Tuôm hŏng Pờ Lò Hừ hlăm kdrăn êmô kbao hlăm čư̆. Ñu dông răng sa êpul êmô kbao ñu hlăm anăn. Hŏng đŏk ñu dôk iêo êmô kbao kwang hlăm čư̆, êmô kbâo ñu ƀrŭng ƀrŭng kbiă nao yơh kơ anôk huông ti djiêo ping čư̆. Grăp kpăt hra ñu pruê kơ êmô kbao ñu ƀơ̆ng jing klei ñu bi mƀlum êmô kbao wĭt hŏng ñu pral hĭn.

Amĭ kkiêng lehanăn đĭ hriê kơ prŏng hlăm krĭng lăn klă klêč amâo mâo čăt đĭ ti ƀuôn Chà Kế, êgao kơ 10 thŭn klei hdĭp ñu dơ̆ng hiu kpư̆ ƀơ̆ng hŏng gŏ sang atăt diñu truh kơ krĭng lăn Pha Bu, kbưi hŏng ƀuôn sang diñu pô êbeh 60km. Dơ̆ng mơ̆ng thŭn adôk mda Hừ ăt msĕ hŏng lu phung hđeh mnuih La Hủ mkăn tinei jih thŭn êngŭn mlan knŏng tui tiŏ amĭ ama duah ƀơ̆ng hrue anei kơ anei, mgi kơ adih, jih dliê anei đuĕ nao kơ dliê adih. Msĕ snăn nanao yơh klei hdĭp kplŭt aguah kƀah tlam dôk nanao hlăm klei knap mñai ư̆ hră êpa êsei, snăn dah mkă mnuih La Hủ yơh jing djuê ana dleh dlan hĭn êdi hlăm 54 djuê ana hlăm kluôm ala; Pờ Lò Hừ lač:

        Amĭ ama luič leh sơăi, lehanăn ama mơh jing jing anak kluič, hlăk anăn ăt dôk điêt, amâo mâo hdĭp phĭt sa anôk ôh, ƀiădah klah klap mdê mdê snăn lĕ nanao hlăm klei dleh dlan yơh. Hiu duah ƀơ̆ng amâo mâo hơĭt sa anôk klei hdĭp leh hlăm klei dleh dlan suăi êmăn, knap mñai nanao, kƀah mnơ̆ng ƀơ̆ng nanao. Bi ară anei bi mlih leh, dôk leh phĭt hơĭt sa anôk. Gĭr duh ƀơ̆ng čiăng mđĭ kyar klei hdĭp mda, lehanăn ară anei lŏ mâo knŭk kna đru mkra brei êlan klông êrô êbat jăk yâo, duh ƀơ̆ng hŏng djăp mta jing găl ênưih leh sơăi”.

        Ti anăp klei dleh dlan kơ anôk ala, yan adiê, kbiă hriê mơ̆ng klei hdĭp dleh dlan knap mñai găp djuê pô, jing leh sa čô đảng viên, jing khua bruă Đảng, hlŏng păn ngă khua ƀuôn, snăn Pờ Lò Hừ gĭr ktir tui duah, hriăm êmuh djăp hdră êlan čiăng mđĭ kyar klei hdĭp mda kơ gŏ sang pô. Leh lu thŭn kreh kruiñ truh kơ ară anei hlăm thŭn 43 leh, Hừ mâo hlăm kngan ñu dŭm êklai prăk, hŏng êpul êmô kbao ñu êbeh êtuh drei, mâo dŭm pluh ha ana quế, sa nhân, thảo quả, sâm...:

        Mŭt leh Đảng ƀai hĭn brei thâo gĭr ksiêm duah hriăm êmuh čiăng kơ thâo săng hĭn, lehanăn grăp mlan mâo nanao klei bi kƀĭn, hâo hưn mtrŭt mjhar mnuih ƀuôn sang, đru mnuih ƀuôn sang čiăng kơ knư̆ hrue knư̆ mâo klei mơak mñai hĭn. Jing khua bruă Đảng, bruă tal êlâo jing brei mâo klei thâo bi hmô čiăng kơ mnuih ƀuôn sang tui hriăm hlăm klei duh ƀơ̆ng rông mnơ̆ng, pla mnơ̆ng bi mâo klei tŭ jing. Bi tơdah pô amâo mâo ngă ôh klei bi hmô, snăn mnuih ƀuôn sang srăng dôk hlăm klei knap mñai nanao. Amâo mâo bĭt êlan duh ƀơ̆ng, mnuih ƀuôn sang ka mưng ôh duah hdră êlan mrâo, klei mĭn adôk ka mngač”.        

