Blŭ hrăm ti anôk bi kƀĭn, Khua bruă kƀĭn ala Vương Đình Huệ lač, ti krĭng phŭn krŭ kdơ̆ng Việt Bắc, thŭn 1948, Khua gĭt gai Hồ Chí Minh mâo leh klei iêo mthưr jih jang bi ktưn khăp čiăng kơ lăn čar hŏng: “Klei bi ktưn jing klei khăp kơ lăn čar, khăp kơ lăn čar snăn brei mâo klei bi ktưn, phung ngă klei bi ktưn jing phung khăp kơ lăn čar hĭn”. Dal 75 thŭn leh êgao, hŏng klei anăn jing leh boh kdrŭt prŏng hlăm bruă bi ktưn khăp čiăng kơ lăn čar, mâo leh klei đĭ kyar amâo mâo mdei, dưi ba wĭt leh lu boh tŭ dưn jăk, jing yuôm bhăn êdi hlăm bruă rŭ mdơ̆ng lehanăn răng mgang lăn čar Việt Nam, mjing kơ lăn čar dưi mâo hĕ msĕ si ară anei.

Tuyên Quang jing sa boh čar ba akŏ hlăm kluôm ala kơ bruă răng mgang dliê, lehanăn mđĭ kyar bruă duh mkra dliê. Ênhă lăn dliê truh 76% ênhă dliê čŏng mâo. Čar ngă leh jăk bruă čuăl mkă mbha mâo 3 mta dliê; ngă jăk bruă răng mgang, lehanăn mđĭ bi lar dliê, pla mrâo êbeh 11 êbâo hectar hlăm grăp thŭn, mjing leh anôk pioh kơ bruă pioh mă kyâo giăm 200 êbâo héc-ta, hnơ̆ng dưi luôm dliê truh 65%; dưi mjut mjing nanao wăl hdĭp mda jăk, đru bi răng kriê djăp mta mnơ̆ng dhơ̆ng hdĭp, lehanăn jing leh anôk krơ̆ng kơ akŏ êa, đru mkhư̆ klei êa lêč, klei không kƀah êa, amâodah klei klưh hroh lăn... kơ krĭng kngư kwar dưr. Khua bruă kƀĭn Vương Đình Huệ mñă thŭn 2023, Tuyên Quang lŏ dơ̆ng hyuă kjăp hĭn klei jing leh kơ ƀuôn sang klei krŭ kdơ̆ng, lehanăn dŭm boh tŭ dưn leh mâo, kñăm lŏ bi lar lu hĭn knhuah gru thâo khăp kơ lăn čar hlăm phung knuă druh, đảng viên lehanăn phung ƀuôn sang djăp djuê ana kut kat hlue ngă djăp ênŭm bi leh jih jang mta mñăm, bruă čuăn;

“Ƀri wưng anei kâo mtă kơ jih jang anôk bruă gưl dlông, êlâo hĭn jing phŭn bruă lŏ hma đru kơ čar Tuyên Quang bi lar bruă thâo ba yua kdrăp mrâo mrang kơ bruă răng mgang dliê, lehanăn mđĭ kyar dliê, mđĭ kyar bruă duh mkra dliê kyâo, bi mguôp bruă pla dliê, hŏng răng mgang dliê, mbĭt hŏng bruă mđĭ kyar bruă hiu čhưn ênguê lăn mnga êa mơak, lehanăn kriê pioh knhuah gru dhar kreh, mbĭt hŏng bruă mkŏ mkra krĭng ƀuôn sang mrâo”.

Khua bruă kƀĭn ala mtă kơ dŭm gưl, dhar bruă lŏ dơ̆ng mlih mrâo, lehanăn mđĭ hĭn klei tŭ dưn mơ̆ng bruă bi ktưn khăp čiăng kơ lăn čar mguôp mbĭt hŏng bruă tui hriăm lehanăn hlue ngă knhuah mngač khua gĭt gai Hồ Chí Minh; mâo nanao klei thâo bi mguôp, ai ktang mơ̆ng bruă kđi čar, klei bi sa ai, bi hgŭm jih jang phung ƀuôn sang hlue ngă jăk djăp hdră mtrŭn mơ̆ng Ðảng, hdră mtrŭn mơ̆ng bruă kƀĭn ala kơ klei mđĭ kyar duh mkra ala ƀuôn, lehanăn ba wĭt ngăn prăk kơ knŭk kna thŭn 2023 kñăm dưn yua jih klei găl, klei ktang mđĭ kyar kluôm dhuôm bruă duh mkra ala ƀuôn, bruă răng mgang klei êđăp ênang mđrĭng hŏng mta kñăm mđĭ klei hdĭp mda phung ƀuôn sang.

