala. Phung ƀuôn sang čar Daknông ăt lŏ akâo kơ lu mta bruă boh nik kơ klei ngă hră mơar kơ bruă lăn ala, bruă čuăl mkă klei djă yua lăn, bruă rŭ mdơ̆ng hlăm krĭng ƀuôn sang, klei bi mdoh wăl hdĭp mda...

Hlăm bruă bi kđơ̆ng hŏng klei ƀơ̆ng ngăn, phung ƀuôn sang čang hmăng čar Daknông mâo hdră mghaih msir bi jih klei dôk dleh kpăk hlăm čar. Msĕ si ti să Dak Nia, ƀuôn prŏng Gia Nghiã, mâo lu phung ƀuôn sang akâo mghaih msir bi pral bruă klam lehanăn klei mkra êlan nao kơ Drai Liêng Nung jhat rai jih. Nguyễn Đình Thi, ti Bon Sêrê U, să Dak Nia, lač:

Akâo kơ diih mblang brei kơ hmei thâo, leh klei mkŏ mjing êpul kiă kriê bruă bi kdơ̆ng hŏng klei ƀơ̆ng ngăn ti čar, snăn truh kơ ară anei tăp anôk êpul bruă mâo ngă leh hlăm klei mghaih msir dŭm mta bruă amâo mâo jăk hlăm čar? Ară anei phung ƀuôn sang să Dak Nia dôk ăl čôñ êdi kơ klei bi liê truh 30 êklai prăk duh bi liê kơ alŭ wăl hiu čhưn ênguê Liêng Nung, lehanăn êlan klông tinei jhat rai jih, ƀiădah anei jing anôk dôk rŭ mjing wăl hiu čhưn ênguê hlăm yang ƀuôn”.

            Ăt hlăm hrue kăm êgao, Phan Đình Trạc, Khua kiă kriê bruă knuă mơ̆ng gưl dlông, mbĭt hŏng êpul bi ala bruă kƀĭn ala čar Lâm Đồng mâo leh mmông bi tuôm hŏng phung ƀuôn sang ti să Dă Ñim, kdriêk Lạc Dương.

Ti anôk bi tuôm anei, phung ƀuôn sang să Dă Ñim, kdriêk Lạc Dương mâo leh klei mơak kơ dŭm boh tŭ dưn yuôm bhăn mơ̆ng klei bi kƀĭn tal 4, bruă kƀĭn ala gưl 15, boh nik dŭm klei bhiăn, hdră mtrŭn yuôm bhăn mâo bi mklă leh. Lehanăn lŏ dơ̆ng akâo kơ êpul bi ala bruă kƀĭn ala thâo kơ dŭm bruă adôk ka djŏ, lehanăn akâo kơ dŭm kdriêk, čar, lehanăn gưl dlông pral mâo klei mđing hĭn lehanăn mghaih msir mtam. Hlăm anăn mâo kdrêč êlan dơ̆ng prŏng mrô 27C jhat rai leh, ngă dleh kpăk hlăm klei êrô êbat, lu êlan kčŭn kjoh bŏ hŏng klei hyưt, lehanăn amâo mâo êđăp ênang ôh hlăm klei găn êrô; pral lŏ bi ksiêm, lehanăn ngă hră lăn kơ phung ƀuôn sang, mâo hdră êlan đru kơ knuă druh să amâo mâo djŏ mnuih thơ̆ng kơ bruă ôh, lehanăn đru kơ phung ƀuôn sang mâo čan prăk hŏng mnga hdjul pioh kơ bruă duh mkra pla mjing... Phung khua kiă kriê knơ̆ng bruă sang čư̆ êa čar Lâm Đồng, knơ̆ng bruă sang čư̆ êa kdriêk Lạc Dương hlŏng bi êdah lehanăn wĭt lač kơ dŭm mta bruă mâo phung ƀuôn sang să Dă Ñim akâo.

Phan Đình Trạc, Khua kiă kriê bruă knuă gưl dlông čih pioh dŭm klei phung ƀuôn sang akâo, lehanăn srăng bi klin, mâo klei hâo mdah ti anôk bi kƀĭn bruă kƀĭn ala hlăm wưng kơ anăp. Hlăm anăn, akâo duh bi liê pŏk mlar, mkra mđĭ êlan dơ̆ng prŏng mrô 27C jing sa klei phung ƀuôn sang akâo yuôm bhăn kơ klei hdĭp, lehanăn jing djŏ hŏng klei pioh mđĭ kyar krĭng Lăn Dap Kngư mơ̆ng phŭn bruă kđi čar, Phan Đình Trạc lač:

“Kơ êlan dơ̆ng prŏng mrô 27C, kâo ƀuh êpul bi ala bruă kƀĭn ala drei năng bi mâo klei mă bruă hŏng phŭn bruă êlan klông, čiăng mđrăm mbĭt hŏng čar ruh mgaih jih jang klei dleh dlan anăn. Anei ăt jing bruă dôk hlăm hdră mơ̆ng phŭn bruă kđi čar kơ hdră mtrŭn krĭng Lăn Dap Kngư. Hlăm anăn, mâo sa hdră êlan yuôm bhăn jing mkŏ hŏng krĭng mkăn, krĭng lăn Dap Kngư hŏng dŭm boh kdrŭt mrâo mđĭ kyar krĭng nah Ngŏ, hŏng ƀuôn prŏng Hồ Chí Minh, hŏng čar Khánh Hoà...”./.