        Amâo mâo djŏ knŏng thâo duh mĭn hjăn kơ asei mlei pô lehanăn kơ ayŏng adei hlăm pưk sang đuič ôh, hŏng bruă klam jing sa čô đảng viên, lu thŭn hŏng anei Pờ Lò Hừ lŏ đru dŭm êtuh gŏ sang hlăm ƀuôn, hlăm să. Amâo mâo djŏ mjing bruă knuă mă hlăm grăp hrue kơ 5 čô mnuih, lehanăn mă bruă hlue yan truh kơ êbeh 30 čô mnuih, dŭm êtuh gŏ sang kƀah mnơ̆ng ƀơ̆ng huă hlăm yan giăm wiă, snăn Hừ đru mdiê, braih, ktơr, dŭm gŏ êsei amâo mâo prăk duh kơ bruă, lehanăn ka mưng juăt hlăm klei duh ƀơ̆ng, snăn ñu đru lehanăn ktrâo brei hdră duah ƀơ̆ng. Hlei pô kƀah, hlei pô čiăng mâo klei đru, snăn ñu đru mtam, kyuanăn yơh hŏng ñu jih jang mnuih hlăm ƀuôn bŏ hŏng klei jưh knang: Amai Ly Mò Nu, mnuih hlăm ƀuôn Pha Bu, să Pa Ủ yăl dliê:  Kyua mâo khua bruă Đảng Hừ đru hlăm klei duh ƀơ̆ng, leh lu thŭn dôk nanao hlăm klei kƀah djăp mta mnơ̆ng, ară anei gŏ sang kâo tlaih leh mơ̆ng klei dleh dlan. Klei hdĭp amâo lŏ dôk hlăm klei knap mñai ôh, phung anak ară anei mâo nao leh sang hră djăp ênŭm. Amâo mâo djŏ knŏng hjăn sang hmei ôh, ƀiădah hlăm lu gŏ êsei mkăn hlăm ƀuôn anei mâo klei đru ba msĕ mơh, snăn klei hdĭp mdul hĭn leh. Mnuih ƀuôn sang hlăm ƀuôn mơak snăk!

        Ñăt kriêp hlăm klei ba anăp đru kơ klei mđĭ kyar klei hdĭp mda, ngă đang war, hlăm čư̆ kbuôn, dliê kmrơ̆ng ti ƀuôn sang pô, lu thŭn hŏng anei leh ƀiă snăk mnuih thâo kơ ƀuôn sang La Hủ ti să knông lăn Pa Ủ mâo hĕ sa čô “mdrŏng prăk êklai mơ̆ng bruă lŏ hma”. Mơ̆ng bruă bi hmô rông êmô kbao lehanăn ngă đang war hlăm dliê čư̆ ƀuôn sang pô, khua bruă Đảng ƀuôn Pha Bu - Pờ Lò Hừ, truh kơ ară anei hlăm să Pa Ủ lŏ mâo leh lu mnuih thâo bi hmô jăk hlăm ƀuôn Thăm Pa, Nhú Ma, Ứ Ma, Xà Hồ, Mu Chi... Lač kơ bruă klam mơ̆ng đảng viên Pờ Lò Hừ ti ƀuôn sang, snăn Phạm Hồng Bình, K’iăng khua bruă Đảng să Pa Ủ, kdriêk Mường Tè brei thâo:

        Hŏng dŭm alŭ wăl dôk hlăm klei dleh dlan, mnuih ƀuôn sang kƀah klei thâo săng mơh, snăn dŭm klei bi hmô jăk msĕ snei jing năng mpŭ êdi. Diñu yơh jing mnuih hlăm ƀuôn kăp đru ba mnuih ƀuôn sang, mâo klei mnuih ƀuôn sang mpŭ snăk. Mơ̆ng bruă diñu mă mjing leh klei lar bra klei thâo bi hmô siam pioh mđiai jih jang mnuih, lehanăn ngă nanao klei bi đru, bi hmô êlâo sơăi čiăng kơ jih jang mnuih ƀuôn sang tui hriăm, lehanăn đru kơ klei duh mkra ti să mâo klei đĭ kyar ƀrư̆ ƀrư̆”.

        Pa Ủ tuôm hing ang jing krĭng phŭn hlăm klei ư̆ êpa Lai Châu, mâo blư̆ klei ư̆ êpa đĭ truh 95%. Ƀiădah leh mâo phung đảng viên ba anăp pŏk brei êlan čiăng tlaih mơ̆ng klei dleh dlan ƀun ƀin msĕ si hŏng Pờ Lò Hừ, ară anei hnơ̆ng ênoh ƀun ƀin hlăm alŭ wăl hrŏ leh mă êbeh 77%. Jih jang bruă ngă kyua mnuih ƀuôn sang mâo leh klei čih pioh, êjai gŏ sang ñu jing 1 hlăm 8 gŏ sang mâo bruă tŭ jing hĭn hlăm klei hriăm lehanăn hlue ngă knhuah mngač Hồ Chí Minh thŭn 2023, mâo leh êpul bruă kiă kriê klei hâo hưn mơ̆ng anôk bruă Đảng čar Lai Châu akâo kơ khua knơ̆ng bruă sang čư̆ êa čar mđup brei hră bi mni./.