Grăp dhar bruă, grăp alŭ wăl, grăp êpul bruă, anôk bruă, êpul êya lŏ dơ̆ng bi kjăp, lehanăn păn kjăp ai bi ktưn hŏng mta kñăm tui tiŏ bruă bi ktưn hŏng klei klă mngač, mâo bruă knuă ngă hŏng klei djŏ, dưi iêo jak jih jang mnuih, grăp gưl thŭn hlăm tar čar kwar lehanăn bruă knuă, čiăng kơ bruă bi ktưn klă sĭt mŭt hlăm klei hdĭp, jing năng hŏng klei hdĭp aguah tlam mlam hrue, djŏ hŏng klei čiăng mơ̆ng grăp čô mnuih, mtrŭt mjhar ngă klei mkiêt mkriêm, bi kdơ̆ng hŏng klei ƀơ̆ng ngăn, bi mlih hdră êlan mă bruă, boh nik kơ klei pral thâo ƀuh, lehanăn mjuăt bi hriăm mnuih thâo mĭn, bi lar jih jang bruă mă jing tŭ dưn, mlih mrâo hdră êlan pah mni, mjing klei bi mđĭ ai jăk kơ dŭm êpul bruă, jih jang mnuih ngă tui si bruă klam grăp čô mdê mdê, ngă klei bi hdơr 75 thŭn hrue awa Hồ mâo klei iêo mthưr mkŏ mjing klei bi ktưn khăp čiăng kơ lăn čar hlăk (11.6.1948 -11.6.2023).

Khua bruă kƀĭn ala lŏ mñă, yan mnga Quý Mão 2023 lŏ jing yan “Tết pla kyâo” mphŭn dưi mkŏ mjing mơ̆ng hlăk yan mnga Canh Tý liăp 63 thŭn êlâo tui si klei khua gĭt gai Hồ Chí Minh iêo mthưr; jing leh klei ƀuăn hlăm bruă hluê ngă mơ̆ng Êpul khua kiă kriê bruă Đảng tui si asăp mtrŭn mrô 13 mơ̆ng gưl dlông, kơ klei Đảng hyuă kjăp hĭn bruă kiă kriê klei răng mgang dliê, lehanăn mđĭ kyar dliê, kñăm mkŏ mjing sa “klei duh mkra mtah”, mbĭt hŏng klei mđĭ kyar kjăp:

“Jih jang brei ngă hĕ bi dưi hlăm mta kñăm phŭn jing; Phung pla kyâo năng brei dưi hdĭp hŏng dliê, lehanăn đĭ mdrŏng mơ̆ng dliê, kut kat hlue ngă tŭ jing mta kñăm rŭ mdơ̆ng Tuyên Quang jing anôk phŭn kơ bruă ksiêm duah kơ dliê kyâo hŏng kdrăp mrâo mrang, jing anôk mkra mjing kyâo hing ang hlăm krĭng kngư kwar dưr djŏ hŏng mtă mtrŭn mrô 11 mơ̆ng phŭn bruă kđi čar kơ klei mđĭ kyar bruă duh mkra ala ƀuôn, răng mgang kjăp klei êđăp ênang krĭng kngư lehanăn čư̆ čhiăng kwar dưr trŭh thŭn 2030, tă hdră hlŏng truh kơ thŭn 2045, anei yơh jing mta kñăm kluôm”.

Hŏng ai êwa mrâo, hdră mă bruă mrâo, Khua bruă kƀĭn ala đăo knang kơ “Tết pla kyâo hdơr nanao kơ Awa Hô” yan mnga Quý Mão thŭn 2023 ti čar Tuyên Quang sĭt nik srăng dưi ba wĭt lu boh tŭ dưn prŏng, lehanăn jăk hĭn, đru hlăm bruă rŭ mdơ̆ng lăn čar Việt Nam mtah mda doh siam, hing ang kơ klei đĭ kyar kjăp, msĕ hŏng klei khua gĭt gai Hồ Chí Minh tuôm hmăng hmưi leh: "Yan mnga jing tết pla kyâo, mjing kơ lăn čar knư̆ hrue knư̆ mtah mda”./.