Sa klei lông ngă ti anôk bi kƀĭn brei thâo, leh hmư̆ Khua phŭn bruă Sang hră mơar mtô bi hriăm hlak mblang kơ mta phŭn ngă klei bi čăm biêng hlăm sang hră, Pô bi ala Đậu Khắc Gia Bảo hriê mơ̆ng Êpul bi ala Anôk bruă kƀĭn ala phung hđeh čar Quảng Trị, mâo klei êmuh ti anôk bi kƀĭn:

“Ơ Khua phŭn bruă Sang hră mơar mtô bi hriăm, kâo hmư̆ leh klei hlak mblang mơ̆ng Khua phŭn bruă kơ mta phŭn ngă klei bi čăm biêng hlăm sang hră. Khă snăn, kâo ƀuh Khua phŭn bruă ka ksiêm dlăng djŏ hnơ̆ng klei hmăi truh kơ ai tiê klei mĭn hlăm boh klei bi čăm biêng hlăm sang hră?

Bi ala Phŭn bruă Sang hră mơar mtô bi hriăm wĭt lač klei êmuh:

“Kâo lač jăk lehanăn sa ai hŏng pô bi ala Anôk bruă kƀĭn ala Đậu Khắc Gia Bảo, anei jing klei êdu kƀah, kyua anăn hlăm wưng ti anăp, hmei srăng bi hgŭm kjăp hŏng anôk bruă mdrao mgŭn čiăng mđĭ bruă pŏk ngă lehanăn msir mgaih pral dŭm boh klei djŏ tuôm kơ ai tiê klei mĭn phung hđeh”.

Blŭ hrăm ti anôk lông bi kƀĭn kơ “Hdră gang mkhư̆ klei čăm biêng hlăm sang hră”, Khua phŭn bruă Sang hră mơar mtô bi hriăm Nguyễn Kim Sơn brei thâo:

“Wĭt lač klei êmuh anei, lač klei lông ngă ƀiădah boh klei anei amâo mgưtdah ôh, jing klei dôk mâo sĭt. Kâo ƀuh phung hđeh êmuh lehanăn bi êdah ênoh mrô ăt msĕ mơh hdră msir mâo Phŭn bruă Sang hră mơar mtô bi hriăm bơ̆k bâo lehanăn dôk pŏk ngă. Brei drei bi mklă mklơ̆ng snei, sang hră yâo mơak amâo mâo anôk kơ klei bi čăm biêng, klei jhat lehanăn klei arưp aram truh hŏng phung hđeh hriăm hră”.

Bi hŏng Khua phŭn bruă mdrao mgŭn Đào Hồng Lan, khădah nao ti anôk lông bi kƀĭn Anôk bruă kƀĭn ala phung hđeh, ƀiădah Khua phŭn bruă ƀuh msĕ si dôk nao ti sa klei bi kƀĭn klă sĭt:

“Dŭm klei êmuh lehanăn wĭt lač mơ̆ng phung bi ala hđeh êlăk jing klă mngač lehanăn mâo klei đua klam, bi êdah klei mđing dlăng kơ phung hđeh. Hmei ƀuh dŭm bruă anei jing mjêč êdi hŏng phung hđeh ară anei. Dŭm boh klei djŏ tuôm kơ djŭp hăt, boh nik mta hăt mrâo, hăt điện tử, mnăm kpiê ƀiêr, đa mâo wăt matuĭ hlăk dôk arưp aram prŏng êdi truh kơ klei suaih pral phung hđeh lehanăn hnơ̆ng tŭ jăk ênoh mnuih ti ala čar drei.

Hŏng kơhưm jing Pô bi ala Anôk bruă kƀĭn ala phung hđeh mơ̆ng Êpul bi ala ƀuôn prŏng Hà Nội, adei Nguyễn Trà My, adŭ 8 B3,  Sang hră gưl 2 Vinschool Times City bày tỏ:

“Ti anôk bi kƀĭn hruê anei, grăp čô bi trông leh klă mngač kơ dŭm bruă djŏ tuôm kơ phung hđeh. Kâo čang hmăng, dŭm klei blŭ đru mguôp mơ̆ng jih jang srăng mâo dŭm Phŭn, dhar bruă mđing hmư̆ lehanăn mđing dlăng hĭn, mâo hdră msir mghaih dŭm klei blŭ, klei hưn mơ̆ng phung hđeh čiăng dưi msir mghaih jih klei mâo hlăm gul thŭn phung hđeh”.

Leh nao ti Klei lông bi kƀĭn kơ hdră êmuh lehanăn wĭt lač klei êmuh anei, Khua Anôk bruă kƀĭn ala Trần Thanh mẫn bi mni bruă Đoàn gưl dlông, Êpul bruă Đội gưl dlông mâo leh klei mĭn mrâo anei hŏng anôk bruă djŏ tuôm mkŏ mjing klei bi kƀĭn lông ngă “Anôk bruă kƀĭn ala phung hđeh”. Mbĭt anăn mñă Đảng, Knŭk kna mđing dlăng nanao kơ hdră răng mgang, mjuăt bi hriăm phung hđeh. Hluê si Khua Anôk bruă kƀĭn ala, klei bi kƀĭn lông ngă “Anôk bruă kƀĭn ala phung hđeh” gưl 2 ruah leh 2 mta phŭn jing “Gang mkhư̆ klei bi čăm biêng hlăm sang hră” lehanăn “Gang mkhư̆ klei truh jhat mơ̆ng hăt” hlăm wăl anôk sang hră jing klă sĭt êdi, mâo lu mnuih hlăm yang ƀuôn mđing dlăng./.